سەناتتىڭ ءباسپاسوز قىزمەتىنىڭ حابارلاۋىنشا، بۇل ماسەلە سەناتورلار اراسىندا قىزۋ پىكىر-تالاس تۋدىردى.

"پىكىر-تالاستان سوڭ سەناتورلار وزبەكستان رەسپۋبليكاسىنىڭ ەاەو قۇرامىنا باقىلاۋشى مەملەكەت رەتىندە كىرۋ تۋرالى ۇسىنىستى ماقۇلدادى" دەلىنگەن سەنات حابارلاماسىندا.

ۇيىممەن ارىپتەستىكتى جاقتاۋشىلاردىڭ ايتۋىنشا، ەاەو-پەن بايلانىس سىرتقى ساۋدانى ارتتىرىپ، ەلدە ءىرى ينۆەستيتسيالىق جوبالاردى جۇزەگە اسىرۋعا مۇمكىندىك بەرەدى، سونىمەن بىرگە وزبەكستاننىڭ اۋىل شارۋاشىلىعى ونىمدەرىن ەاەو ەلدەرىنە كەدەنسىز ەكسپورتتاۋعا جول اشادى.

ۇسىنىسقا قارسى شىققانداردىڭ پىكىرىنشە، بۇل ۇيىمعا كىرگەن سوڭ وزبەكستاندا ەكونوميكانىڭ بىرقاتار سالاسىندا ءوندىرىس دەڭەيى تومەندەۋى مۇمكىن، جۇمىسسىزدىق كوبەيىپ، ينۆەستيتسيالىق بەلسەندىلىك پەن ونەركاسىپتى مودەرنيزاتسيالاۋ تەجەلەدى. بۇعان قوسا، سەناتورلار رەسپۋبليكانىڭ دۇنيەجۇزىلىك ساۋدا ۇيىمىنا كىرۋ ماسەلەسى دە ماڭىزدى ەكەنىن اتاپ ءوتتى.

ەسكە سالايىق، 28 ساۋىردە وزبەكستان پارلامەنتىنىڭ تومەنگى پالاتاسى رەسپۋبليكانىڭ ەاەو-نا باقىلاۋ مەملەكەت رەتىندە كىرۋ ۇسىنىسىن ماقۇلدادى. ەندى ۇسىنىستى پرەزيدەنت شاۆكات ميرزياەۆ جارلىعىمەن بەكىتۋى ءتيىس.

ەۋرازيالىق ەكونوميكالىق وداققا ارمەنيا، بەلارۋس، قازاقستان، قىرعىزستان جانە رەسەي مۇشە. مولدوۆا ەاەو-تا باقىلاۋشى مارتەبەسىنە يە.

Abai.kz