حالىقارالىق Amnesty International (AI) ادام قۇقىعىن قورعاۋ ۇيىمىنىڭ 29 ساۋىردە جاريالانعان بايانداماسىندا وسىلاي دەپ ايتىلادى. زەرتتەۋ اۆتورلارى رەسەي مەن بۇرىنعى سسسر قۇرامىندا بولعان شىعىس ەۋروپا جانە ورتالىق ازيانىڭ بىرقاتار ەلدەرىندەگى جاعدايدى سارالاعان.

قۇقىق قورعاۋشىلاردىڭ پىكىرىنشە، كەيبىر مەملەكەتتەر مەن ايماقتا بيلىك پاندەميانى "ادام قۇقىعىن تاپتاۋ مۇمكىندىگى" رەتىندە قاراستىرادى. Amnesty International ساراپشىسىنىڭ پىكىرىنشە، قازاقستاندا "بيلىك تۇرعىندار دالاعا شىقپاۋى ءۇشىن كوپ قاباتتى ۇيلەردىڭ ەسىگىن دانەكەرلەيدى". ال شەشەنستاندا پوليتسەيلەر مەديتسينالىق ماسكا تاقپاعانى ءۇشىن ادامداردى ۇرىپ-سوعادى.

شىعىس ەۋروپا جانە ورتالىق ازيا ەلدەرىنىڭ بيلىگى ۇكىمەتكە باعىتتالعان سىندى تۇنشىقتىرۋ ءۇشىن تۇراقتى تۇردە رەپرەسسيۆتى امالدارعا جۇگىنەدى. باياندامادا الەۋمەتتىك جەلى قولدانۋشىلارى، جۋرناليستەر مەن مەديتسينا قىزمەتكەرلەرىن جاۋاپكەرشىلىككە تارتۋ وقيعالارى مىسال رەتىندە كەلتىرىلەدى. Amnesty International وكىلدەرىنىڭ ويىنشا، بيلىك ەپيدەميانىڭ شىنايى اۋقىمىن جاسىرىپ، مەديتسينانىڭ قوردالانعان ماسەلەلەرى تۋرالى مالىمەتتىڭ تاراۋىنا كەدەرگى كەلتىرۋ ءۇشىن جالعان اقپاراتپەن كۇرەس شارالارىن قولدانۋى مۇمكىن.

ۇيىمنىڭ ورتالىق ازيا جونىندەگى ساراپشىسى حيزەر ماكگيللدىڭ ايتۋىنشا، بيلىك "قوعام دەنساۋلىعىن قورعاۋدان گورى وزگەشە ويلايتىنداردى باسىپ-جانشۋعا" كوبىرەك مۇددەلى. ونىڭ پىكىرىنشە، ىندەت كەزىندە كەز كەلگەن قاتاڭ شارا ادام قۇقىعى سالاسىنداعى ستاندارتتارعا سايكەس بولۋى كەرەك.

Abai.kz