قىتايدىڭ قازاقستانداعى ەلشىسى چجان سياو جۋىردا جاريا بولعان "قازاقستان نەلىكتەن قىتايعا ورالۋدى اڭسايدى" اتتى اتىشۋلى ماقالاعا قاتىستى پىكىر ءبىلدىردى.
.
"مىناعان باسىمدىق بەرگىم كەلەدى. جۋىردا قىتايدىڭ تاۋەلسىز كونتەنتىندە جاريا بولعان ماقالا ەشبىر رەسمي ورىنداردىڭ كوزقاراسىن تانىتپايدى. الايدا، بۇل جاعداي قازىرگى تاڭدا عالامتوردىڭ جالعان، لاس، ءارى ارقيلى وسەك-اياڭ اقپاراتتارعا تولىپ كەتكەنىن ايشىقتاپ بەردى. سونداي-اق، ەكى ەلدىڭ قارىم-قاتىناسىنا كەرى ىقپالىن تيگىزەتىن مۇنداي ءدۇنيەلەردى جويۋدا قوس تاراپ تا بەلسەندى شارالار قابىلداۋ قاجەتتىگىن ۇقتىردى. مەن سونىمەن قاتار، قر ءسىم-ءنىڭ ءبىرىنشى ورىنباسارى شاحرات نۇرىشەۆ مىرزامەن كەزدەسۋ بارىسىندا، قازاقستان-قىتاي دوستاستىعىنىڭ عاسىردان-عاسىرعا جالعاستىعىنىڭ كەپىلى رەتىندە بىزگە تاريح وقۋلىقتارىنىڭ مازمۇنىنا ەرەكشە ءمان بەرۋ كەرەكتىگىن، ءسويتىپ جاس ۇرپاقتى تاريحتىڭ شىنايى كوزقاراسى نەگىزىندە تاربيەلەۋدىڭ اسا ماڭىزدى ەكەنىن ايتتىم"

بۇل ءۇزىندى قىتايدىڭ "گلوبال تايمس" گازەتى مەن پورتالىنىڭ قىتاي ەلشىسىمەن جۇرگىزگەن ەكسكليۋزيۆتى سۇحباتىنان الىنىپ، اۋدارىلدى.

بۇدان بولەك، قىتايدىڭ الەۋمەتتىك جەلىلەرىندە قازاقستاننىڭ اتالعان ماقالاعا وراي، قىتايعا نارازىلىق نوتاسىن جولداۋ ارەكەتىن سىنعا الدى.

"قازاقستان تۇيمەدەيدى تۇيەدەي ەتتى. بۇل اتالعان ەلدىڭ ديپلوماتياسىنىڭ جەتىلمەگەنىن بىلدىرەدى. جەكەلەگەن قولدانۋشىلاردىڭ پىكىرى تۇتاس ءبىر ەلدىڭ كوزقاراسىن تانىتپايدى. ينتەرنەت - اشىق پلاتفورما. سول سەبەپتى اركىمنىڭ اۋزىنا قاقپاق بولۋ مۇمكىن ەمەس. شەت ەلدەردە قىتايدى قارالاعان ماقالالار رەسمي سايتتاردىڭ باس بەتتەرىندە تولىپ تۇر. قازاقستاندا دا از ەمەس. سول سياقتى قازاقستانعا قارا كۇيە جاققان ماقالالار باتىستا دا بار. شاعىمشىل بولسا ولارعا نەگە قارسىلىق بىلدىرمەيدى؟" دەيدى نارازىلىق نوتاسىنا نارازىلىق تانىتقان ءبىر پورتالىندا. قىتايدىڭ بۇل جازباسى 510 مىڭنان اسا قارالىپ، كوپتەگەن پىكىرلەر جازىلعان.

وتكەن اپتادا قىتايدىك sohu.com سايتىندا جاريا بولعان "قازاقستان نەلىكتەن قىتايعا ورالۋدى اڭسايدى" ماقالاسى سايتتان الىندى.

سوڭعى ۋاقىتتا قىتاي ەلشىسىن شاقىرىپ نارازىلىقتارىن ءبىلدىرىپ جاتقاندار ەلدەر بار. مىسالى، جۋىردا قارالاردى رەنجىتتى دەپ افريكالىقتار دا شاعىم تۇسىرگەن.

رۋحىمىزعا قولسۇعۋشىلىق بولىپ جاتقاندا ەشكىمنىڭ دە بەي-جاي قاراپ وتىرا الماسى انىق. ۇلتارالىق ارازدىق تۋدىراتىن بۇل ماقالانى كىم جازسا دا، ول سول ءۇشىن ءتيىستى جازاسىن الۋى ءتيىس. قىتاي بيلىگى ءسوزىنىڭ دالەلى رەتىندە بۇل جاۋاپكەرشىلىكتى ءوز موينىنا الۋى كەرەك.

ال قازاقستاننىڭ بۇعان قاتىستى قىتاي بيلىگىنە نارازىلىق نوتاسىن جولداعانى دۇرىس، ءارى ءدال ۋاقىتىندا بولدى. بۇل جولى ءۇنسىز وتىرساق، كەلەشەكتە تاعى بىرەۋلەردىڭ قۇيتىرقى ارەكەت تانىتپاسىنا كىم كەپىل؟!

ەرتاي ءنۇسىپجانوۆتىڭ الەۋمەتتىك جەلىدەگى جازباسى

Abai.kz