بۇگىنگى الەۋمەتتىك جەلىنىڭ «قاھارمانى» – الىشەر اكا ۋسمانوۆ بولىپ تۇر. ورىستا ءجۇرىپ كاسىپ قىلعان وزبەك وليگارحى ماقتاارالداعى ءۇي-جايىن سۋ باسقان اعايىنعا كومەك بەرىپتى. «تۇركىستان» الەۋمەتتىك دامۋ كوپەراتيۆتىك قورىنىڭ شوتىنا 5 ميلليون 202 مىڭ دوللار اۋدارىپتى. بۇل اقشا ماقتاارالداعى 5202 ادام وتباسىنا تاراتىلىپ بەرىلەتىن كورىنەدى.

ۋسمانوۆتىڭ كومەگى - 5 ملن. 202 مىڭ دوللار

بۇل اقپاراتتى تۇركىستان وبلىسى اكىمدىگى تاراتقان. وندا: «رەسەي كاسىپكەرى الىشەر ۋسمانوۆ سۋ تاسقىنىنان زارداپ شەككەن ماقتاارال اۋدانىنىڭ ەۆاكۋاتسيالانعان 30420 تۇرعىنى ءۇشىن «تۇركىستان» الەۋمەتتىك دامۋ كورپوراتيۆتىك قورىنا 5 ملن. 202 مىڭ اقش دوللارىن اۋداردى. بۇل قاراجات ەۆاكۋاتسيالانعان 5202 وتباسىنىڭ جەكە شوتىنا تۇسەدى»، - دەپ جازىلعان.

ميرزيەەۆ: كومەك بەرۋگە ءازىرمىز

2 مامىردا قازاقستان مەن وزبەكستان پرەزيدەنتتەرى تەلەفون ارقىلى سويلەسىپ، ماقتاارالداعى احۋالدى تالقىلاعان. سوندا، وزبەك پرەزيدەنتى شاۆكات ميرزيەەۆ تۇركىستانداعى سۋ باسقان اۋىلداردى قالپىنا كەلتىرۋ ءۇشىن كومەك جىبەرەتىنىن ايتقان. بۇل اقپاراتتى اقوردا تاراتتى.

كەيىن، وزبەكتىڭ «podrobno.uz» دەيتىن سايتى ميرزيەەۆتىڭ ءسوزىن جاريالاپتى.

«ءبىز باۋىرلاس قازاق حالقىمەن ەجەلدەن ىرگەلەس تۇردىق. ءبىر وزەننەن سۋ ىشتىك. ءبىر تۋعان باۋىر بولدىق. ءبىز قۋانىشتا دا، سىناقتا دا ءبىر-بىرىمىزگە ارقا سۇيەپ، كومەكتەسىپ وتىردىق.

ەشكىم كۇتپەگەن بۇل تەحنوگەندىك اپات تەك ءبىزدىڭ عانا ەلدى مەكەندەرگە ەمەس، كورشى باۋىرلارىمىزعا دا شىعىن اكەلىپ وتىر. ارينە، وكىنىشتى جاعداي. ءبىز دە تابيعي اپاتتىڭ سالدارىن جويۋ ءۇشىن قازاقستاندىق باۋىرلارعا كەرەكتى كومەك بەرۋگە ءازىرمىز»، - دەپتى ميرزيەەۆ.

ال كەشە تۇركىستان وبلىسى اكىمدىگى وزبەكستاننان 100-گە جۋىق ارنايى تەحنيكا مەن 200-گە تارتا مامان كەلگەنىن حابارلادى. جاڭاعى 100-گە جۋىق تەحنيكانىڭ ىشىندە ءورت ءسوندىرۋشى كولىكتەر، ەكسكاۆاتورلار، تراكتورلار، سۋ سورعىز كولىكتەر، جۇك كولىكتەرى مەن اۆتوبۋستار بار ەكەن.

