2-مامىر كۇنى وزبەكستانداعى ساردوبا سۋ قويماسى جارىلىپ، وڭتۇستىكتەگى ماقتارال اۋدانىنىڭ بىرنەشە اۋىلىن سۋ باستى. ارادا التى كۇن وتكەندە زارداپ شەككەن ماقتارالدىقتارعا وزبەك وليگارحى الىشەر ۋسمانوۆ 5 ملن. 202 مىڭ دوللار اقشا اۋداردى.

ۋسمانوۆ بولگەن قاراجات جەلىدە ءبىراز تالقى بولدى. قوعامدىق پىكىردىڭ دەنى «وسىنداي سىن ساعاتتا قازاقتاعى ءداۋ قالتالى دوكەيلەر نەگە ءۇنسىز وتىر» دەگەن اۋاندا ءوربىدى. ارتىنشا، بولات وتەمۇراتوۆ قورى ماقتارالدىقتارعا 6 ميلليون دوللار اۋدارعانى تۋرالى اقپارات شىقتى.

الايدا، قازاقستاندا وتەمۇراتوۆتان وزگە Forbes تىزىمىنەن تۇسپەيتىن ەڭ داۋلەتتى 50 باي بار عوي. ەڭ باي ەلۋلىكتىڭ ءتىزىمىن باستاپ تۇرعان - ۆلاديمير كيم.

داۋلەتى 4,5 ملرد.دوللار دەپ ەسەپتەلەتىن «قازاقمىستىڭ» يەسى باسقا-باسقا ەمەس، ءدال سول زارداپ شەككەن ماقتارال اۋدانىنىڭ، وندا دا ءۇي-جايى قىزىلسۋدىڭ استىندا قالىپ، حالقى باس ساۋعالاپ بوسىپ كەتكەن مىرزاكەنت اۋىلىنىڭ تۋماسى ەكەن.

«Wikipedia-داعى» دەرەكتە: «ۆلاديمير كيم - 1960 جىلى قازان ايىندا ماقتارال اۋدانى، مىرزاكەنت اۋىلىندا دۇنيەگە كەلگەن»، دەپ كورسەتىلىپتى.

ول الماتىداعى پوليتەحنيكالىق ينستيتۋتىن قۇرىلىسشى-ينجەنەر ماماندىعى بويىنشا بىتىرگەن سوڭ، كومسومول ۇيىمدارىندا قىزمەت اتقارعان.

1995 جىلى «جەزكازگانتسۆەتمەت» اق باسقارۋشى ديرەكتورى جانە باس اتقارۋشى ديرەكتورى بولىپ تاعايىندالدى. 2000 جىلدىڭ جەلتوقسانىندا وسى كومپانيانىڭ ديرەكتورلار كەڭەسىنىڭ توراعاسى بولىپ سايلاندى.

ال، 2005 جىلى ول لوندون بيرجاسىنداعى ءوز اكتسيالارىن تىركەگەن العاشقى كومپانيا – «قازاقمىس» توبى ديرەكتورلار كەڭەسىنىڭ توراعاسى بولدى.

2017 جىلى باستالىپ، 2018 جىلى جالعاساتىن مىس باعاسىنىڭ ءوسۋى ول باسقاراتىن «KAZ Minerals PLC» كومپانياسىنا وڭ اسەر ەتتى. ماسەلەن، وتكەن جىلدىڭ ماۋسىم ايىنىڭ باسىندا كومپانيانىڭ لوندون قور بيرجاسىنداعى باعاسى 1076 پەنسكە جەتىپ، سوڭعى بەس جىلداعى ەڭ جوعارى كورسەتكىشكە يە بولعان. بۇل كەزدە كاسىپكەر «قازاقمىس كورپوراتسياسى» جشس-ءنىڭ 70%-ىنە يە بولعان.

ودان بولەك، كيم «Bank RBK» اق-نىڭ 99,60 پايىزىنا جانە «قازاقالتىن» اق-نىڭ 25%-ىنا يەلىك ەتەدى.

ۆلاديمير كيم 2019 جىلى «Forbes» رەيتينگى بويىنشا ءبىرىنشى رەت الەمدەگى ەڭ باي 500 ادامنىڭ قاتارىنا كىردى.

الەمدىك رەيتينگتە 766-ورىننان 424-ورىنعا كوتەرىلىپ، بايلىعى 1,4 ملرد. دوللارعا وسكەن. ال، 2019 جىلدىڭ ءبىرىنشى جارتى جىلدىعىندا «KAZ Minerals PLC» ونىمدەرىن ساتۋدان تۇسكەن كىرىس $1,052 ملرد. بولىپتى.

