مەملەكەت باسشىسى قاسىم-جومارت كەمەلۇلىنىڭ اتىنا موڭعوليا جەرىندەگى قانداستارىمىزدان العىس حات كەلدى.  بۇل تۋرالى قر پرەزيدەنتىنىڭ ءباسپاسوز حاتشىسى بەرىك ءۋالي الەۋمەتتىك جەلىدەگى پاراقشاسىندا جازدى.

مەملەكەت باسشىسى قاسىم-جومارت كەمەلۇلىنىڭ اتىنا موڭعوليا جەرىندەگى قانداستارىمىزدىڭ العىسىن ارقالاعان حاتى كەلىپ ءتۇستى

حاتتا قانداستارىمىز وسىناۋ قيىن قىستاۋ زاماندا قازاقستانعا ءبىلىم الۋ ءۇشىن كەلگەن قاراكوزدەرگە قامقورلىق كورسەتىپ، بارلىق جاعداي جاساپ وتىرعان مەملەكەتىمىزگە، وسىنداي جاعدايدىڭ جاسالۋىنا پارمەن بەرىپ، باقىلاۋدا ۇستاپ وتىرعان پرەزيدەنتكە ريزاشىلىقتارىن بىلدىرگەن.

«سىزگە قيىرداعى موڭعوليا مەملەكەتىندە مەكەن ەتكەن قازاق قانداستارىڭىزدىڭ اتىنان دۇعاي سالەم! قىزمەتىڭىزگە ساتتىلىك پەن تابىس تىلەيمىز. قازاقستاننىڭ ابىرويى ارتا بەرسىن! الەمدى جايلاعان مىنا ىندەت تەزىرەك كەتىپ، اقجارىلقاپ ۋاقىت باستالسىن دەپ، جاراتقاننان سۇرايمىز»، - دەپ باستالىپتى قانداستارىمىزدىڭ حاتى.

بۇدان ارى موڭعولياداعى ىندەتپەن كۇرەس شارالارىن ايتا كەلىپ: «وسى شەكارالار جابىلىپ، ۇشاق ۇشپاي، كولىك جۇرمەي قالعان قيىن كەزدە ءبىزدىڭ ءبىراز وقۋشى بالامىز قازاقستان رەسپۋبليكاسىندا قالىپ قويدى. ءبىز بۇعان ءاۋ باستا قاتتى الاڭدادىق. ءتىپتى، ۋايىمداپ، ابىرجىگەن كەزىمىز دە بولدى. الايدا، بۇنىمىز بەكەر بولىپ شىقتى. ەڭ بىرىنشىدەن، پرەزيدەنت رەتىندە ءوزىڭىزدىڭ قامقورلىعىڭىزدىڭ ارقاسىندا، ەكىنشىدەن، ءبىلىم جانە عىلىم مينيسترلىگى مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كومەگىمەن قازاقستانعا ءبىلىم ىزدەپ بارعان دايارلىق بولىمىندەگى ۇل-قىزدارىمىزدىڭ تاماعى توق، كويلەگى كوك. ولار دا ەل ازاماتتارىمەن بىردەي كارانتين تالاپتارىن ساقتاپ، اقپاراتتىق تەحنولوگيا جۇيەسىمەن ساباقتارىن وقىپ ءجۇر. مۇنى تەلەفون ارقىلى كۇندە ءبىلىپ وتىرمىز. كوڭىلىمىز ورنىنا ءتۇستى. «شۇكىر!» دەپ وتىرمىز.

ارداقتى قاسىم-جومارت كەمەلۇلى! ءبىزدىڭ وقۋداعى بالالارىمىز ەرتەڭ ستۋدەنت، سودان كەيىن مامان اتانىپ، قازاقستان-مونعوليا ىنتىماقتاستىعىن ودان ءارى ارتتىرادى دەپ سەنەمىز. ريزاشىلىق نيەتپەن، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دايارلىق بولىمىندە وقىپ جاتقان موڭعول ۇلىسى وقۋشىلارىنىڭ اتا-انالارى»، - دەپ، حاتتىڭ استىنا 13 اتا-انا قول قويىپتى.

Abai.kz