قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن «ءتىل-قازىنا» ۇلتتىق عىلىمي-پراكتيكالىق ورتالىعى 2020 جىلدىڭ 1-18 ءساۋىر ارالىعىندا «قازاقى تەرميندەردى حالىق جاسايدى» رەسپۋبليكالىق بايقاۋىن وتكىزدى.

قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسىن ىسكە اسىرۋ، قازاق تىلىندەگى تەرميندەردىڭ ۇلەس سالماعىن ارتتىرۋعا ۇلەس قوسۋ ماقساتىندا ۇيىمداستىرىلعان بايقاۋعا 14 تالاپكەر قاتىستى.

بايقاۋعا قاتىسۋشىلار ءبىرىنشى كەزەڭدە (1-5 ءساۋىر ارالىعى) وزدەرى جاساعان 5-10 تەرميندى ۇسىندى. سايتتا، الەۋمەتتىك جەلىدە كوپشىلىكتىڭ داۋىس بەرۋى جانە قازىلار القاسىنىڭ شەشىمىمەن 5 بايقاۋ قاتىسۋشىسى كەلەسى كەزەڭگە ءوتتى. ەكىنشى اينالىمدا (7-12 ءساۋىر ارالىعى) قاتىسۋشىلارعا 10 شەتتىلدىك تەرميننىڭ قازاق تىلىندەگى ءساتتى اۋدارماسىن جاساۋ تاپسىرىلدى. بۇل كەزەڭ قورىتىندىسى بويىنشا سەرىك ەرعالي، نۇرلان شۇلەنوۆ، اقىلبەك شاياحمەت قورىتىندى كەزەڭگە جولداما الدى. ءۇشىنشى كەزەڭدە (13-18 ءساۋىر ارالىعى) قاتىسۋشىلار ءماتىن ىشىندەگى شەتتىلدىك سالالىق تەرميندەردىڭ قازاقشا بالاماسىن جاسادى.

بايقاۋ شارتىنا ساي قازىلار شەشىمىمەن 362 ۇپاي جيناعان اقىلبەك شاياحمەت ءىىى ورىنددى يەمدەدى. ال ءىى ورىندى 367 ۇپايمەن گۇرلان شۇلەنباەۆ ەنشىلەسە، ءى ورىنعا 370 ۇپاي العان سەرىك ەرعالي لايىق تانىلدى.

ونلاين ماراپاتتاۋ راسىمىنە قر مادەنيەت جانە سپورت مينيسترلىگىنىڭ ۆيتسە-ءمينيسترى ن.داۋەشوۆ قاتىسىپ، جەڭىمپازدارعا قۇتتىقتاۋىن جەتكىزدى.

- ەلىمىزدەگى توتەنشە جاعدايعا بايلانىستى ونلاين ۇيىمداستىرلىعان بۇل شارا دا وڭ ناتيجەسىن كورسەتتى. بايقاۋ قاتىسۋشىلارى تەرمين سوزدەردىڭ ماعىناسىنا ءۇڭىلىپ، ۇتىمدى ۇلتتىق اتاۋلار ۇسىنا ءبىلدى. تالاپكەرلەردىڭ تەرمين تابيعاتىن ءتۇسىنىپ، ءسوزجاسام، تەرمينجاسام تاسىلدەرىن دۇرىس پايدالانعاندىقتارىن ماماندار جاقسى باعالاۋدا. سوندىقتان وسىنداي ءبىلىم مەن بىلىكتىلىكتى قاجەت ەتەتىن بايقاۋعا قاتىسىپ، ۇزدىك ناتيجەگە جەتكەن جەڭىمپازداردى قۇتتىقتايمىن. الداعى ۋاقىتتا دا ۇلتتىق تەرمينقوردىڭ دامۋىنا ۇلەستەرىڭىزدى قوساتىندىقتارىڭىزعا سەنىمدىمىن، - دەدى ول.

شارا بارىسىندا بايقاۋدىڭ ەكىنشى كەزەڭىندە بەلسەندىلىك تانىتقان تالاپكەرلەرگە دە ءمينيستردىڭ ارنايى العىسحاتى تابىستالدى.

Abai.kz