ەكىنشىدەن. ءموراتوريدىڭ اياقتالۋىنا 1,5 جىل قالىپ وتىر، بۇنى ءبىز دە، بيلىك تە ءبىلىپ وتىرمىز. جاڭا زاڭدى دايىنداپ-قابىلداتۋ ءۇشىن ەڭ كەمى ءبىر جىل كەرەك بولادى. ودان باسقا الدىمىزدا پارلامەنتتىك سايلاۋ ناۋقانى بار، ول دا 2-3 اي ۋاقىت الادى.

مەنىڭ اقپاراتىم بويىنشا بۇگىنگى تاڭدا اشم جانە نپپ اتامەكەن جەر زاڭىنا ۇسىنىپ جاتقان جاڭا وزگەرىستەردى فەرمەرلەردىڭ اراسىندا تالقىعا سالىپ وتىر. مەنىڭ قولىما بۇنداي ءبىر قۇجات ءتۇسىپتى (جاريالاپ جاتىرمىن).

بۇنداي جاعدايدا "جەر قورعانى" قوزعالىسىنىڭ تالابى مىنانداي بولۋى كەرەك دەپ سانايمىن: "جاڭا جەر زاڭىن تالقىلاۋدى ءبىزدىڭ وكىلىسىز وتكىزۋگە بولمايدى!"

ءبىز بۇنداي تالاپتى قازىر قويماساق، جاڭا جەر زىڭنىڭ تالقىلاۋىنان تىس قالساق، مومىن بوپ بەيحابار وتىرىپ ەرتەڭ تاعى اياقاستى جاعدايدا تابىلۋىمىز ابدەن مۇمكىن. ول بىزگە كەرەك پە؟ جوق، ارينە!

البەتتە اشم جانە نپپ اتامەكەن ۇيىمى تالقىلاۋدى ۇيىمداستىرسا، جۇمىسشى توپتى قۇرىپ جاتسا مەن جانە باسقا بەلسەندىلەر وعان كىرىپ قاتىسۋىمىز كەرەك. ويتكەنى جەر دەگەن - تەك قانا فەرمەرلەردىڭ، ياعني جەرلەرى بارلاردىڭ، شارۋاسى ەمەس!

ولاردىڭ قولىندا جەر بار، جاقسى، ادال جۇمىس ىستەي بەرسىن، ىسكە ءسات دەيمىز! بىراق جەرلەرى جوقتاردىڭ مۇددەلەرىن كىم قورعايدى؟ باسقالارعا دا جەر كەرەك قوي! قانشاما قازاق جەرگە قول جەتكىزە الماي قينالىپ ءجۇر! استانادا جەرلەرى بارلاردىڭ لوببيلەرى وتە كۇشتى، ال جەرلەرى جوقتاردىڭ ءلوببيى مۇلدەم جوق! ماسەلە قايدا جاتىر.

سوندىقتان ءوز باسىم وسىندا جەرلەرى جوقتاردىڭ ء"لوببيسى" بولۋعا ءازىرمىن، يتاك تا بولىپ ءجۇرمىن! بىراق ەندى مەن رەسمي ستاتۋسپەن جۇمىس ىستەۋىم كەرەك. مەن جالعىز ەمەس ەكەنىمدى كورسىن مىنالار. جەردىڭ ماسەلەسى ءجون شەشۋى تەك ماعان عانا ەمەس، بارشا قازاققا كەرەك ەكەنىن ءتۇسىنسىن.

قاراپايىم اۋىلداعى قازاقتارعا دا جايىلىم، ەگىستىك جەرلەر كەرەك ەمەس پە؟ ال لاتيفۋنديستەردىڭ قانشاما بوستان بوسقا جاتقان جەرلەرى بار! نەگە سول بوس جاتقان جەرلەردى قينالىپ جۇرگەن اۋىلداعى جۇرتقا تاراتىپ بەرمەسكە؟ بار عوي بوس جاتقان جەرلەر، بار عوي، جوق ەمەس!

سوندىقتان جەر تۋرالى جاڭا زاڭنىڭ تالقىلاۋى اشىق ءوتۋى ءتيىس! بۇل زاڭعا ءبىز، "جەر قورعانى" قوزعالىسى، بەلسەندى ارالاسۋىمىز كەرەك! جەر تۋرالى زاڭعا قاۋىپتى نەمەسە حالىققا زياندى وزگەرىستەردى ەنگىزۋگە جول بەرمەيمىز! كەرىسىنشە حالىققا ءتيىمدى قىلىپ دايىنداپ بەرەمىز! جۇمىستى الەۋمەتتىك جەلىلەر ارقىلى اقىلداسىپ جۇرگىزەمىز.

بىرلىك بار جەردە تىرلىك تە، جەر دە بولادى، دوستار!

مۇحتار تايجاننىڭ الەۋمەتتىك جەلىدەگى جازباسى

Abai.kz