قازاقستان رەسپۋبليكاسىنىڭ قارۋلى كۇشتەرى اۋە قورعانىسى كۇشتەرىنىڭ باس قولباسشىسى نۇرلان ورمانبەتوۆ قاراعاندى وبلىسىنداعى اسكەري ۇشاق اپاتىنا بايلانىستى ءمان-جايدى ءتۇسىندىردى.

«2020 جىلدىڭ 16 ساۋىرىندە ساعات 19.03 شاماسىندا ەكيپاجدى جاۋىنگەرلىك كەزەكشىلىككە دايارلاۋ بويىنشا جوسپارلى ۇشۋ ساپارىن ورىنداۋ بارىسىندا قاراعاندى قالاسىنداعى اەرودرومنىڭ وڭتۇستىگىنە قاراي قازاقستاننىڭ اۋە كۇشتەرىنە قاراستى ميگ-31 جويعىش ۇشاعى قۇلادى. ۇشاق ۇشقاننان كەيىن قوزعالتقىشتاردىڭ بىرىنەن ءورت شىققان. ەكيپاج تۇرعىلىقتى ەلدىمەكەنگە ۇشاقتى قۇلاتپاي، اشىق الاڭعا بۇرۋ امالىن قاراستىردى. بورتتا 2 ادام بولعان. ۇشقىشتار قۇرامىنىڭ دايارلىق دەڭگەيى جوسپارلى ۇشۋ تاپسىرماسىنىڭ تالابىنا ساي كەلگەن. جويعىش ۇشاقتى تاجىريبەلى اسكەري ۇشقىشتار باسقارعان»، - دەدى نۇرلان ورمانبەتوۆ وكق-دا ونلاين رەجيمدە وتكەن ءباسپاسوز ءماسليحاتىندا.

ونىڭ ايتۋىنشا ۇشاقتى باسقارعان پودپولكوۆنيك ارمان قۇرمانعاليەۆتىڭ اۋە ساپارى بويىنشا 900 ساعاتتىق تاجىريبەسى، ال پودپولكوۆنيك يۆان گاۆريلكونىڭ 1000 ساعاتقا جۋىق تاجىريبەسى بار.

«اۋە اپاتىنىڭ ورنىنا ءبىرىنشى بولىپ ىزدەۋ-قۇتقارۋ قىزمەتىنىڭ كەزەكشى تىكۇشاق پەن قازاقستاننىڭ اۋە كۇشتەرىنىڭ جەردە قۇتقارۋ كومانداسى كەلىپ جەتتى. ۇشقىشتارعا ءدال سول ورىندا العاشقى مەديتسينالىق كومەك كورسەتىلدى. وسىدان كەيىن ولار قاراعاندى وبلىستىق اۋرۋحاناسىنا جەتكىزىلدى. قازىرگى ۋاقىتتا ۇشقىشتارعا ءتيىستى مەديتسينالىق كومەك كورسەتىلدى. بىرەۋىنىڭ جاعدايى قاناعاتتانارلىق دەڭگەيدە بولسا، ەكىنشىسىنىڭ اۋىرلىعى ورتاشا. سونىمەن قاتار، قورعانىس ءمينيسترىنىڭ اتالعان اۆياتسيالىق وقيعانى زەرتتەۋ بويىنشا كوميسسيا قۇرىلدى. كوميسسيا جۇمىستى تەكسەرىپ، الدىن الۋ جۇمىستارىن جۇرگىزگەننەن كەيىن ميگ-31 جويعىش ۇشاقتارى قايتادان ۇشىرىلا باستايدى»، - دەدى ول.

ەسكە سالا كەتسەك كەشە قاراعاندى وبلىسىندا اسكەري ۇشاقتىڭ اپاتقا ۇشىراعانى تۋرالى حابارلاعان ەدىك. قۇلاعان ۇشاقتان ەكى سارباز زارداپ شەكتى.

دەرەككوز: قازاقپارات

Abai.kz