تۇركىستان وبلىسىنىڭ اكىمدىگى 19 ساۋىردەن باستاپ وبلىس اۋماعىندا كارانتين ەنگىزىلگەنىن مالىمدەدى. 

وسىعان بايلانىستى كورشىلەس ايماقتارمەن شەكارادا سانيتاريالىق بلوك-بەكەتتەردىڭ جۇمىسى كۇشەيتىلەدى. قالاارالىق، اۋدانارالىق جانە اۋىلارالىق قولجەتىمدىك شەكتەلەدى، ال قوعامدىق جانە جەكە كولىك قىزمەتتەرى توقتالادى.

قوعامدىق ورىندار مەن دەمالىس ورىندارى، ساياباقتار جابىلدى.

ازىق-تۇلىك جانە كيىم نارىقتارىنىڭ جۇمىسى، سونداي-اق ءۇي تاۋارلارىن وتكىزۋ جۇمىستارى توقتايدى.

بالالاردىڭ ويىن الاڭدارىندا، كوپ قاباتتى ۇيلەردىڭ اۋلالارىندا ويناۋعا تىيىم سالىنادى.

وتباسى مەرەكەلەرىن، تۋعان كۇن جانە ۇيلەنۋ تويلارىن تۇرعىلىقتى جەرى بويىنشا وتكىزۋ شەكتەلەدى.

كوشەلەردە جانە قوعامدىق ورىنداردا ءۇش ادامنان ارتىق جينالۋعا تىيىم سالىنادى. 65 جاستان اسقان ازاماتتار ۇيدەن شىقپاي وقشاۋلانۋى ءتيىس.

تۇرعىندارعا قاجەتتى ازىق-تۇلىك پەن ءدارى-دارمەكتەردى ساتىپ الۋ ءۇشىن ولاردىڭ ۇيلەرىنىڭ جانىندا ورنالاسقان دۇكەندەر مەن ءدارىحانالاردا عانا جۇرۋگە رۇقسات ەتىلەدى. ازىق-تۇلىك دۇكەندەرىنىڭ جۇمىسى 09:00-دەن 20:00-گە دەيىن شەكتەلەدى.

وڭىرگە قاجەتتى تاماق ونىمدەرى مەن ماتەريالداردى، ونەركاسىپ تاۋارلارىن، قۇرىلىس، مەديتسينا جانە كوكتەمگى ەگىس جۇمىستارىنا ارنالعان ماتەريالداردى تاسىمالدايتىن رۇقسات قۇجاتتارى بار كولىك قۇرالدارى عانا كىرىپ-شىعا الادى. سونداي-اق مەديتسينالىق كومەككە مۇقتاج ازاماتتار كىرۋگە، شىعۋعا مۇمكىندىك بار.

قۇرىلىس يندۋسترياسى، كوكتەمگى ەگىس، جۇمىسپەن قامتۋدىڭ جول كارتاسى، تىرشىلىكتى قامتاماسىز ەتۋ وبەكتىلەرى كارانتيندىك رەجيمگە قاراماستان شتاتتىق رەجيمدە جۇمىس ىستەيتىن بولادى.

Abai.kz