2019 جىلى ساۋد ارابياسى بيلىگى قاجىلىق ساپار ءۇشىن قازاقستانعا 3200 كۆوتا بولگەن ەكەن. ال ينتەرنەتتەگى اشىق دەرەككوزدەردىڭ مالىمەتىنە قاراعاندا وتكەن جىلى قازاقستاندىقتار قاجىلىق ساپارعا 5 ميلليارد تەڭگە جۇمساعان. 

جالپى قازاقستاندىقتاردى مەككە-مەدينەگە جەتكىزۋمەن تۋريستىك وپەراتورلار اينالىساتىنى بەلگىلى. ەلىمىزدە ارنايى قاجىلىق ساپاردى ۇيىمداستىراتىن 18 كومپانيا رەسمي تىركەۋدە كورىنەدى. ولاردىڭ قىزمەتتىك پاكەتتەرىنە كوبىنە «ەكونوم»، «ستاندارت»، «كومفورت» جانە «ليۋكس» پاكەتتەرى كىرەدى. ساپار شامامەن 15-25 كۇنگە ەسەپتەلگەن. قۇنى 3 مىڭنان 6 مىڭ دوللارعا دەيىن (1 ميلليوننان - 2,5 ميلليونعا دەيىن).

بۇل سوماعا، ياعني تۋرادىڭ باعاسىنا - بيلەت، قوناق ۇيدە تۇرۋ، تاماقتانۋ، قالا مەن ءال-حارام مەشىتىنە تاسىمالداۋ، العاشقى كومەك، جولسەرىك قىزمەتى جانە قاجىلىق جيىنتىعى (قاجىلىق كىتابى، جۇك جانە قول سومكەسى، اياق كيىمگە ارنالعان ريۋكزاكتار، گيد، قاجىلىق، فيرمالىق كوكىرەكشە) ت.ب. كىرەدى. كەيبىر كومپانيالار قوسىمشا فوتو، ۆيدەو وپەراتورىنىڭ قىزمەتتەرىن ۇسىنادى ەكەن.

2019 جىلى ساۋد ارابياسى بيلىگى قاجىلىق ساپار ءۇشىن قازاقستانعا بارلىعى 3200 كۆوتا بولگەن ەكەن. ەگەر قاجىلاردىڭ ارقايسىسى ساپارعا ورتا ەسەپپەن 1,5 ميلليون تەڭگە جۇمساعان بولسا، جالپى قازاقستاندىقتار مەككەگە شامامەن 4,8 ميلليارد تەڭگە (نەمەسە شامامەن 12,5 ميلليون دوللار) قالدىرادى.

ال، ۋمرا قاجىلىعىنىڭ (كىشى قاجىلىق) قۇنى ارزانداۋ. بۇل ساپارعا قاجىلار شامامەن 800-2000 دوللار (300-800 مىڭ تەڭگە) جۇمسايدى ەكەن. باعدارلاما 10 كۇنگە ەسەپتەلگەن.

تۋردىڭ باعاسىنا - ۆيزا الۋ، بورتتاعى تاماقپەن اۋە ساپارلارى، قوناقۇيدە تۇرۋ، ەكى مەزگىل تاماقتانۋ، مەشىتكە تاسىمالداۋ، گيد جانە قاسيەتتى جەرلەرگە ەكسكۋرسيا كىرەدى. ۇلكەن قاجىلىقتان ايىرماشىلىعى - ادام جىلدىڭ كەز كەلگەن ۋاقىتىندا بارا الادى.

قاجىلىق – مۇسىلماننىڭ بەس پارىزىنىڭ ءبىرى. بۇل زۋل-حيدجا كۇنتىزبەسىنىڭ 12-ءشى ايىنىڭ باسىندا بولادى. قاجىلىققا باراتىن ادامنىڭ اقىل-ەسى دۇرىس جانە دەنساۋلىعى مەن قارجىلىق مۇمكىندىگى بولۋى كەرەك. جانە، بۇل ساپارعا جۇمسالاتىن اقشانى تولىقتاي ادال جولمەن تابۋ قاجەتتىگى ايتىلادى.

بۇعان دەيىن قاجىلىققا 100 رەت بارعانى ءۇشىن دۇركىرەتىپ توي جاساعان امانگەلدى ەرەنعايىپۇلى الەۋمەتتىك جەلى قولدانۋشىلارىنىڭ سىنىنا قالعان ەدى. ول 2002 جىلدان باستاپ «نۇر قازاقستان» قاجىلىق كومپانياسىن باسقارىپ كەلەدى. ۇلكەن قاجىلىققا 22 رەت، كىشى قاجىلىققا 78 رەت بارعان.

ايتا كەتەيىك، بۇگىندە بۇكىل الەمگە تارالعان ىندەت سالدارىنان ساۋد ارابياسى قاجىلىق ساپاردى توقتاتقانىن مالىمدەگەن. سونداي-اق، ولار كوروناۆيرۋستىڭ تارالۋى جاعىنان قاۋىپتى ەلدەردەن كەلەتىندەرگە تۋريستىك ۆيزالار بەرۋدى دە ۋاقىتشا توقتاتقان.

Abai.kz