بۇگىن، 30 ءساۋىر - راقىمجان قوشقارباەۆ رەيحستاگقا تۋ تىككەن كۇن. 1945 جىلى 30 ساۋىردە لەيتەنانت راقىمجان قوشقارباەۆ جاۋىنگەر گريگوري بۋلاتوۆ ەكەۋى سوۆەت اسكەرى اراسىنان بەرليندەگى رەيحستاگقا ءبىرىنشى بولىپ جەڭىس تۋىن تىكتى. 

بىراق رەيحستاگقا جەڭىس تۋىن تىككەن راقىمجان قوشقارباەۆتىڭ ەرلىگى كوپ جىلدار بويى ەلەنبەي كەلدى. قازاق باتىرىنىڭ تاريحي ماڭىزعا يە اسا باعالى ەرلىگىن رەسمي ماسكەۋ باعالاعىسى كەلمەدى. گەرمان تورىنە جەڭىس تۋىن وزگە ۇلت باتىرى قادادى دەگەندى ايتقىلارى كەلمەدى.

قوشقارباەۆتى ماسكەۋ باعالاماسا دا، تۋعان ەلى توبەسىنە كوتەردى. باتىرعا تاۋەلسىزدىك العاننان كەيىن، 1999 جىلى مامىردىڭ 7-سىندە سول كەزدەگى پرەزيدەنت ن. نازارباەۆتىڭ جارلىعى بويىنشا قازاقستاننىڭ حالىق قاھارمانى اتاعى بەرىلدى.

ال رەسەيدىڭ اسكەري تاريح ينستيتۋتى 1-ءى بەلارۋس مايدانىنداعى 150-ءى اتقىشتار ديۆيزياسىنىڭ لەيتەنانتى راقىمجان قوشقارباەۆتىڭ جانە گريگوري بۋلاتوۆتىڭ 1945 جىلدىڭ 30 ساۋىرىندە رەيحستاگقا تۋ تىككەنى تۋرالى تاريحي وقيعانى 2007 جىلدىڭ 7 مامىرىندا رەسمي تۇردە راستادى.

قوشقارباەۆتىڭ وسىناۋ ەرلىگىن العاش بولىپ الەمگە ايگىلەگەن مەملەكەت قايراتكەرى، جازۋشى كاكىمجان قازىباەۆ بولاتىن. ول باۋىرجان مومىشۇلىنىڭ تاپسىرماسى بويىنشا راقىمجان قوشقارباەۆتىڭ ەرلىگى لايىقتى باعاسىن الۋى ءۇشىن كوپ ەڭبەكتەنىپ، كوپ ىزدەندى. قازاق جاۋىنگەرىنىڭ ءدال سول ساتتەگى ارەكەتىن دالەلدەيتىن جۇزدەن استام قۇجاتتى تاۋىپ، كوتەرىپ، شەتەلدىك باسىلىمداردا دا جاريالانۋىنا تۇرتكى بولدى.

راقىمجان قوشقارباەۆ اقمولا وبلىسىنىڭ تسەلينوگراد اۋدانىندا تۋعان. 1942 جىلى اسكەرگە الىنعان. دەرەكتەرگە قاراعاندا، 1944 جىلى قازان ايىنان باستاپ 1-بەلارۋس مايدانىنداعى يدريتسك اتقىشتار ديۆيزياسى قۇرامىندا 150-ءشى ۆزۆود باسقارىپ، پولشا جانە گەرمانيا جەرلەرىندەگى ۇرىستارعا قاتىسقان.

Abai.kz