قازاقستاننىڭ بارلىق وڭىرلەرىندە كوتەرمە-تاراتۋ ورتالىقتارىنىڭ جەلىسىن قۇرۋ جوسپارلانۋدا. ولاردىڭ قۇنى 237,5 ملرد تەڭگەنى قۇرايدى. بۇل تۋرالى ۇكىمەتتىڭ سەلەكتورلىق وتىرىسىندا ساۋدا جانە ينتەگراتسيا ءمينيسترى باقىت سۇلتانوۆ مالىمدەدى.

«جىل سايىن اقپاننان مامىرعا دەيىن، وتكەن جىلعى ەگىن قورى تاۋسىلىپ، كورشىلەس ەلدەردەن جاڭا ءونىم كەلە باستالعاندا، ءبىز باعانىڭ جوعارى قۇبىلمالىلىعىن بايقايمىز. بۇل، ءوز كەزەگىندە، ينفلياتسياعا تەرىس اسەر ەتەدى. ەلىمىزدە وندىرىلەتىن ازىق-تۇلىكتى دۇرىس ساقتاپ، وتكىزەتىن جۇيەنى قۇرۋ قاجەتتىلىگىنىڭ سەبەبى وندىرۋشىلەردىڭ كوپ شىعىنعا باتۋىمەن بايلانىستى»، - دەدى ب. سۇلتانوۆ. 

ءمينيستردىڭ ايتۋىنشا، تاۋارلاردى جەدەل جۇكتەۋگە مۇمكىندىك بەرەتىن زاماناۋي جۇك ءتۇسىرۋ (قازىر ونى «كروسس-دوك» دەپ اتايدى) جانە تەمپەراتۋرالىق قويمالاردىڭ جەتكىلىكسىزدىگى باعاعا تىكەلەي اسەرىن تيگىزەدى. جۇمىس ىستەپ تۇرعان بازارلاردا تاۋار اعىمىن باقىلايتىن اقپاراتتىق جۇيە جوق.

بۇل رەتتە، وندىرۋشىلەردىڭ سورەلەرگە قول جەتكىزۋ تەتىگى بۇرمالانعان باعاعا، ادىلەتسىز ساۋدا ۇستەمەسىنە جانە بەلگىلى كەزەڭدەردە باعالاردىڭ نەگىزسىز وسۋىنە نەگىز بولادى.

«قالالارىمىزدا كارانتين ەنگىزىلۋىنە بايلانىستى تۋىنداعان دۇربەلەڭ وسى ماسەلەلەردى كورسەتتى. اتالعان پروبلەمالاردى جەدەل جانە جۇيەلى شەشۋ ءۇشىن، كوتەرمە-تاراتۋ ورتالىقتارىنىڭ بىرىڭعاي كەشەنىن قۇرايتىن ۇلتتىق تاۋار وتكىزۋ جەلىسىن قۇرۋ ۇسىنىلادى. بۇل ەكوجۇيە ءوندىرۋشى مەن تۇتىنۋشىنى جاقىنداتاتىن جەكەلەگەن ەكونوميكالىق كلاستەر قۇراپ، سونداي-اق بىرىڭعاي تەتىكتى قۇراي وتىرىپ، رەسپۋبليكانىڭ ساۋدا ينفراقۇرىلىمىنا قوسىلادى»، — دەدى ب. سۇلتانوۆ. 

سۇلتانوۆتىڭ ايتۋىنشا، كوتەرمە-تاراتۋ ورتالىقتارىنىڭ قىزمەتى ءونىمدى ساقتاۋ مەن قايتا وڭدەۋدەن باستاپ تاراتۋ مەن وتكىزۋگە دەيىنگى مامانداندىرىلعان قىزمەتتەردى ۇسىناتىن بولادى. بۇل ينفراقۇرىلىم ءونىمدى جەتكىزۋدىڭ نەگىزگى باعىتتارى ءۇشىن ءتيىمدى كولىكتىك-لوگيستيكالىق ارنالاردى قۇرۋعا مۇمكىندىك بەرەدى. سونداي-اق ەۋرازيالىق ەكونوميكالىق وداق، ورتالىق ازيا جانە قىتايعا ەكسپورتتىق-يمپورتتىق وپەراتسيالار جۇزەگە اسىرىلاتىن بولادى، بۇل وتكىزۋ نارىعىن كەڭەيتەدى.

اۋىل شارۋاشىلىعى مينيسترلىگىنىڭ مالىمەتىنشە، ەلدەگى كوكونىس قويمالارىنىڭ تاپشىلىعى 70% قۇرايدى، ال كەيبىر ايماقتاردا بۇل كورسەتكىش 90% جەتەدى.

«جالپى العاندا، 2022 جىلعا قاراي قۋاتتىلىعى جىلىنا 4,8 ملن توننا كولەمدى قۇرايتىن تەتىكتى ازىرلەپ، ۇسىنىپ وتىرمىز. بۇل قۋات تاپشىلىعىن تولىق جابادى جانە الداعى ۋاقىتتا ەكسپورتتىق ەكسپانسياعا جاعداي جاسايدى. ءبىز اكىمدىكتەرمەن العاشقى ەكى كەزەڭ ءۇشىن جەر تەلىمدەرىن ءبولۋ ماسەلەسىن پىسىقتادىق. قالعان 15 نىسان بويىنشا قىسقا مەرزىمدە جۇمىس جۇرگىزىلەتىن بولادى»، —  دەدى  باقىت سۇلتانوۆ.

Abai.kz