پرەزيدەنتتىڭ قۇداسى

سونىمەن، رەسەيدەگى ءداۋ قالتالى شوڭداردىڭ العاشقى وندىعىنا كىرەتىن وزبەك وليگارحى الىشەر ۋسمانوۆتىڭ كومەك قاراجاتى تەڭگەگە شاققاندا 2 ميلليارد تەڭگەدەن اسىپ جىعىلادى ەكەن.

الىشەر ۋسمانوۆ – وزبەك. رەسەيلىك كاسىپكەر. رەسەيدەگى ەڭ اۋقاتتى ادامداردىڭ تىزىمىندە 9 ورىندا. ونىڭ بايلىعى – 12,6 ميلليارد دوللار دەپ باعالانىپتى. «Forbes» دەرەگىنشە، الىشەر ۋسمانوۆ 2015-2019 جىلدارى ارالىعىندا قايىرىمدىلىققا – 1,3 ميلليارد دوللار جۇمساپتى. ونىڭ 400 ميلليونى وتكەن جىلى جاسالعان قايىرىمدىلىق.

وزبەكستان پرەزيدەنتى شاۆكات ميرزيەەۆپەن قۇدا ەكەن. «Forbes-تەگى» ءبىر سۇحباتىندا: «مەن بۇعان دەيىن دە تالاي رەت ايتقانمىن. مەن ءوزىمنىڭ وزبەك بولىپ تۋعانىمدى ماقتان تۇتامىن. ول مەنىڭ تۋعان جەرىم ەكەنىن ماقتان تۇتامىن. مەنەن وزبەكستانعا، ونىڭ باسشىلىعىنا قانداي كومەك كەرەك، كەز كەلگەن ۋاقىتتا كومەكتەسۋگە ءازىرمىن»، - دەپتى.

قوس بىردەي «دوستىق» وردەنى

ايتپاقشى، 2019 جىلدىڭ مامىرىندا ەكس-پرەزيدەنت نۇرسۇلتان نازارباەۆ الىشەر ۋسمانوۆقا I دارەجەلى «دوستىق» وردەنىن تاققان. ال 2011 جىلى وسى وردەننىڭ II دارەجەسىمەن ماراپاتتالعان ەكەن.

II دارەجەلى وردەن – «قوعامدىق كەلىسىمدى ساقتاۋعا سىڭىرگەن تاباندى ەڭبەگى مەن بەيبىتشىلىكتى نىعايتۋعا قوسقان ۇلەسى، حالىقتار اراسىنداعى دوستىق پەن بايلانىستى نىعايتۋعا قوسقان ۇلەسى ءۇشىن» بەرىلگەن.

I دارەجەلى وردەن – «مەملەكەتتىك جانە قوعامدىق قىزمەتتەگى ەڭبەگى، مەملەكەتىڭ مادەني دامۋىنا قوسقان ۇلەسى، حالىقتار اراسىنداعى دوستىق پەن بايلانىستى نىعايتۋعا قوسقان ۇلەسى ءۇشىن» بەرىلگەن.

راس، وزبەك وليگارحى قايىرىمدىلىق قىلدى دەپ شۋلاپ جاتىرمىز. شىنتۋايتىنا كەلگەندە ورىستاردىڭ ءوز ىشىندە الىشەر اكا ۋسمانوۆ تۋرالى پىكىر ءارتۇرلى. جۇرتتىڭ ءبارى بىردەي جاقتىرا بەرمەيتىن «پەرسونا». ول تۇسىنىكتى دە. ولار ءۇشىن ۋسمانوۆ – شەتتەن كەلگەن شۇرەگەي. دەسە دە، ونىڭ بۇل جولعى قايىرىمدىلىعى كوپتىڭ كوڭىلىنەن شىققانى وتىرىك ەمەس. ول اۋەلى ءوز ەلىنىڭ (وزبەكستاننىڭ) ابىرويى ءۇشىن جاسادى. «ۋسمانوۆتىڭ كومەگى - قازاق پەن وزبەكتىڭ اراسىن جاقىنداتا تۇسەدى»، دەپ جاتىر الەۋمەتتىك جەلىدەگى جۇرت.

