تىشقان جىلى. اقپان، ناۋرىز ايلارى، اسىققان ۋاقىت. التى قۇرلىققا اۋىز سالعان كوروناۆيرۋس... مازاسىز كۇندەر مەن ۇيقىسىز تۇندەردە كۇللى جاھان جۇرتى ىندەتتى تەجەۋ - ءبىر عانا مىندەت ءۇشىن جانكەشتى جاۋاپكەرشىلىكپەن جاپالى قىزمەت جاساۋدا. قالا، سوسىن دالادا كۇتپەگەن قاربالاستىق. توڭىرەكتىڭ ءتورت بۇرىشى ءبىر ءتۇرلى تىنىس-تىرشىلىك. سانادا سان ساقتىق، كوڭىلدە كوپ كۇدىك. كۇللى ەل مۇراتى سovid-19 دەپ ايدارلانعان ءتاجتاجالدى تەزدەپ جەڭۋ. ءبىر ەل - ءبىر ماقسات، باسقانىڭ ءبارى بەكەرشىلىك!...

قازاقستاندىق قارا التىننىڭ باعاسى، ءتول تەڭگەنىڭ تاعدىرى، كوك قاعازدىڭ كۇمبىر كۇيى ءبار-ءبارى دە حالىقتى ەش قىزىقتىرمايدى. باسپانا مەن جاڭا ءالىپبيدىڭ جىرى دا كوڭىلدەن كوشكەن. بايتال ەمەس، باس قايعى دەگەن وسى شىعار، كوپ ادام ۇيدە، كەي ادام تۇزدە. الايدا ءبارى بىرگە. تەك كۇنى جارىق، مۇڭسىز بولسا قارا نان مەن قاراسۋعا ءدان رازى. 

كارانتين مەرزىمى 15 ساۋىردەن 1 مامىرعا ۇزارتىلدى. تاعى دا تەرەزە الدىنداعى وقشاۋ ءومىر، ءبىر كۇدىك پەن ءبىر ءۇمىت... داتكە قۋات، 42 500تگ-ءى ايتساڭشى؟! سىندارلى ساتتەگى پرەزيدەنتىمىزدىڭ مالىمدەمەسى ءۇش ميلليون مومىن جانعا جۇبانىش بولعانى جاسىرىن ەمەس. الىس-جاقىنداعى بارعا قاناعات قوڭىر جۇرت ءبىر قۋانىپ-اق قالدى. اق حالاتتى ابزال جانداردىڭ تاعدىرىنا الاڭداعان پرەزيدەنت ولاردى دا ءۇش كوتەگورياعا ءبولىپ، اجەپتاۋىر ۇستەماقى تولەۋگە تاپسىرما بەردى. تەست جۇيەسىن ازىرلەگەن وتاندىق عالىمداردى قۇتتىقتادى.

تار زاماندا دا ەلدىكتىڭ مۇراتىن بيىك ۇستاعان جومارت مىنەزدى ۇلتتىڭ ۇرپاعىمىز-عوي، ەل ءىشىن جات ىندەت جايلاعاندا جۇرت جۇدىرىقتاي جۇمىلدى. ءبىر قولدىڭ سالاسىنداي، ءبىر رۋدىڭ بالاسىنداي «ءبىز بىرگەمىز» ەكەنىمىزگە كوز جەتتى. ءتۇرلى سەبەپتەرمەن وزگە ەلدەردە جۇرگەن سانسىز قازاقستان ازاماتتارىن ۇزدىكسىز ەۆاكۋاتسيالادى، ءجون-اق! ەسەسىنە وڭىرلەردە اتى جامان اۋرۋدىڭ ينفەكتسياسىن جۇقتىرعان ادام سانى ساعات سايىن ارتىپ، ۇلت دەنساۋلىعى سىنعا تۇسكەن ساتتە ەلباسى دا الاڭ كوڭىل ەلىنىڭ الدىنا شىقتى، سابىر مەن شىدامدىلىققا شاقىرىدى.

نەگىزىندە، جومارتتىڭ قولىن جوق بايلار، - قازاقستان مەملەكەتىنە جاراسپاس! 13,2 ملرد تەڭگەسى بار، مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «Biz Birgemiz» اكتسياسىنىڭ اياسىندا قورى قۇرىلدى. حالىقتىڭ الەۋمەتتىك ءالسىز ساناتىنا جاتاتىن مۇقتاج جاندارعا 50 مىڭ تەڭگەدەن 150 مىڭنان استام ازاماتقا اۋدارىلماق. بارەكەلدى، مەيىرىم سالتانات قۇرۋدا. زيالى قاۋىم مەن جاستار جاعى ول كىسىنىڭ «بىرلەسە بىلگەن ەل ءبارىن جەڭەدى» جازباسىن وقىدى، وڭاشادا ويلاندى. جاي بۇقارا بۇرىنعى كوشباسشى ەكس-پرەزيدەنتتى ەسكە الدى.

