مەملەكەت باسشىسى قاسىم-جومارت توقاەۆ پراۆوسلاۆ حريستياندارىن پاسحا مەرەكەسىمەن قۇتتىقتادى.

«قۇرمەتتى وتانداستار!

ەلىمىزدىڭ پراۆوسلاۆ قاۋىمىن قاسيەتتى پاسحا مەرەكەسىمەن شىن جۇرەكتەن قۇتتىقتايمىن!

مەيىرىمدىلىك پەن جاناشىرلىققا ۇندەيتىن بۇل مەيرام قاستەرلى قۇندىلىقتاردى دارىپتەيدى.

حريستيان ءدىنىنىڭ يگىلىكتەرى ادامعا ىزگىلىك پەن قايىرىمدىلىق دارىتادى. پاسحا مەيرامى رۋحاني بىرلىكتى، شىنايى باۋىرلاستىقتى نىعايتۋعا جول اشادى.

بۇكىل الەم قاۋىپتى ىندەتپەن كۇرەسىپ جاتقان قازىرگىدەي كەزەڭدە بارلىق ءدىن وكىلدەرى ءۇشىن رۋحتىڭ بەرىكتىگى مەن ءوزارا ىنتىماقتاستىقتىڭ ماڭىزى زور.

حالقىمىز بەرەكە-بىرلىكتىڭ، پاراسات پەن ءتوزىمنىڭ ارقاسىندا كەز-كەلگەن قيىندىقتى ابىرويمەن ەڭسەرەدى دەپ سەنەمىن.

بارشا پراۆوسلاۆ حريستياندارىنا جانە وتانداستارىمىزعا مىقتى دەنساۋلىق، مول باقىت، تولاعاي تابىس تىلەيمىن!»، - دەلىنگەن قۇتتىقتاۋدا.

Abai.kz