(سۋرەتتى تۇسىرگەن ج.قۇسپانوۆ)

بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ جالپى وتىرىسى ءوتتى. وندا دەپۋتاتتار ويىن بيزنەسىنە قاتىستى زاڭ جوباسىن I وقىلىمدا تالقىلاۋدا.

وسى زاڭ جوباسى بويىنشا دەپۋتاتتار كوپتەگەن ماڭىزدى تۇزەتۋلەر ەنگىزدى. ماسەلەن، جۇمىس توبى بارىسىندا جاڭا ءۇش ويىن ايماقتارىن اشۋ تۋرالى نورمالار الىپ تاستاۋ، ويىن بيزنەسىن ۇيىمداستىرۋشىلارعا زاڭ جوباسىندا كوزدەلگەن مىندەتتەردى ورىنداماعانى ءۇشىن اكىمشىلىك جاۋاپتىلىق بەلگىلەۋ جونىندە، سونداي-اق، جاقىن تۋىستارىنىڭ ءوتىنىشى بويىنشا سوتتىڭ قۇمار ويىنداردى جانە ءباس تىگۋدى تەرىس پايدالاناتىن ادامداردى ارەكەت قابىلەتى شەكتەۋلى دەپ تانۋعا قاتىستى ۇسىنىستار ەنگىزدى.

وسى ورايدا نۇرلان نىعماتۋلين:

-شىن مانىندە، يگرومانيا اۋرۋعا جاتاتىن نارسە. وعان ۇيرەنگەن ادام، ونى ءوز كۇشىمەن جەڭە المايدى. سوندىقتان، دەپۋتاتتار جاڭا نورما ەنگىزىپ وتىر. ول بويىنشا يگرومانياعا بەرىلگەن ازاماتتى ودان شىعارۋ ءۇشىن تۋىسقاندارى سوتقا بەرە الادى. بۇل قاجەتتى جانە ءتيىمدى نورما دەپ ەسەپتەيمىن، - دەدى.

تاعى ءبىر اتاپ وتەتىن جاعداي، زاڭ جوباسىندا وسى سالا قىزمەتىن رەتتەۋدىڭ جاڭا تاسىلدەرى ۇسىنىلعان.

ءماجىلىس توراعاسىنىڭ ايتۋىنشا، جاڭا زاڭ ەكونوميكالىق تۇرعىدان دا، مورالدىق-پسيحولوگيالىق جاعىنان دا ويىن بيزنەسى سالاسىنداعى باقىلاۋدى كۇشەيتەدى.

جالپى قۇجات ويىن بيزنەسى سالاسىنداعى زاڭنامانى جەتىلدىرۋگە جانە ءباس تىگۋگە قاتىسۋشىلاردىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە، سونداي-اق بۋكمەكەرلىك كەڭسەلەر مەن توتاليزاتورلاردىڭ قىزمەتىن باقىلاۋدىڭ تيىمدىلىگىن ارتتىرۋعا باعىتتالعان.

Abai.kz