قالاي بولعاندا دا دارىگەرلەرگە مىڭ ءبىر العىس! بۇگىنگى تاڭدا مەملەكەت باسشىسى توقاەۆ ەل ىشىندەگى ىندەت جاعدايىن تىكەلەي ءوز باقىلاۋىنا العان، ءارى وعان قاتتى الاڭداۋلى. پرەزيدەنت ارينە حالىق جاعىندا. الايدا، ءبىزدىڭ بيلىك قاۋىپتى دەرتتىڭ الدىن الۋعا الەم ەلدەرىنىڭ ەڭ العاشقىلارىنىڭ ءبىرى بولىپ قامدانعانىمەن قىسقا مەرزىمدە 120 دارىگەر ينفەكسيا جۇقتىرىپ الدى. بۇگىنگى كۇنى ونىڭ سانى 327 ارتتى! رەسمي اقپارات كوزدەرى جالپى مەديتسينا قىزمەتكەرلەرىنىڭ اۋرۋ جۇقتىرۋ وقيعالارى رەسپۋبليكانىڭ 13 وڭىرىندە تىركەلىپ، جاڭا ۆيرۋسقا شالدىققان دارىگەرلەردىڭ ەڭ كوبى الماتى مەن نۇر-سۇلتاندا، كەيىننەن سولتۇستىك قازاقستان مەن اتىراۋ وبلىستارىندا بايقالعانىن باياندادى. قالايشا؟

ساياساتكەر ەرلان سايروۆتىڭ: بۇگىندە، ءبىزدىڭ دارىلەرلەر اۆتوماتقا قارسى كۇرەكپەن سوعىسىپ جۇرگەن جاۋىنگەرلەر تارىزدى–دەگەنى كىناسىز دارىگەرلەردىڭ دارمەنسىزدىگىن مەڭزەسە كەرەك. بۇل ءبىز ءۇشىن وتە وكىنىشتى، ءارى قورقىنىشتى جاعدايات! وبانىڭ ناعىز وشاعى بولعان يتاليا مەن قىتايدا بۇل كورسەتكىشتەر تىم از ەكەن. ال اق حالاتتىلاردىڭ سىرقاتتى جۇقتىرىپ جاتقانى ەل ءىشى دەنساۋلىق ساقتاۋ سالاسىنداعى جىلدارى بويى قوردالانىپ قالعان كۇرمەۋى كوپ  سۇراقتاردىڭ بەتىن اشىپ بەردى. نە كەرەك، ايلار بۇرىن ەل امان، جۇرت تىنىشتا جاسالعان قاۋىپسىزدىك دايىندىعىمىز قايىرسىز بولدى. بۇل سارىنداس پىكىردى بۇۇ باس حاتشىسى انتونيۋ گۋتەرريش تە ايتتى. ال، دۇنيەجۇزىلىك بانك وكىلى قازاقستاننىڭ جالپى ىشكى ءونىمى قىسقارىپ، ەلدەگى كەدەيشىلىك دەڭگەيى ارتادى - دەيدى. بىراق نە بولارىن ول بىلمەس، قۇداي بىلەر!

ەەە، كىمنەن قالماعان كوڭىل. سىن ساعاتتا «تسيفرلى قازاقستان» دا سىر بەردى. سان جەتپەس 141 ميلليارد تەڭگە شىنىمەن جەلگە ۇشقانى ما؟! ەندى 258,8 ميلليارد تا ۇستاعاننىڭ قولىندا، تىستەگەننىڭ اۋزىندا كەتە مە؟  مينيستر جۇماعاليەۆ تە، ۇكىمەت باسشىسى مامين دە كىنالى سياقتى كورىندى. انىعىندا، مەملەكت باسشىسى مەن حالىق سان سوعىپ، اعاش اتقا ءمىنىپ قالدى. دەي تۇرعانمەن ومىرىمىزگە ونلاين قاشىقتىقتان ءبىلىم بەرۋ جۇيەسى ەندى. جاڭالىق باستاۋ الدى. بۇل رەتتە زاماناۋي ءبىلىم بەرۋگە نەگىزدەلگەن “Budbeed” سىندى كوپ سالالى ونلاين فورماتتى جوبالار شىنىمەن دە قۇپتارلىق بەتبۇرىس بولماق. دەمەك، Covid-19 پاندەمياسى ەرتەڭگى كۇن قازاقستاننىڭ  تاريحي دامۋ بەلەسىندە وزەكتى سالالاردا ومىرشەڭ، تۇبەگەيلى وڭ وزگەرىستەر جاساۋعا مۇرىندىق بولارى بەك مۇمكىن. لايىم سولاي بولعاي!

بيىلعى كوكتەمگى ەگىس ناۋقانى كوروناۆيرۋستىڭ تارالۋىمەن تۇسپا-تۇس كەلدى. ديقاندارعا ەرلىك كورسەتۋ كەرەك-اق. جاۋ جاعادان العاندا ءبورى ەتەكتەن تارتار، سۋ تاسقىنى تاعى بار. الايدا، الماتىنىڭ جارقىراعان اسپانىن ويلاعاندا قول-اياعىڭدى كىسەندەگەن اس اتاسى نان جانە باسقانىڭ دا باعاسىن ءبىر ساتكە تارس ۇمىتاسىڭ. قالاي ايناداي تازارعان الماتى شاھارىن ءۇيدىڭ شاتىرىنان ەمەس، كوكتوبەدەن ءبىر كورۋ بۇگىندە اركىمگە ارمان! ءيا، توتەنشە جاعداي قيىن كەزەڭدە قىمباتشىلىقتىڭ قامىتىن كيگەن قاراپايىم حالىقتىڭ ارمانى كوپ، دارمەنى جوق. دەسە دە كەلەر كۇنەن ءۇمىتىمىز زور. ءبىز ۇيدەمىز، ءبىز بىرگەمىز،  ەسەن-امان ءبىر-بىرىمىزبەن جولىققانشا.

1 مىمىر... قاشان كەلەرسىڭ،  ازات ەركىن كۇن؟!

دۋمان امانۇلى

Abai.kz