12 مامىر – حالىقارالىق مەيىربيكەلەر كۇنى. مەرەكە كۇنى حالىققا ادال قىزمەت ەتىپ جۇرگەن اق حالاتتى ابزال جانداردىڭ ءومىرى مەن قىزمەتى جايلى سىر شەرتۋدى ءجون كوردىك. قالادا ەڭبەك ەتىپ جاتقان مەيىربيكەلەر سىندى ەلدىڭ تۇكپىر-تۇكپىرىندە حالىققا تاۋلىك بويى قىزمەت ەتۋگە ايانباي، ەلدىڭ مەديتسينا سالاسىنا ۇلەس قوسىپ جۇرگەن ماماندار وتە كوپ. بۇگىنگى مەرەكەگە وراي Strategy2050.kz ءتىلشىسى اقمولا وبلىسىنىڭ  ماقپال اۋىلىندا مەيىربيكە بولىپ ەڭبەك ەتىپ جۇرگەن ءاليا عابباسقىزىمەن اڭگىمەلەستى.

«اقمولا وبلىسىنىڭ ءبىرجان سال اۋدانىنا قاراستى قوعام اۋىلىندا 1969 جىلى دۇنيەگە كەلدىم. وتباسىمداعى سەگىز بالانىڭ كەنجەسىمىن. انام كولحوز كەزىندە ساۋىنشى بولىپ جۇمىس ىستەگەن 40 جىل ەڭبەك ءوتىلى بار ەڭبەك ارداگەرى ەدى. ال، اكەم اۋىلدىق جۇمىس كوميتەتىنىڭ توراعاسى، بريگادير، كەيىن پوشتا مەڭگەرۋشىسى بولدى. وسى سىندى باسقارۋ قىزمەتىندە ءجۇرىپ، كەيىن دەنساۋلىعى سىر بەرە  باستادى. جۇرەك اۋرۋى، كەيىن وعان وكپەسى قوسىلدى. سول كەزدەگى بالالىق ارمانىم دارىگەر بولىپ، اكەمدى ەمدەپ شىعارۋ ەدى. وسى ماقسات مەيىربيكە ماماندىعىن تاڭداۋعا نەگىز بولدى»، - دەدى ءا.حاسەنوۆا.

«كوكشەتاۋ قالاسىنداعى ۋچيليششەنى 1989 جىلى ءتامامدادىم. ەڭ العاش جۇمىس ىستەگەن ورنىم ستەپنياك قالاسىنداعى بالالار بولىمشەسى بولدى. ودان كەيىن بۇلاندى، قوعام اۋىلدارىندا دا جۇمىس ىستەپ كوردىم. ال 1995 جىلدان باستاپ تۇرمىس قۇرۋىما وراي ماقپال اۋىلىندا مەيىربيكەمىن»، - دەدى ءاليا عابباسقىزى.مەيىربيكە 31 جىل ءومىرىن وسى سالاعا ارناعان. 2018 جىلى جوعارى ساناتتى دارەجەنى كوكشەتاۋ قالاسىندا قورعاپ شىعادى.

«مەيىربيكە ءىسىنىڭ نەگىزگى ماقساتى ادام دەنساۋلىعىن قورعاۋ قاجەتتىگىن قاناعاتتاندىرۋعا نەگىزدەلەدى. سوندىقتان دا ەل ىشىندە ادامداردى، وتباسىلاردى، حالىقتى فيزيكالىق، پسيحيكالىق، الەۋمەتتىك پوتەنتسيالىن جۇزەگە اسىرۋعا ۇيرەتۋگە تىرىسامىن. ويتكەنى مەيىربيكە ءىسىنىڭ نەگىزگى فيلوسوفياسى ءومىردى، ادامنىڭ قۇقىعى مەن ابىرويىن سىيلاۋ، جەكە تۇلعا رەتىندە قاراستىرۋ بولىپ تابىلادى»، - دەيدى ول.

مەيىربيكە ءبىر سالادا ۇزاق جىلدار بويى قىزمەت ەتۋدىڭ سىرى وتباسى مۇشەلەرىنىڭ قولداۋ كورسەتكەنىندە دەپ ەسەپتەيدى.

«جولداسىم ەكەۋمىز ەكى بالا تاربيەلەپ وسىردىك. ۇلىم الماس بەن قىزىم اسەل بوي جەتتى. قىزىم ءبىر جىل بۇرىن تۇرمىس قۇرعان. ءوزىم دە اجە بولۋعا دايىندالىپ ءجۇرمىن. ۇرپاعىم ەشكىمنىڭ الا ءجىبىن اتتامايتىن، ادال جاندار بولىپ قالىپتاساتىنىنا كامىل سەنەمىن»، - دەيدى ول.

مەيىربيكەنىڭ ايتۋىنشا، اياقاستى جۇمىسقا شاقىرعان كەزدەرى ءبىر وتباسى بولىپ جۇمىلا ارەكەت جاسايدى.

