زاڭ جوباسى تۋرالى بايانداما جاساعان اقپارات جانە قوعامدىق دامۋ ءمينيسترى داۋرەن اباەۆ "قاراما-قايشى پىكىر كوپ بولدى، سىن-ەسكەرتپەنىڭ ءبارى ەسكەرىلىپ، زاڭ جوباسىنا ايتارلىقتاي وزگەرىس ەنگىزىلدى" دەدى. زاڭ جوباسىنداعى بىرقاتار وزگەرىستەرگە توقتالعان مينيستر بۇرىن ازاماتتار ميتينگ وتكىزۋ ءۇشىن 15 كۇن بۇرىن رۇقسات سۇراسا، قازىر 5 كۇن بۇرىن ءوتىنىش بەرىپ ۇلگەرسە جەتكىلىكتى دەدى. ول سونىمەن بىرگە جاڭا زاڭ جوباسىنىڭ جەرگىلىكتى بيلىكتى ءوتىنىشتى 7 كۇن ىشىندە قاراپ، جاۋاپ بەرۋگە مىندەتتەيتىنىن ايتتى.
زاڭ جوباسى تۋرالى قوسىمشا بايانداما جاساعان سەنات دەپۋتاتى، كونستيتۋتسيالىق زاڭناما، سوت جۇيەسى جانە قۇقىق قورعاۋ كوميتەتىنىڭ مۇشەسى سارسەمباي ەڭسەگەنوۆ 1995 جىلى قابىلدانعان "بەيبىت جيىن تۋرالى" زاڭنىڭ حالىقارالىق قاۋىمداستىق جانە ازاماتتىق قوعام وكىلدەرى تاراپىنان سىنعا ۇشىراعانىن ايتىپ، جاڭا زاڭ جوباسى "ونداعى كەمشىلىكتەردى تۇزەۋگە باعىتتالعان" دەدى.
"زاڭ جوباسىنىڭ قولدانىستاعى زاڭمەن سالىستىرعاندا تۇجىرىمدامالىق تۇرعىدان دا، وسى سالادا تۋىندايتىن قاتىناستاردى رەتتەۋدىڭ قۇقىقتىق تەتىگى جونىندە دە كوپ ايىرماشىلىعى بار" دەدى سەنات دەپۋتاتى.
8 ساۋىردە بۇل زاڭ جوباسىن ءماجىلىس ماقۇلداعان بولاتىن.
بۇعان دەيىن ءتۇرلى حالىقارالىق ۇيىمدار قازاقستان بيلىگىنە پاندەميا ىندەتى كەزىندە ەلدىڭ قوعامدىق-ساياسي ومىرىندە ماڭىزى بار زاڭ جوباسىن قاراۋدى كەيىنگە قالدىرۋعا شاقىرعان بولاتىن. وتكەن اپتادا نورۆەگيالىق حەلسينكي كوميتەتى (Norwegian Helsinki Committee) جانە ەقىۇ ايماعىنداعى 24 قۇقىق قورعاۋ ۇيىمى "بيلىك زاڭ جوباسىن وتكىزۋ ءۇشىن پاندەميانى پايدالاندى" دەپ ايىپتاپ، پرەزيدەنت قاسىم-جومارت توقاەۆقا حات جولداعان.
حالىقارالىق Human Rights Watch (HRW) قۇقىق قورعاۋ ۇيىمى دا توتەنشە جاعداي كەزىندە حالىقتىڭ زاڭ جوباسىنا قاتىسۋ مۇمكىندىگى جوعىن ايتىپ، زاڭ جوباسىن تالقىلاۋدى كەيىنگە قالدىرۋعا شاقىرعان ەدى.
پرەزيدەنت قاسىم-جومارت توقاەۆ وتكەن جىلى ماۋسىم ايىنداعى سايلاۋدان كەيىن بەيبىت جيىن تۋرالى زاڭ قابىلداۋعا ۋادە بەرىپ، ميتينگ وتكىزۋ ءۇشىن ەسكەرتۋدى عانا تالاپ ەتەتىن قۇجات قابىلداۋعا ۋادە بەرگەن. بيىل اقپان ايىندا اقپارات جانە قوعامدىق دامۋ مينيسترلىگى بەيبىت جيىن تۋرالى زاڭ جوباسىن قوعامدىق تالقىلاۋعا شىعاردى. قۇجاتپەن تانىسىپ شىققان قۇقىق قورعاۋشىلار مەن بەلسەندىلەر قازىرگى زاڭ سياقتى ونداعى ەرەجەلەردىڭ حالىقارالىق ستاندارتقا سايكەس كەلمەيتىنىن ايتقان.
قۇجاتقا سايكەس، توقاەۆ ۋادە ەتكەن “ەسكەرتۋ سيپاتىنداعى” ميتينگىلەر قاتىسۋشىلار سانى 250-دەن اسپايتىن كىشىگىرىم جيىندارعا عانا قاتىستى. ال ءىرى ميتينگىلەر ءۇشىن بيلىكتەن رۇقسات الۋ كەرەك. قۇجاتتا سونىمەن بىرگە ميتينگىنى ارنايى بەلگىلەنگەن ورىنداردا عانا وتكىزۋ كەرەك دەگەن تالاپ بار جانە بەيبىت جيىن وتكىزۋ ءتارتىبىن بۇزعاندار بۇرىنعىدان قاتاڭىراق جازالانادى.
Abai.kz
