قازاقستاندا كوروناۆيرۋس ىندەتى العاش 13-ناۋرىزدا تىركەلدى. سول كۇنى قر دەنساۋلىق ساقتاۋ ءمينيسترى ەلجان ءبىرتانوۆ گەرمانيادان ۇشىپ كەلگەن ەكى ازاماتتىڭ ۆيرۋس جۇقتىرعانىن مالىمدەگەن بولاتىن. سودان بەرى ۆيرۋسپەن اۋىرعاندار سانى ارتقان.

Coronavirus2020.kz سايتىنىڭ بۇگىنگى دەرەگى بويىنشا ەلىمىزدە ىندەت جۇقتىرعاندار سانى 5279 ادامعا جەتكەن. 32 ادام قايتىس بولىپ، 2108 ادام جازىلىپ شىققان.

دارىگەرلەر ىندەتتى جەڭۋ ءۇشىن سايىن ايانباي تەر توگىپ كەلەدى. جالپى دارىگەرلەردىڭ ادام، قوعام ومىرىندەگى ورنىن پرەزيدەنت تە، ءبىرىنشى پرەزيدەنت تە، «مەن» دەگەن نەبىر ساياساتكەر دە، ءانشى-كۇيشى-بيشىلەر دە، اقىن-جازۋشىلار دا، ءبارى-ءبارى ايتىپ-اق جاتىر.

ءبىر عانا الماتى قالاسىندا كوروناۆيرۋسپەن كۇرەسكە 7823 مەديتسينا قىزمەتكەرى جۇمىلدىرىلعان ەكەن. ولاردىڭ قاتارىندا  الماتى قالاسى فتيزيوپۋلمونولوگيا ورتالىعىنىڭ ماماندارى دا بار. ورتالىق دارىگەرلەرى العاش ىندەت وشاعى بولعان ۋحان قالاسىنان كەلگەن قازاق ستۋدەنتتەرىنە كومەك كورسەتكەن.

ورتالىقتىڭ حيرۋرگ، فتيزيوپۋلمونولوگ مامانى ابزال مالباسكانوۆتىڭ ايتۋىنشا، مۇنداعى مامانداردىڭ بارلىعى ۆمرۋسپەن كۇرەسكە ەرىكتى تۇردە قالعان. بۇل تۋرالى الماتى ارناسىنىڭ «الماتىلىق دارىگەرلەر كوروناۆيرۋسپەن بەتپە-بەت» اتتى دەرەكتى فيلمىندە ايتىلدى.

ابزال مالباسكانوۆ، توراكالدى حيرۋرگ، فتيزيوپۋلمونولوگ الماتى قالاسىنىڭ «فتيزيوپۋلمونولوگيا ورتالىعى» ينفەكتسيالىق ءبولىمىنىڭ مەڭگەرۋشىسى:

- قاڭتار ايىنىڭ سوڭىندا سول كەزدەگى باس سانيتار جانداربەك بەكشين «قىتاي دەگەن ىرگەمىزدە تۇر. ىندەت بىزگە دە جەتەدى. دايىندىق جۇرگىزەيىك» دەپ دابىل قاعا باستادى. سوسىن، ءبىزدىڭ مەملەكەت ىندەتتىڭ وشاعى بولعان ۋحان قالاسىندا ءبىلىم الىپ جاتقان قازاقستاندىق ستۋدەنتتەردى ەۆاكۋاتسيالايمىز دەدى. ءبىز دە الدىن-الا جيىن بولىپ سول جاستارعا كومەك كورسەتۋگە قالعان ەرىكتىلەردىڭ ءبىرى بولدىق. ول جەردە ەشكىم-ەشكىمدى ماجبۇرلەگەن جوق. دارىگەرلەردىڭ كوبى ءوز ەركىمەن قالدى. ءسويتىپ، بارلىق دايىندىق جۇمىستارىن جۇرگىزدىك. بىزگە ينفەكتسيونيست ماماندار كەلىپ كومەكتەستى. 

اق حالاتتى ابزال جانداردىڭ مۇنداي ەڭبەگىن مەملەكەت باسشىسى دا جوعارى باعالايتىنىن ايتقان.

«كوروناۆيرۋستى انىقتاۋ، ناۋقاستاردى ەمدەۋ جانە ۆيرۋستىڭ ودان ءارى تارالماۋى ءۇشىن ايانباي ەڭبەك ەتىپ جاتقان دارىگەرلەرگە العىس ايتامىن. ۇكىمەت وسىنداي قىزمەتكەرلەرگە سىياقى بەرۋ شارالارىن قابىلدايدى»، - دەپ جازدى پرەزيدەنت Twitter جەلىسىندە.

ال، الەۋمەتتىك جەلى قولدانۋشىلارى دارىگەرلەردى قولداعان ءتۇرلى پىكىرلەر جازىپ جاتتى. ابزال مىرزانىڭ ايتۋىنشا، جەلىدەگى جۇرتتىڭ مۇنداي پىكىرلەرى دارىگەرلەرگە ۇلكەن قولداۋ بولعان.

ءيا، كوروناۆيرۋس ىندەتى اق حالاتتى ابزال جانداردىڭ ەڭبەگى ولشەۋسىز ەكەنىن دالەلدەپ بەردى. تەك، ولاردىڭ دا وتباسىمەن تەزىرەك قاۋىشۋى ءۇشىن ءار ادام ءوز دەنساۋلىعىنا جاۋاپكەرشىلىكپەن قاراۋى ءتيىس.

Abai.kz