«مەنىڭ تۇسىنىگىمدە، ەگەر ازامات 250-300 مىڭ تەڭگە (720 دوللارداي) تابىس تاپسا، ول 10 پايىز [سالىق] تولەۋگە مىندەتتى ەمەس. 7 پايىز تولەۋى مۇمكىن. ورتا تاپقا كەلەتىن بولساق، 2 ميلليون تەڭگەگە دەيىن تاباتىندار ءۇشىن 10 پايىز [سالىق] قالاتىن شىعار. ال 2 ميلليون تەڭگەدەن جوعارى تابىسى بارلار 10 پايىزدان جوعارى سالىق تولەگەنى دۇرىس سياقتى. شامامەن 13-15 پايىز. ونىڭ مەجەسىن ەندى [ۇكىمەتتەگى] كوميسسيا شەشەدى. بىراق سالىق 15 پايىزدان جوعارى بولمايدى» دەدى ول.

قازاقستاندا زاڭعا ساي جۇرت تابىسىنا قاراماي ايلىعىنىڭ ون پايىزىن سالىققا تولەيدى.

قازاقستان پرەزيدەنتى توقاەۆ 11 مامىردا مەملەكەتتىك كوميسسيا وتىرىسىندا «ادىلدىك ءۇشىن جەكە تابىس سالىعىنىڭ ۇدەمەلى شكالاسىن ەنگىزۋ كەرەگىن» ايتقان. بيلىك بۇل وزگەرىس «كونۆەرتپەن جالاقى تولەۋ ءىسىن» ازايتادى دەپ ۇمىتتەنەدى.

ەكونوميكا ءمينيسترىنىڭ ورىنباسارى مادي تاكيەۆ «تابىس سالىعىنىڭ ۇدەمەلى شكالاسىن ارنايى جۇمىس توبى انىقتايدى» دەپ مالىمدەدى.

«سالىق مولشەرى اشىق تالقىلانادى. جۇمىس ەندى باستالدى. تابىس كولەمى، سالىق شكالاسى ءالى انىقتالعان جوق. ونى قوعاممەن اقىلداسامىز. بارلىق شىنايى اقپارات جۇمىس توبىنان تارايدى، قالعانىنىڭ ءبارىن فەيك دەپ قابىلداۋ كەرەك» دەدى ول.

2007 جىلعا دەيىن قازاقستاندا ۇدەمەلى سالىق شكالاسى بولعان. كەيىن بۇل جۇيەنى جويىپ، بارىنە ورتاق سالىق مولشەرى بەلگىلەنگەن. ول كەزدە دە بيلىك «بۇل جۇيە جۇرتتىڭ جاسىرىن تابىسىن اشادى» دەپ مالىمدەگەن ەدى.

Abai.kz