قاشىقتان وقىتۋ جاعدايىندا بىتىرۋشىلەردى قورىتىندى اتتەستاتتاۋ پاندەر بويىنشا جىلدىق باعالارى نەگىزىندە جۇرگىزىلەدى. قر ءبىلىم جانە عىلىم مينيسترلىگى وسىنداي شەشىم قابىلدادى، - دەپ حابارلاعان مينيسترلىك سايتى. 

اتتەستات پاندەر بويىنشا جىلدىق باعالار نەگىزىندە بەرىلەدى. ۇبت-نى وتكىزۋ مەرزىمدەرى وزگەرىسسىز قالادى.

قازاقستاندا ەنگىزىلگەن توتەنشە جاعداي مەن وقۋشىلاردىڭ قاشىقتان وقىتۋ تۇرىنە اۋىسۋىنا بايلانىستى ءبىلىم جانە عىلىم مينيسترلىگى
9 (10) سىنىپ وقۋشىلارى ءۇشىن قورىتىندى اتتەستاتتاۋ ەمتيحاندارىن، ال 11 (12) سىنىپ وقۋشىلارى ءۇشىن مەملەكەتتىك قورىتىندى اتتەستاتتاۋ ەمتيحاندارىن وتكىزبەۋ تۋرالى شەشىم قابىلدادى.

«ءبىز ساراپتاي كەلە وسىنداي شەشىم قابىلدادىق. ءتيىستى وزگەرتۋلەر مينيسترلىكتىڭ بۇيرىقتارىنا ەنگىزىلدى. جەكەلەگەن ەمتيحاندار وتكىزىلمەيتىن بولادى. بۇل وقۋ جەتىستىكتەرىن قورىتىندى باعالاۋدىڭ بارىنشا ادىلدىگىن قامتاماسىز ەتەدى»، – دەپ حابارلادى مينيسترلىكتىڭ ءباسپاسوز قىزمەتى.

ەستەرىڭىزگە سالا كەتسەك، نەگىزى 9 (10) سىنىپ تۇلەكتەرىنىڭ قورىتىندى اتتەستاتتاۋى:

1) انا ءتىلى بويىنشا جازباشا ەمتيحان (وقىتۋ ءتىلى بويىنشا) – ەسسە تۇرىندەگى جازباشا جۇمىس، گۋمانيتارلىق تسيكل پاندەرىن تەرەڭدەتىپ وقىتاتىن مەكتەپ وقۋشىلارى ءۇشىن ماقالا/اڭگىمە/ەسسە تۇرىندەگى جازباشا جۇمىس;

2) ماتەماتيكادان (الگەبرادان) جازباشا ەمتيحان;

3) وقىتۋ ورىس/وزبەك/ۇيعىر/تاجىك تىلىندە جۇرگىزىلەتىن سىنىپتاردا قازاق ءتىلى مەن ادەبيەتىنەن جازباشا ەمتيحان جانە وقىتۋ قازاق تىلىندە جۇرگىزىلەتىن سىنىپتاردا ورىس ءتىلى مەن ادەبيەتى پانىنەن جازباشا ەمتيحان;

4) تاڭداۋ ءپانى بويىنشا (فيزيكا، حيميا، بيولوگيا، گەوگرافيا، گەومەتريا، قازاقستان تاريحى، دۇنيەجۇزى تاريحى، ادەبيەت (وقىتۋ ءتىلى بويىنشا), شەت ءتىلى (اعىلشىن/فرانتسۋز/نەمىس), ينفورماتيكادان جازباشا ەمتيحان رەتىندە وتكىزىلەتىن.

11 (12) سىنىپ وقۋشىلارى ءۇشىن قورىتىندى اتتەستاتتاۋ:

1) انا ءتىلى مەن ادەبيەتى بويىنشا جازباشا ەمتيحان (وقىتۋ ءتىلى بويىنشا) ەسسە تۇرىندە;

2) ورىس/وزبەك/ۇيعىر/تاجىك تىلىندە وقىتاتىن مەكتەپتەردە قازاق ءتىلى بويىنشا تەستىلەۋ جانە قازاق تىلىندە وقىتاتىن مەكتەپتەردە ورىس ءتىلى بويىنشا تەستىلەۋ;

3) الگەبرا جانە تالداۋ نەگىزدەرى بويىنشا جازباشا ەمتيحان;

4) قازاقستان تاريحى بويىنشا اۋىزشا;

5) تاڭداۋ ءپانى بويىنشا تەستىلەۋ (فيزيكا، حيميا، بيولوگيا، گەوگرافيا، گەومەتريا، دۇنيەجۇزى تاريحى، ادەبيەت (وقىتۋ ءتىلى بويىنشا), شەت ءتىلى (اعىلشىن/ فرانتسۋز/ نەمىس), ينفورماتيكادان تەستىلەۋ تۇرىندە جوسپارلاناتىن.

ايتا كەتەرلىگى، قازىرگى ۋاقىتتا ۇلتتىق بىرىڭعاي تەستىلەۋدى وتكىزۋ مەرزىمى وزگەرىسسىز قالىپ وتىر. تۇلەكتەر ۇلتتىق تەستىلەۋ ورتالىعىنىڭ سايتىندا ورنالاستىرىلعان سىناما تەستتەرىن تەگىن پايدالانا الادى. ءار ءپان بويىنشا تەستىلەۋدىڭ 70 بىرەگەي نۇسقاسى ۇسىنىلىپ وتىر.

ەستەرىڭىزگە سالا كەتەيىك، 2017 جىلدان بەرى ۇبت ناتيجەلەرى جوو تۇسۋگە جانە ءبىلىم گرانتتارىن يەلەنۋگە، ال قورىتىندى اتتەستاتتاۋ ەمتيحاندارىنىڭ ناتيجەسى اتتەستات الۋ ءۇشىن قاجەت.

Abai.kz