قر ءبىلىم جانە عىلىم ۆيتسە-ءمينيسترى ميراس داۋلەنوۆ جوو رەكتورلارىمەن بىرگە قاشىقتان ءبىلىم بەرۋ جاعدايىندا ەمتيحاندار مەن ديپلومدىق جۇمىستاردى قورعاۋ قالاي وتەتىنىن ءتۇسىندىردى،-دەپ حابارلايدى مينيسترلىك سايتى.

ۆيتسە-مينيستر ميراس داۋلەنوۆ ەمتيحاندارعا قاتىستى ستۋدەنتتەردى ەكى ساناتقا ءبولۋ قاجەت ەكەنىن ايتتى، ولار - 1,2,3-كۋرس ستۋدەنتتەرى جانە بيىل وقۋىن ءتامامدايتىن تۇلەكتەر.

ستۋدەنتتەردىڭ ءبىرىنشى ساناتىنا قاتىستى قيىندىق جوق، ولار سەسسيالارىن تاپسىرادى. ونىڭ 3 جولى ۇسىنىلۋدا:

- ەمتيحاندى قاشىقتان تاپسىرۋ فورماتى;

- ءپان بويىنشا باعانى اعىمداعى باعالارىنىڭ نەگىزىندە قويۋ;

- «I» (Incomplete) باعاسىن قويۋ ارقىلى ەمتيحان تاپسىرۋ مەرزىمىن شەگەرۋ. بۇل ستۋدەنتتەرگە ەمتيحاندى كەيىن تاپسىرۋعا مۇمكىندىك بەرەدى جانە ولاردى وقۋدان شىعارۋدان قورعايدى.

ناقتى شەشىمدى ءاربىر جوو اكادەميالىق دەربەستىگى اياسىندا ءوزى قابىلدايدى.

بۇگىنگى كۇنى ستۋدەنتتەردىڭ قاشىقتان وقىتۋ فورماتىندا ورىنداعان جۇمىستارىنا 1,15 ملن. باعا قويىلعانىن اتاپ وتكەن ءجون.
ستۋدەنتتەردىڭ ەكىنشى ساناتى – سوڭعى كۋرس ستۋدەنتتەرى.

ەگەر كارانتيندىك شەكتەۋلەر الىنباسا، وندا ديپلومدىق جۇمىستار قاشىقتان قورعالادى. ايتا كەتەرلىگى، ستۋدەنتتەر ديپلومدىق جۇمىستارىن اقپان-ناۋرىز ايلارىندا الدىن-الا قورعاعان بولاتىن، ياعني نەگىزگى جۇمىس اتقارىلدى.

كەشەندى ەمتيحانعا كەلەتىن بولساق، مۇندا ءاربىر جوو ءۇش نۇسقانىڭ ءبىرىن قولدانادى:

- كەشەندى ەمتيحاندى قاشىقتان تاپسىرۋ فورماتىندا وتكىزۋ;

- جيىنتىق باعانى بازالىق پاندەر بويىنشا باعالارىنىڭ نەگىزىندە قويۋ;

- كەشەندى ەمتيحاندى كەشىرەك مەرزىمگە اۋىستىرۋ (جازعا نەمەسە كۇزگە).

وسىلايشا، جوو مينيسترلىك تاراپىنان رۇقسات الماي-اق، جيىنتىق باعانى بازالىق پاندەر بويىنشا باعالارىنىڭ نەگىزىندە قويۋ ارقىلى كەشەندى ەمتيحانداردى وتكىزبەۋ تۋرالى شەشىم قابىلداي الادى.

ەستەرىڭىزگە سالا كەتسەك، 2018 جىلى قازاقستاننىڭ جوعارى وقۋ ورىندارى اكادەميالىق دەربەستىك الدى، سوعان بايلانىستى جۇرگىزىلىپ جاتقان جۇمىستار زاڭناماعا تولىق سايكەس كەلەدى.

«ءبىز ەمتيحان تاپسىرۋ جانە ديپلومدىق جۇمىستاردى قورعاۋ الگوريتمىن تالقىلادىق. مجمبس-نا سايكەس، جوو-ى ەمتيحان وتكىزۋ تۇرلەرىن ءوز بەتىنشە انىقتايدى. دەگەنمەن، قاشىقتان وقىتۋ جاعدايىندا مينيسترلىك تاراپىنان ادىسنامالىق قولداۋ كورسەتۋ قاجەتتىلىگى تۋىندايدى. ول ءۇشىن ءبىز بارلىق جوعارى وقۋ ورىندارىمەن الدىن الا تالقىلانعان الگوريتمدى ازىرلەدىك»، - دەدى قر ءبىلىم جانە عىلىم ۆيتسە-ءمينيسترى ميراس داۋلەنوۆ.

بيىل 604 345 ستۋدەنت ەمتيحان تاپسىرادى، ونىڭ 142 435-ءى قورىتىندى اتتەستاتتاۋعا كىرىسەتىنىن اتاپ وتەمىز.

2020 جىلعى 16 ناۋرىزدان باستاپ ازاماتتىق جوو قاشىقتان وقىتۋعا كوشتى. دارىستەر مەن سەمينارلار MS Teams, Meet by Google Hangouts, Zoom جانە باسقا دا سەرۆيستەردىڭ كومەگىمەن ونلاين رەجيمىندە وتكىزىلىپ جاتىر، ال ستۋدەنتتەردىڭ تاپسىرمالارى Canvas, Moodle, Univer جانە Platonus پلاتفورمالارىندا ورىندالۋدا.

تىكەلەي ەفيرگە UIB ۋنيۆەرسيتەتىنىڭ پرەزيدەنتى دارحان احمەد-زاكي، نارحوز رەكتورى ەندريۋ ۆاحتەل، Yessenov University-ءنىڭ رەكتورى بەرىك احمەتوۆ، قازۇۋ وقۋ ءىسى جونىندەگى پرورەكتورى اسقار حيكمەتوۆ، الماتى قالاسىنداعى يۋنەسكو كلاستەرلىك بيۋروسىنىڭ ءبىلىم بەرۋ باعدارلاماسى بويىنشا ۇلتتىق مامانى مەيىرگۇل الپىسباەۆا، «اتامەكەن» ۇكپ باسقارما توراعاسىنىڭ ورىنباسارى ولجاس ورداباەۆ، «ADAL BILIM» جوبالىق كەڭسەسىنىڭ اكىمشىسى سەرگەي پەن جانە «قازاقستان ستۋدەنتەرىنىڭ اليانسى» رەسپۋبليكالىق ستۋدەنتتەر قوزعالىسىنىڭ پرەزيدەنتى ءىلياس تۇستىكباەۆ قاتىسىپ، ءتۇسىندىرۋ جۇمىستارىن جۇرگىزدى.

Abai.kz