كومپانيانىڭ جۇمىسشىلارعا بەرەشەگى ونداعان ميلليون تەڭگە بولعان. جۇمىس بەرۋشى زەينەتاقى قورىنا اقشا اۋدارماعان، الەۋمەتتىك تولەم جاساماعان دەيدى جۇمىسشىلار. سونىڭ كەسىرىنەن ولار مەملەكەتتىڭ الەۋمەتتىك جاردەماقىسىن، نەسيە الا الماي وتىر.

"قىركۇيەك ايىنان بەرى ايلىق المادىق. كۇنى-ءتۇنى كەننەن شىقپاي جۇمىس ىستەدىك. مەنى قۇل رەتىندە پايدالاندى. ەندى جۇمىس جوق، دەنساۋلىق جوق، اقشا دا جوق. كارانتيندە باسقا جۇمىس تابا المايسىڭ. مەن ارتىق اقشا سۇرامايمىن، ەڭبەكاقىمدى تولەسىن. ابدەن شارشاعانىم سونشا، ءوز-ءوزىمدى ورتەپ جىبەرۋگە دايىنمىن. بۇلاي ءومىر سۇرۋگە بولمايدى", - دەدى "قازپوليمەتالل" كومپانياسىنىڭ بۇرىنعى جۇمىسشىسى داستان ساعىنتاەۆ.

كومپانيا جۇمىسشىلارى تەمىرتاۋ اكىمدىگىنە شاعىمداندى.

ء"بىز ولاردىڭ ارىزدارىن پروكۋراتۋرا مەن ەڭبەك ينسپەكتسياسى باسقارماسىنا جولدادىق. مەملەكەتتىك كىرىس دەپارتامەنتىنە حات جازىپ، ولاردىڭ 42 500 تەڭگە جاردەماقى الۋىنا كومەكتەسەمىز", - دەدى تەمىرتاۋ قالاسى اكىمىنىڭ ورىنباسارى ميراس قۇتتىباي.

قاراعاندى وبلىستىق ەڭبەك ينسپەكتسياسى جونىندەگى باسقارماسى جۇمىسشىلاردىڭ ارىزى تىركەلگەنىن، بىراق توتەنشە جاعداي كەزىندە ونى تەكسەرە الماي وتىرعانىن حابارلادى.

"دۇيسەنبى كۇنى "قازپوليمەتالل" التى ميلليون تەڭگە بەرەشەگىن تولەدى. ەندى 28 ميلليون تەڭگەسى قالدى. 279 جۇمىسشىنىڭ ايلىعى. كومپانيانىڭ جۇمىسشىلارعا قارىزى 74 ميلليون تەڭگە بولعان", - دەدى باسقارما جەتەكشىسى يرينا ليۋبارسكايا.

ازاتتىق ءتىلشىسى "قازپوليمەتالل" كومپانياسىنا حابارلاستى. كومپانيا باسشىلىعى ساۋالدارعا جاۋاپ بەرۋگە ۋادە بەردى، بىراق جاۋاپ ءالى تۇسكەن جوق.

Abai.kz