Assyltas قوعامدىق قورى قازاقستاندا جاريالانعان توتەنشە جاعدايعا بايلانىستى قيىندىققا تاپ بولعان 200 وتباسىعا كومەك بەرۋگە نيەتتەنىپ وتىر. ءار وتباسىعا 25 000 تەڭگە قاراجات ۇلەستىرىلەدى. كومەك الۋشىلار – كوپبالالى وتباسىلار مەن جالعىزباستى انالار مەن اكەلەر.
كومەك كورسەتۋ ءۇشىن قوعامدىق قور 3 كۇن بۇرىن قايىرىمدىلىق اكتسياسىن باستاعان بولاتىن. ونىڭ شارتىنا سايكەس، وسى مەرزىمدە قانشا قاراجات جينالسا، سونى قور ەكى ەسەلەپ، 100 وتباسىعا كومەك بەرۋى قاجەت بولعان.
قارجى جيناۋعا 351 ادام جاردەمدەسىپ، 3 كۇندە 1 236 768 تەڭگە جيناپتى.
ء"ۇش كۇن بۇرىن ءبىز بۇل اكتسيانى باستاعان كەزدە قانشا اقشا جينالسا، ۇستىنە سونشا قارجى بولەتىنىمىزدى ايتقانبىز. حالىقتىڭ ىقىلاسى كەڭ ەكەن، قايىرىمدى جانداردىڭ ارقاسىندا ءبىز ەندى مىنە 100 وتباسىعا كومەكتەسە الامىز، وتىنىشتەردىڭ كوپتىگىنە بايلانىستى قور قۇرىلتايشىسى دۋلات تاستەكەەۆپەن كەڭەسە كەلە، ءبىزدىڭ قور تاعى 100 وتباسىعا قارجىلاي كومەكتەسپەك. ياعني، 200 وتباسىعا 25 000 تەڭگەدەن ۇلەستىرەمىز", – دەدى قوعامدىق قوردىڭ جەتەكشىسى راۋان وقاس.
كومەك الۋ ءۇشىن كوپ بالالى وتباسىلار مەن جالعىزباستى اكەلەر مەن انالار قوردىڭ ەلەكتروندى پوشتاسىنا ءوتىنىش بەرۋى قاجەت بولعان. قازىردە مىڭنان استام ادامنان ءوتىنىش تۇسكەن. راۋان وقاستىڭ ايتۋىنشا، قور قىزمەتكەرلەرى الداعى 3 كۇندە وتىنىشتەردى قاراستىرىپ، مۇقتاج 200 ادامنىڭ ءتىزىمىن جاسايدى.
قارجى ولاردىڭ بانكتەگى ەسەپشوتىنا اۋدارىلادى. ال بۇل شارانىڭ ءادىل وتكەنىنىڭ دالەلى رەتىندە كومەك العان وتباسىلاردىڭ ءتىزىمى اشىق اقپارات كوزدەرىندە جاريالانادى.
Abai.kz