تاعى دا الگى 50 بايدى ىزدەيمىز

ەل-جۇرتتىڭ اڭگىمە قىلىپ جاتقانى وزبەك بايىنىڭ قايىرىمدىلىعى. ال بىزدىكىلەر شە؟ بىزدە دە بار عوي... راس، بىزدىكىلەر جاڭاعى ۋسمانوۆپەن قالتا تەڭەستىرە المايتىن دا شىعار. بىراق، ەرەكشە اۋقاتتىلاردىڭ رەيتينگىسىنەن تۇسپەيتىن الگى 50 ءداۋىمىز دە تەسىك قالتا، جىرتىق كوڭىل، جارىم قۇرساق جاندار ەمەس-ءتى. ءتىپتى، ولاردىڭ يەلىگىندەگى دۇنيە-مۇلىكتى قاراساڭىز – قازاقتاعى قازبا-بايلىق حالىقتان بۇرىن وسى ءبىر از عانا توپتىڭ يگىلىگىنە جۇمسالىپتى-اۋ، دەگەن ويعا قالاسىز.

ءجا، سونىمەن بىزدىكىلەر نە بەرىپ جاتىر؟

بۇگىن عانا ءبىر اقپارات شىقتى. «بولات وتەمۇراتوۆ» قورى ماقتاارالداعى اعايىنعا ءۇي سالۋ ءۇشىن 6 ميلليون دوللار اۋدارىپتى. شامامەن 2,5 ميلليارد تەڭگە. بۇل اقشاعا ماقتاارالعا 150 ءۇي سالىنادى ەكەن. سالىنعاندا دا، مىرزاكەنتتىڭ ورتالىعىنان جاڭا ىقشاماۋدان بوي كوتەرمەك كورىنەدى. وعان قىزىلسۋدىڭ قۇرساۋىندا قالعان دوستىق، جاڭاتۇرمىس، جەڭىس اۋىلدارىنىڭ تۇرعىندارى قونىستانادى-مىس.

ايتپاقشى، بولات وتەمۇراتوۆتىڭ 6 ميلليون دوللارلىق قايىرىمدىلىعى اقپاراتقا تاراسىمەن-اق، جەلىدەگى جۇرت: «ۋسمانوۆ پەن وتەمۇراتوۆتىڭ قايىرىمدىلىق جارىسى»، دەگەن ءسوز ايتا باستادى.

حوش! «Forbes» تىزىمىندەگى بوكەڭ، بولات وتەمۇراتوۆ قاراپ قالماپتى. ال وزگەلەرى شە؟ وتەمۇراتوۆتى ايتتىق. ءارى قاراي – ۆلاديمير كيم، تيمۋر قۇلىباەۆ، دينارا قۇلىباەۆا، ءادىلجان يبراگيموۆ، راشيد سارسەنوۆ، كەڭەس راقىشەۆ، عالىمجان ەسەنوۆ، باقىتبەك بايسەيتوۆ، نۇرلان سماعۇلوۆ. بۇلار قازاقستاندىق «Forbes-تاعى» العاشقى وندىق. بەسەۋىنىڭ داۋلەتى ميلليارد دوللارمەن، قالعان بەسەۋىنىكى ميلليون دوللارمەن ەسەپتەلەتىن داۋلەر.

ەندەشە، وتەمۇراتوۆتان وزگەلەرى نەگە تىنىش وتىر؟ الدە ولار سۋ باسقان اۋىلدارداعى ءۇيسىز-كۇيسىز قالعان حالىققا كومەك بەرۋ ءۇشىن «الدەكىمدەردەن» بۇيرىق كۇتىپ وتىر ما؟

Abai.kz