ەلىمىزدە ەنگىزىلگەن توتەنشە جاعداي رەجيمىنە بايلانىستى قازىر ماڭىزى بار جيىندار ونلاين فورماتقا اۋىسقان. بۇل تۇرعىدا قازاقستان مۇسىلماندارى ءدىني باسقارماسى دا اسا ماڭىزدى جيىنداردى كوپشىلىككە ونلاين جۇيەدە ۇسىنىپ كەلەدى.

ماسەلەن، كۇنى كەشە نۇر-سۇلتان قالاسىندا قازاقستان مۇسىلماندارى ءدىني باسقارماسىنىڭ توراعاسى ناۋرىزباي قاجى تاعانۇلىنىڭ توراعالىعىمەن رامازان ايى قارساڭىنداعى ءداستۇرلى تورالقا ءماجىلىسى ونلاين فورماتتا ءوتتى.

ونلاين جيىنعا قمدب اپپارات باسشىسى عىلىمبەك ماجيەۆ، نايب ءمۇفتي ەرشات وڭعاروۆ، عۇلامالار كەڭەسىنىڭ مۇشەلەرى، قمدب ءبولىم مەڭگەرۋشىلەرى مەن وبلىس جانە رەسپۋبليكالىق ماڭىزى بار قالالاردىڭ باس يمامدارى قاتىستى.

سونىمەن قاتار جيىنعا اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ تا قوسىلدى. ءوز كەزەگىندە ۆەدومستۆو وكىلى ەلىمىزدەگى توتەنشە جاعداي كەزىندە ءدىن قىزمەتكەرلەرىنىڭ ، حالىقتى بىرلىك پەن يماندىلىققا شاقىرۋ باعىتى بويىنشا اتقارىپ جاتقان جۇمىستارى، قايىرىمدىلىق، ونلاين ناسيحات ايتۋ بويىنشا ىستەلىپ جاتقان شارالارعا وڭ پىكىرىن ءبىلدىردى.

ودان بولەك، ۆيتسە-مينيستر قازاقستان مۇسىلماندارى ءدىني باسقارماسىنىڭ عۇلامالار كەڭەسى ازىرلەگەن زيراتتى زيارات ەتۋدىڭ ءتارتىبى، اس بەرۋ مادەنيەتى سەكىلدى بىرقاتار قۇجاتتاردىڭ قوعام ءۇشىن ماڭىزدى ەكەنىن ايتتى.

ونلاين جيىندا ءمۇفتياتتىڭ شاريعات جانە ءپاتۋا ءبولىمى مەڭگەرۋشىسىنىڭ ورىنباسارى حاسان امانقۇلوۆ رامازان ايىندا بەرىلەتىن ءپىديا، ءپىتىر ساداقاسى مەن زەكەت مولشەرىن انىقتاۋدىڭ ماڭىزى جايىندا باياندادى.

ال، قالا مەن وبلىس يمامدارى ناۋرىزباي قاجى تاعانۇلىمەن تىكەلەي ەفيردە سۇحباتتاسىپ، ورازاعا دايىندىق جۇمىستارى جايلى اڭگىمەلەستى. ونلاين ءماجىلىس سوڭىندا قمدب توراعاسى ناۋرىزباي قاجى تاعانۇلى ورتالىق اپپارات قىزمەتكەرلەرى مەن ءوڭىر باس يمامدارىنا ناقتى نۇسقامالار بەردى.

سونىمەن قاتار، نۇر-سۇلتان قالاسىندا ءمۇفتياتتىڭ باستاماسىمەن ورتا ازيا عۇلامالارىنىڭ جيىنى وتكەن بولاتىن. قازاقستان، قىرعىزستان، وزبەكستان مۇسىلماندارى ءدىني باسقارمالارىنىڭ جاۋاپتى وكىلدەرى قاتىسقان بۇل ءماجىلىس تە ونلاين فورماتتا بولدى.

