بۇگىن ەلوردادا باس ءمۇفتي ناۋرىزباي قاجى تاعانۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ رامازان ايى قارساڭىندا ءداستۇرلى تورالقا ءماجىلىسى ءوتتى،- دەپ حابارلايدى قمبد.

ونلاين رەجيمدە وتكەن ماجىلىسكە نايب ءمۇفتي ەرشات وڭعاروۆ، قمدب اپپارات باسشىسى عىلىمبەك ماجيەۆ، عۇلامالار كەڭەسىنىڭ مۇشەلەرى، قمدب ءبولىم مەڭگەرۋشىلەرى مەن وبلىس جانە رەسپۋبليكالىق ماڭىزى بار قالالاردىڭ باس يمامدارى قاتىستى.

جيىندا قمدب شاريعات جانە ءپاتۋا ءبولىمى مەڭگەرۋشىسىنىڭ ورىنباسارى حاسان امانقۇلوۆ رامازان ايىندا بەرىلەتىن ءپىديا، ءپىتىر ساداقاسى مەن زەكەت مولشەرىن انىقتاۋدىڭ ماڭىزى جايىندا بايانداما جاسادى.

قمدب تورالقا ءماجىلىسىنىڭ شەشىمىمەن بيىل ءبىر ادام اتىنان بەرىلەتىن ءپىتىر ساداقا مولشەرى 370 تەڭگە دەپ بەكىتىلدى. ءپىتىر ساداقانىڭ قۇنى ۇننىڭ رەسپۋبليكا بويىنشا ەسەپتەگەندە نارىقتىق ورتاشا باعاسىمەن شىعارىلدى. ال ماتەريالدىق جاعدايى بار ازاماتتار ءپىتىر ساداقانى مەيىز نەمەسە قۇرما قۇنىمەن بەرگەنى ابزال.

ايتا كەتسەك، بيىل رامازان ايى 24 ساۋىردە باستالادى. بۇل تۋرالى باس ءمۇفتي ناۋرىزباي قاجى تاعانۇلى پرەزيدەنت جانىنداعى ورتالىق كوممۋنيكاتسيالار قىزمەتىندە تىكەلەي ەفيردە وتكەن بريفينگتە مالىمدەگەن بولاتىن.

Abai.kz