TAV Airports Holding تۇرىك حولدينگى حالىقارالىق الماتى اۋەجايى اكتسيالارىنىڭ ءجۇز پايىزىن ساتىپ الدى،- دەپ حابارلايدى Tengrinews.kz. مامىلە قۇنى 415 ميلليون دوللاردى قۇراعان. 

TAV اۋەجايلارىنىڭ كونسورتسيۋمداعى ۇلەسى كەم دەگەندە 75 پايىزدى قۇرايتىندىعى، ال اكتسيالاردى بەرۋ بارلىق زاڭدى پروتسەدۋرالار اياقتالعاننان كەيىن جۇزەگە اسىرىلاتىندىعى تۋرالى حابارلاندى.

الماتى اۋەجايى TAV اۋەجايلار حولدينگىندە  15-ءشى ورىن الادى.

«قازاقستان - گەوگرافيالىق جاعىنان دا، ەكونوميكالىق جاعىنان دا ايماقتاعى ەڭ ۇلكەن ەل. الماتى - بۇل ەلدىڭ ءىجو-ءنىڭ 20 پايىزىن قۇرايتىن ەڭ ءىرى قالا. سونىمەن قاتار، ول قىتايدى، ەۋروپانى جانە افريكانى بايلانىستىراتىن» زاماناۋي جىبەك جولىنىڭ «ورتالىعى بولىپ تابىلادى. ونىڭ الەۋەتى جاقسى جانە ءبىز ەندى ءوز بىلىمىمىزگە سۇيەنە وتىرىپ، ونى تولىعىمەن ىسكە اسىرۋ ءۇشىن جۇمىس ىستەيمىز »، - دەدى حولدينگتىڭ پرەزيدەنتى جانە باس ديرەكتورى ساني شەنەر.

اشىق اقپارات كوزدەرىنە سۇيەنسەك، الماتى حالىقارالىق اۋەجايىنىڭ 100 پايىز اكتسياسى Venus Airport Investment B.V.-گە تيەسىلى بولعان.

بۇعان دەيىن يندۋستريا جانە ينفراقۇرىلىمدى دامىتۋ ءمينيسترى بەيبىت اتامقۇلوۆ الماتى اۋەجايىن تۇرىك كومپانياسىنا ساتۋ جوسپارلارى تۋرالى ايتقان بولاتىن.

«مەنشىك ءتۇرىنىڭ وزگەرگەنىمەن اۋەجاي قىزمەتتەرىندەگى باعا كوتەرىلمەيدى. ازاماتتىق اۆياتسيا كوميتەتى اۋەجايدىڭ وندىرىستىك قۋاتىن، جولاۋشىلارعا قىزمەت كورسەتۋ ساپاسى مەن ۇشۋ قاۋىپسىزدىگىن حالىقارالىق ستاندارتتارعا سايكەس ارتتىرۋدى جالعاستىرادى», - دەدى ااك ءباسپاسوز قىزمەتى.

سونداي-اق، ولار اۋەجاي تەرمينالىن كەڭەيتۋگە 270 ميلليارد تەڭگە جۇمساۋدى جوسپارلاعانى بەلگىلى بولدى.

ەسكە سالايىق، TAV اۋەجايلارى حولدينگى 1997 جىلى تەپە جانە اكفەن كومپانيالار توبىمەن قۇرىلدى. نەگىزگى قىزمەتى ستامبۋل اتاتۇرىك اۋەجايىن، ەسەنبوگ حالىقارالىق اۋەجايىن (انكارا), ادنان مەندەرەس (يزمير), گازيپاشا-انتاليا، تۇركياداعى ميلاس-بودرۋم اۋەجايلارىنداعى حالىقارالىق تەرمينالداردى باسقارۋ.

كومپانيا سونىمەن قاتار تبيليسي اۋەجايىن، باتۋمي اۋەجايىن، تۋنيستەگى حابيب بۋرجۋيب موناستير اۋەجايىن، ساۋد ارابياسىنداعى مەدينا جانە حورۆاتياداعى زاگرەب اۋەجايلارىن باسقارادى.

2018 جىلى كومپانيا 152 ميلليون جولاۋشىعا جانە شامامەن 1 ميلليون رەيسكە قىزمەت كورسەتتى.

Abai.kz