ونلاين ماجىلىسكە قىرعىزستان مۇسىلماندارى ءدىني باسقارماسى عۇلامالار كەڭەسىنىڭ توراعاسى ابيبيللا كادىربەرديەۆ، ءپاتۋا ءبولىمى مەڭگەرۋشىسى راۆشان ەراتوۆ، وزبەكستان ءدىني باسقارماسى توراعاسىنىڭ ورىنباسارى حوميدجون يشماتبەكوۆ، ءباسپاسوز قىزمەتى ءبولىمىنىڭ مەڭگەرۋشىسى مۋحاممادايۋبحون حوميدوۆ، ءپاتۋا ءبولىمىنىڭ مەڭگەرۋشىسى عۋلومجون حولبوەۆ قاتىستى.

ال، ءمۇفتيات تاراپىنان اتالعان جيىنعا قمدب عۇلامالار كەڭەسىنىڭ مۇشەلەرى – شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربانۇلى، شاريعات جانە ءپاتۋا ءبولىمىنىڭ مەڭگەرۋشىسىنىڭ ورىنباسارى حاسان امانقۇل، حالال ونىمدەرىن ستاندارتتاۋ ءبولىمىنىڭ مەڭگەرۋشىسى سمايىل سەيىتبەك، ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ، باسپا جانە اۋدارما ءبولىمىنىڭ مەڭگەرۋشىسى مۇرات ابدىحالىق جانە شاريعات جانە ءپاتۋا ءبولىمىنىڭ مامانى مەدەت قۇرساقوۆ قاتىستى.

ماجىلىستە ءدىني باسقارما وكىلدەرى بيىلعى رامازان ايىندا اتقارىلاتىن جۇمىستار مەن كوروناۆيرۋس پاندەمياسىنا بايلانىستى ەنگىزىلگەن توتەنشە جاعداي كەزىندە ورازا ۇستاۋ، اۋىزاشار ۇيىمداستىرۋ، تاراۋىق نامازى،  پىتىر ساداقا مەن ءپىديا مولشەرىن ەسەپتەۋ، التىن جانە كۇمىستىڭ نيسابىن بەلگىلەۋ سياقتى بىرقاتار ماسەلەلەردى تالقىلادى.

مۇنداي ونلاين جيىن قازاقستان مۇسىلماندارى ءدىني باسقارماسىنىڭ وسكەمەن ايماعى وكىلدەرىمەن دە ءوتتى.

ونلاين-ماجىلىسكە اۋدان مەن قالا يمامدارى قاتىسىپ، توتەنشە جاعداي كەزىندەگى اتقارىلىپ جاتقان شارالار مەن رامازان ايىنا ازىرلىك ماسەلەلەرىن تالقىلاعان.

ءمۇفتياتتىڭ وسكەمەن ايماعى بويىنشا وكىل يمامى ەرمەك قاسبولاتۇلى كارانتين كەزىنە ءوتىپ وتىرعان جينالىستىڭ قانشالىقتى ماڭىزدى ەكەنىنە توقتالىپ، الداعى مىندەتتەرمەن تانىستىردى.

باس يمامنىڭ ايتۋىنشا، قازىرگى كەزدە جاماعاتتىڭ ساۋالدارىنا الەۋمەتتىك جەلىلەر ارقىلى جاۋاپ بەرۋ، ونلاين ۋاعىز سىندى ناسيحات جۇمىستارى جۇرگىزىلىپ جاتىر.

سونىمەن قاتار ول، رامازان ايىنا ازىرلىكتى پىسىقتاپ، يمامدارعا مەملەكەتتەن بەلگىلەنگەن توتەنشە جاعداي تالاپتارىن ساقتاي وتىرىپ، ءدىني ءىس-قىزمەتتى ۇيلەستىرۋدى قاجەتتىگىن ايتتى.

ال، باس ءمۇفتي وتكىزگەن ونلاين بريفينگ نەگىزىندە جامبىل وبلىسىنىڭ يمامدارى دا ونلاين ءماجىلىس وتكىزدى.