«جۇمىس كەيدە قاۋىرت بولادى. كۇن-ءتۇن دەمەي جۇمىسقا شاقىرتىپ قالاتىن كەزدەر دە بارشىلىق. جولداسىم شاعىن مال شارۋاشىلىعىمەن اينالىسادى. ول ءۇي جانۋارلارىن باپتاعان سوڭ، ولاردىڭ جاعدايىن جاساعان سوڭ، مەنىڭ دە جۇمىسىما تۇسىنۋشىلىكپەن قارايدى. شاقىرتىپ قالسا، «تەزدەت»، «جىلدام جەت» دەپ ايتىپ وتىرادى. ۇلىم ۇيدە بولسا، كولىگىن ازىرلەپ، ساقاداي سايلانادى. وتباسىمنىڭ قولداۋى جاقسى»، - دەدى ول.

ماماننىڭ ايتۋىنشا، مەيىربيكە – دەنساۋلىق ساقتاۋ سالاسىنىڭ نەگىزگى قوزعالتقىش كۇشى. ول كوپ جىلدار بويى قاجىرلى ەڭبەكتىڭ قايىرى بولادى دەپ ەسەپتەيدى.

«تۇرعىندارعا مەديتسينالىق كومەك كورسەتۋدىڭ تيىمدىلىگى كوپ جاعدايدا مەيىربيكە جۇمىسىنا تىكەلەي بايلانىستى. ءوز اۋىلىمدا اتقارىپ جۇرگەن ەڭبەگىمدى باعالاپ، 2019 جىلى اۋدان اكىمى العىس حاتپەن ماراپپاتتادى. 2016 جىلى باس دارىگەردىڭ گراموتاسىنا يە بولعام»، - دەدى ءا.حاسەنوۆا.

سونىمەن قاتار، مەيىربيكە تج مەن كارانتين كەزىندە اۋىلدا اتقارىلعان شارالارعا توقتاپ ءوتتى.

«كوروناۆيرۋس وتە قاۋىپتى ىندەت. اۋىلدىق دەڭگەيدە ءبىراز جۇمىستار اتقارىپ جاتىرمىز. تۇرعىندارعا اقپاراتتىق ءتۇسىندىرۋ جۇمىستارىن جۇرگىزدىم. 2-3 ادام كارانتيندىك جاعدايدا ۇيلەرىندە وتىردى. 14 كۇن بويى سول تۇرعىنداردىڭ دەنساۋلىقتارىن قاداعالادىم. ىستىقتارىن ولشەپ، ەشقايدا شىقپاۋعا جاعداي جاساپ، جاردەمدەستىك»، - دەدى ءا.عابباسقىزى.مەيىربيكە حالىققا قىزمەت ەتكەن سايىن مەيىرلەنە تۇسەتىنىن جەتكىزدى.

حالىقارالىق دەڭگەيدە تويلاناتىن مەيىربيكەلەر كۇنىنىڭ تاريحىنا توقتاپ وتسەك. 1971 جىلى دۇنيەجۇزىلىك مەدبيكەلەر كەڭەسىنىڭ ۇيعارىمىمەن باستاۋ الىپ، سودان بەرى مەدبيكەلەر كۇنى دەپ اتالىپ كەلە جاتقان وسى كۇندى رەسمي مەرەكە رەتىندە اتاپ ءوتۋ بۇگىندە داستۇرگە اينالىپ وتىر.

12 مامىر – مەدبيكە ءىسىنىڭ نەگىزىن سالۋشى، اعىلشىن مەدبيكەسى فلورەنس نايتينگەيلدىڭ تۋعان كۇنى. فلورەنس نايتينگەيل قىرىم سوعىسى كەزىندە (1853-1856) تۇڭعىش بولىپ مەيىربيكەلەر قىزمەتىن ۇيىمداستىرعان.

سوندىقتان حالىقارالىق مەيىربيكەلەر كەڭەسى وسى داڭقتى ايەلدى ماڭگىلىك ەستە قالدىرۋ ماقساتىندا 12 مامىردى حالىقارالىق مەيىربيكەلەر كۇنى دەپ قابىلداپ، سول جىلدان بەرى وسى كۇن دەنساۋلىق ساقتاۋ سالاسىندا ەرەكشە مەرەكە رەتىندە تويلانىپ كەلەدى.

الەمنىڭ 141 ەلىنەن مەيىربيكەلەر جينالىپ «حالىقارالىق مەدبيكەلەر كەڭەسى» دەپ اتالاتىن قوعامدىق ۇيىم قۇرعاننان كەيىن 12 مامىر - دۇنيەجۇزىلىك مەيرام مارتەبەسىنە يە بولدى. قازاقستان تاۋەلسىزدىگىن العاننان كەيىن ءبىزدىڭ ەلىمىزدە دە 12 مامىر - مەيىربيكەلەر كۇنى بولىپ رەسمي تۇردە تىركەلدى.

دەرەككءوز: strategy2050.kz

Abai.kz