قۇرمەتتى وتانداستار!

بارشاڭىزدى قازاقستان حالقىنىڭ بىرلىگى كۇنىمەن قۇتتىقتايمىن!

بۇل مەرەكە قاسيەتتى جەرىمىزدى مەكەندەيتىن ءار ادام ءۇشىن اسا قىمبات.

ەگەمەن ەلىمىزدەگى بارلىق ەتنيكالىق توپ وكىلدەرى ءبىرتۇتاس قازاقستان حالقىن قۇرايدى. ءبىز دوستىق پەن ىنتىماقتىڭ، تاتۋلىق پەن تۇراقتىلىقتىڭ ارقاسىندا زور جەتىستىككە جەتتىك.

بەيبىتشىلىك پەن قوعامدىق كەلىسىم – باعا جەتپەس بايلىعىمىز. بۇل قۇندىلىقتار تۇڭعىش پرەزيدەنتىمىز – ەلباسى ن.ءا.نازارباەۆ نەگىزىن قالاعان جاڭا قازاقستاننىڭ ستراتەگيالىق باعىت-باعدارىنىڭ وزەگىنە اينالدى.

ءبىز ءبىر ەل، ءبىرتۇتاس حالىق بولىپ تاۋەلسىزدىگىمىزدى نىعايتتىق. حالىقارالىق قوعامداستىقتاعى ابىروي-بەدەلىمىزدى ارتتىردىق.

بيىلعى بىرلىك كۇنىنىڭ ءمان-ماڭىزى ەرەكشە. بۇگىندە قازاقستان بۇكىل الەمگە تاراعان كوروناۆيرۋس پاندەمياسىمەن كۇرەسۋدە. جاھاندىق ەكونوميكالىق داعدارىستىڭ سالدارىن حالقىمىز دا سەزىنىپ وتىر.

ءبىزدىڭ بىرلىگىمىز بەكەم، ماقساتىمىز ورتاق، رۋحىمىز اسقاق. سونىڭ ارقاسىندا كەز-كەلگەن قيىندىقتى جەڭىپ، جاسامپازدىق پەن ورلەۋ جولىندا جاڭا بەلەستەردى باعىندىرامىز دەپ سەنەمىن.

سىزدەرگە مىقتى دەنساۋلىق، باق-بەرەكە جانە تولايىم تابىس تىلەيمىن!

ءبىز بىرگەمىز!

Abai.kz