وبلىستىڭ جاڭادان سايلانعان باس يمامى بەيبىت الىپبەكۇلىنىڭ العاشقى جيىنىنا نايب يمامدار مەن قالا جانە اۋدان يمامدارى قاتىستى.

ءدىن وكىلدەرى اتالعان ونلاين-ماجىلىستە رامازان ايىن وتكىزۋ شارالارى تالقىلادى. ناقتىراق ايتساق،ايماق تۇرعىندارى ءۇشىن ورازا ايىنىڭ كەستەسى ەندى الەۋمەتتىك جەلىلەردە، سونداي-اق بۇكتەمە قاعاز تۇرىندە دە حالىققا قول جەتىمدى بولماق. ەلىمىزدە ەنگىزىلگەن تقتەنشە جاعدايعا بايلانىستى كوپشىلىككە ارنالعان اۋىزاشارلار جاساۋعا تىيىم سالىنادى. جانە، جاماعاتپەن وقىلاتىن نامازداردى اركىم ءوز ۇيىندە وقۋى ءتيىس.

سونىمەن قاتار، ونلاين-جيىندا يمامدار تاراپىنان ۇسىنىستار ايتىلىپ، ساۋالدار دا قويىلدى. تالاس اۋدانىنىڭ باس يمامى نۇرسۇلتان اليەۆتىڭ «اۋىزاشاردىڭ ورنىنىنا مەشىت اسحاناسىندا تاماق دايىنداپ، جاعدايى مۇشكىل وتباسىلارعا اۋىزاشار رەتىندە تاراتايىق» دەگەن ۇسىنىسىن باس يمام قولدادى. كارانتين ۋاقىتىندا قايىرىمدىلىق شارالارىن كوبىرەك ۇيىمداستىرىپ، مۇقتاجدارعا قولعابىس بولۋ ماسەلەسى جوسپارعا قويىلدى.

ءدىن ماماندارىنا بىرقاتار جاڭا تاپسىرمالار بەرىلىپ، ناقتى مىندەتتەر جۇكتەلدى.

سونىمەن قاتار، ەلىمىزدە ەنگىزىلگەن توتەنشە جاعداي رەجيمىنە بايلانىستى شىمكەنت ورتالىق مەشىتى جانىنداعى «وڭالتۋ» ءبولىمى مەن جانت مۇشەلەرىنىڭ كەزەكتى جينالىسى دا ونلاين تۇردە ءوتتى.

جيىنعا شىمكەنت قالاسىنىڭ باس يمامى باقتىباي بەيسەنباەۆ پەن قالالىق «ءدىني وڭالتۋ» ءبولىمىنىڭ جەتەكشىسى بەرىك ارىنوۆ جەتەكشىلىك ەتتى.

جيىننىڭ ماقساتى - جانت توبىنىڭ  «سovid-2019»   جۇقپالى ىندەتىنە بايلانىستى جاريا ەتىلگەن توتەنشە جاعداي كەزىندەگى جۇمىستار مەن الداعى قاسيەتتى رامازان ايىندا اتقارىلاتىن جۇمىستار مەن جوسپارلار تالقىلاۋ. سونىڭ ىشىندە ورتالىق مەشىت جانىنان اشىلعان «Call-Center» ورتالىعىنداعى سۇراق-جاۋاپ جۇمىستارىنىڭ ساپاسىن ارتتىرۋ، ۋاعىز-ناسيحات جۇمىستارىن الەۋمەتتىك جەلىلەر ارقىلى، «YouTube» كانالدارى  مەن «WhatsApp» جەلىلەرىنىڭ كومەگىمەن كوپشىلىكپەن بايلانىس جۇمىستارىن دامىتۋ قاجەتتىگى جايىلى ناقتى تاپسىرمالار بەرىلدى.

سونىمەن قاتار، ونلاين-ءماجىلىس بارىسىندا قازاقستان مۇسىلماندارى ءدىني باسقارماسىنىڭ «ءدىني وڭالتۋ» ءبولىمى تاراپىنا كەلگەن تاپسىرمالار كەڭىنەن تۇسىندىرىلگەن بولاتىن.

Abai.kz