قر مەملەكەتتىك باس سانيتارلىق دارىگەرى ايجان ەسماعامبەتوۆا كارانتين – كوروناۆيرۋس ينفەكتسياسىنىڭ الدىن الۋدىڭ بىردەن-ءبىر جولى بولىپ قالا بەرەتىنىن ەسكە سالدى،- دەپ حابارلايدى قازاقپارات.

«حالىقتىڭ نازارىن مىنا جايتقا اۋدارعىم كەلەدى: ينفەكتسيانىڭ تارالۋ ورىسىنە تالداۋ جۇرگىزە وتىرىپ، كوروناۆيرۋس جۇقتىرعان ءبىر ادامنىڭ 80 ادامعا دەيىن جۇقتىرۋى مۇمكىن ەكەنىن ءبىلىپ وتىرمىز. كارانتين كەزىندە دە كورشىلەر ءبىر-بىرىمەن اڭگىمە-دۇكەن قۇرۋدى دوعارار ەمەس. ارتىنشا ءبىر-بىرىنە ۆيرۋس جۇقتىرادى. مۇنداي جاعدايلار دا بىزدە كەزدەستى. ورتاشا ەسەپپەن بىزدە كوروناۆيرۋس جۇقتىرعان 1 ادامعا بايلانىستا بولعان 30 ادامنان كەلەدى. قازىرگى تاڭدا جۇقتىرعان ادامداردىڭ 70 پايىزى اۋرۋ بەلگىسىن بايقاماي ءوتىپ كەتەتىنىن كورىپ وتىرمىز. دەمەك اۋرۋدىڭ قىلداي بەلگىسى جوق ساپ-ساۋ ادامنىڭ ءوزى باسقا ادامدار ءۇشىن ينفەكتسيا تاراتۋى مۇمكىن»، - دەدى ايجان ەسماعامبەتوۆا وكق-دا ونلاين رەجيمدە وتكەن ءباسپاسوز ءماسليحاتىندا.

مەملەكەتتىك باس سانيتارلىق دارىگەر وسى سەبەپتى كارانتين – كوروناۆيرۋس ينفەكتسياسىنىڭ الدىن الۋدىڭ بىردەن-ءبىر جولى بولىپ قالا بەرەتىنىن جەتكىزدى.

«ۇيدە بولىڭىزدار. اسا قاجەتتىلىك تۋىنداماسا سىرتقا شىقپاعان ابزال. ءتارتىپ قانشالىقتى ساقتاساق، سونشالىقتى جىلدام قالىپتى ومىرگە ورالامىز»، - دەدى ول.

ايجان ەسماعامبەتوۆادان ءباسپاسوز ءماسليحاتى بارىسىندا «كارانتين ءتارتىبى قازاقستاندا مامىر ايىنا دەيىن سوزىلا ما؟» دەگەن سۇراق قويىلدى. بۇل سۇراقتىڭ جاۋابىن دا باس مەملەكەتتىك سانيتارلىق دارىگەر جوعارىدا سويلەگەن سوزىنە ۇندەس جاۋاپ بەردى.

«قازاقستان پرەزيدەنتى جانىنداعى توتەنشە جاعداي رەجيمىن قامتاماسىز ەتۋ بويىنشا مەملەكەتتىك كوميسسيا تج رەجيمى 30 ساۋىرگە دەيىن ۇزارتقانىن بىلەسىزدەر. كارانتين ارى قاراي سوزىلا ما – ول وزىمىزگە بايلانىستى بولماق. كارانتين شارالارىن قانشالىقتى ساقتايمىز، ءوز-ءوزىمىزدى قانشالىقتى وقشاۋلاۋعا قاۋقارلىمىز، قانشالىقتى قوزعالىستى ازايتامىز – ءبارى وسى ماسەلەگە كەپ تىرەلەدى»، - دەدى ول.

Abai.kz