ءماجىلىس توراعاسى نۇرلان نىعماتۋلين «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس-احۋالدى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ جەكەلەگەن نورمالارىنا قاتىستى پىكىر ءبىلدىردى. 

وتىرىس بارىسىندا تالقىلانعان ماسەلەلەر ەسكەرىلە وتىرىپ، ەكىنشى وقىلىمعا دەيىن پىسىقتالاتىن بولادى

ەڭ الدىمەن، بۇل زاڭنامالىق تۇزەتۋلەر ازىرلەۋشىلەردىڭ جوبالاۋ-سمەتالىق قۇجاتتامانى ازىرلەۋ جانە تەحنيكالىق كۇردەلى ەمەس وبەكتىلەردى سالۋ ءۇشىن ساراپتامادان وتكىزۋ جونىندەگى راسىمدەردى جويۋ جونىندەگى ۇسىنىسىنا قاتىستى. 

ءماجىلىس دەپۋتاتتارى بۇل نورمانى الىپ تاستاۋ قاجەتتىگىن ايتىپ، مۇنداي ۇسىنىسپەن كەلىسپەدى.

ەرەجەگە سايكەس تەحنيكالىق جاعىنان كۇردەلى ەمەس وبەكتىلەرگە جاتپايتىن نىسانداردى قاتارىنا بيىكتىگى 5 قاباتتان اسپايتىن تۇرعىن ۇيلەر، سىيىمدىلىعى 600 وقۋشىدان كەم ەمەس جالپى ءبىلىم بەرەتىن مەكتەپتەردىڭ عيماراتتارى كىرەدى.

سونىمەن قاتار، بۇنىڭ قۇرامىندا ءبىر ۋاقىتتا 800 ادامعا دەيىن بولاتىن ساۋدا جانە ويىن-ساۋىق نىساندارى بار. 

ياعني، بۇل نىسانداردى زاڭ جوباسىنىڭ نورمالارىنا سايكەس ساراپتاماسىز سالۋ ۇسىنىلعان. وسىعان سايكەس، مۇنى ۆەدومستۆولىق ەرەجەلەر دەڭگەيىندە ەمەس، زاڭ دەڭگەيىندە جاساۋ كەرەك ەكەنىن ايتتى ءماجىلىس توراعاسى نۇرلان نىعماتۋلين.

دەپۋتاتتاردىڭ ايتۋىنشا، مەملەكەتتىك مونوپوليا سۋبەكتىسىنىڭ، مەملەكەتتىك مونوپوليا سۋبەكتىسى بولىپ تابىلمايتىن، باسەكەلەستىك نارىقتا قانداي دا ءبىر تاۋاردى وندىرۋگە، وتكىزۋگە ايرىقشا قۇقىق بەرىلگەن زاڭدى تۇلعانىڭ قازاقستان رەسپۋبليكاسىنىڭ مەملەكەتتىك مونوپوليا تۋرالى زاڭناماسىندا بەلگىلەنگەن شەكتەۋلەردى ساقتاماۋى تۋرالى نورمانى دا الىپ تاستاۋ قاجەت. 

وسى ۇيىمداردى ايقىنداۋ ءۇشىن ازىرلەۋشىلەر مونوپولياعا قارسى ورگان بەكىتەتىن كونكۋرستىق ءتارتىپتى ەنگىزۋدى ۇسىنادى.

ماجىلىسمەندەر زاڭ جوباسى ۇسىنعان نورمالار مەملەكەتتىك ورگاندارعا باسەكەلى تاۋار نارىقتارىندا جەكە مەنشىك نىسانىنداعى مونوپوليستەردى جاساندى تۇردە قۇرۋعا مۇمكىندىك بەرەدى دەپ ەسەپتەيدى.

ءماجىلىس سپيكەرى اتاپ وتكەندەي، سوڭعى جىلدارى وتاندىق تاۋار نارىقتارىندا باسەكەلەستىك ورتا ايتارلىقتاي ناشارلادى. 

اق جانە جشس نىسانىنداعى شامامەن 24 ۇيىم تەك ءوز قالاۋى بويىنشا باعا بەلگىلەۋ ماسەلەلەرىن شەشەدى.

نۇرلان نىعماتۋليننىڭ ايتۋىنشا، ازىرلەۋشىلەر ۇسىنعان تۇزەتۋ مەملەكەت باسشىسىنىڭ مونوپولياعا قارسى ناقتى شارالار قابىلداۋ جونىندەگى نۇسقاۋلارىنا قايشى كەلەدى.

وسى رەتتە، پالاتا سپيكەرى مەملەكەت باسشىسىنىڭ (اعىمداعى جىلدىڭ قاڭتار ايىنداعى ۇكىمەتتىڭ كەڭەيتىلگەن وتىرىسىندا) نارىقتا تەك مەملەكەتتىك ەمەس، سونىمەن قاتار جەكە مونوپوليالاردىڭ تىم كوپ بولۋىن اتاپ ءوتىپ، ۇكىمەتكە مونوپولياعا قارسى جونىندە ناقتى شارالار قابىلداۋدى تاپسىرعانىن اتاپ ءوتىپ، بۇل نورمانى زاڭ جوباسىنان الىپ تاستاۋ قاجەتتىگىن ايتتى. 

سونىمەن قاتار، ءماجىلىس دەپۋتاتتارى اۋىلدىق ەلدى مەكەندەردە امبەباپ بايلانىس قىزمەتتەرىن سۋبسيديالاۋدى بولدىرماۋدى كوزدەيتىن تۇزەتۋمەن دە كەلىسپەيدى.

وسىعان سايكەس ءماجىلىس توراعاسى نۇرلان نىعماتۋلين اۋىلدىق تەلەفون بايلانىسىنا قاتىستى ۇكىمەت ۇسىنعان زاڭ جوباسىنداعى نورمانى قايتا قاراۋ كەرەكتىگىن ايتتى.  

سەبەبى زاڭ جوباسىندا اۋىلدىق ەلدى مەكەندەردەگى بايلانىس سالاسىن سۋبسيديالاۋدى توقتاتۋ كوزدەلگەن. ول اۋىلداعى تەلەفون بايلانىسىنىڭ قىمباتتاۋىنا الىپ كەلۋى مۇمكىن. نۇرلان نىعماتۋليننىڭ پىكىرىنشە، بۇل اۋىل تۇرعىندارىنا قيىندىق تۋعىزادى. 

Abai.kz