قازىرگى ۋاقتا كيمنىڭ جىلدىق تابىسى 4,5 ملرد. دوللاردى قۇرايدى ەكەن. ال، الەمدىك نارىقتا «قازاقمىستىڭ» قۇنى شامامەن 12 ميلليارد 700 ميلليون دوللارعا باعالاناتىن كورىنەدى.

سونداي-اق، ۆلاديمير سەرگەەۆيچ قازاقستانداعى ەڭ داۋلەتتى 50 كاسىپكەردىڭ تىزىمىندە 1-ءشى، ەڭ ىقپالدى 50 بايدىڭ قاتارىندا 2-ءشى ورىندا.

وسىنداي ءداۋ قالتالى دوكەي جىگىت تاسقىن سۋدان زارداپ شەككەن جەرلەستەرىنە كومەكتەسۋگە كەلگەندە ساراڭدىق تانىتقان سەكىلدى.  راس، وزبەك وليگارحى الىشەر ۋسمانوۆ سەكىلدى  ماقتاارالداعى 5 مىڭ ادامعا 1000 دوللاردان ۇلەستىرىپ بەرمەسە دە، ەكس-پرەزيدەنت قۇرعان قورعا قاراجات اۋدارىپتى.

نۇرسۇلتان نازارباەۆتىڭ باستاماسىمەن، كوروناۆيرۋسقا قارسى كۇرەس ماقساتىندا قۇرىلعان «Birgemiz» قورىنا 2 ميلليارد 220 ميلليون تەڭگە قارجى اۋدارعانى بەلگىلى بولدى. ول ءۇشىن ن. نازارباەۆ «قازاقمىس» كورپوراتسياسىنىڭ باسشىلىعىنا العىس تا ايتقان.

«Birgemiz» قورىنا ءبىراز قاراجات جينالدى. وسىناۋ قيىن كەزەڭدە مۇقتاجدارعا كومەك ۇيىمداستىرۋ ماقساتىمەن مەنىڭ قور قۇرۋ جونىندەگى باستامامدى قولداعانى ءۇشىن قازاقستاننىڭ بيزنەس قاۋىمداستىعىنا العىس ايتقىم كەلەدى. مەن «ERG» كومپانيالار توبىنىڭ باسشىلىعى ا.ماشكەۆيچكە، ا.يبراگيموۆقا، پ.شوديەۆكە، «قازاقمىس» كورپوراتسياسىنىڭ باسشىلىعى ۆ.كيمگە، و.نوۆاچۋككە، ە.وگايعا، سونداي-اق ت.قۇلىباەۆقا، ب.وتەمۇراتوۆقا، ر.سارسەنوۆكە، ا.كلەبانوۆقا، ع.ەسەنوۆكە، ا.راقىمباەۆقا، ا.بەلوۆيچكە، ق.بورانباەۆقا، ق.شارىپباەۆقا جانە تاعى دا باسقا ازاماتتارعا العىس بىلدىرەمىن»، - دەگەن ەدى نۇرسۇلتان ءابىشۇلى.

(سۋرەت oinet.kz سايتىنان الىندى)

ءتۇيىن. سونىمەن، ەلدەگى ەڭ باي ەلۋلىكتىڭ كوشىن باستاپ تۇرعان ۆلاديمير سەرگەەۆيچ كيم كەشەگى سۋ باسقان ماقتارالدىڭ تۋماسى ەكەنىن ايتتىق. الەمدەگى ەڭ باي 500 ادامنىڭ قاتارىنا كىرەتىنىن دە جازدىق.

وزبەكتە تۋىپ، ورىستا ءجۇرىپ بايىعان ميللياردەر ۋسمانوۆتىڭ قازاققا قىلعان قايىرىم ءىسىن وتكەندە كوردىك. راس، بىزدىكىلەر ۋسمانوۆتارمەن قالتا تەڭەستىرە المايتىن شىعار. دەسە دە، جوعارىداعى ەرەكشە اۋقاتتىلاردىڭ تىزىمىنەن تۇسپەيتىن ەلۋ بايدىڭ كوشىن باستاپ تۇرعان ۆلاديمير مىرزا كيم باسقا-باسقا ەمەس، ءوز جەرلەردەرىنە كەلگەندە «جىلانىپ» وتىر ما؟ ولاي دەپ توپشىلايتىنىمىز - ۆلاديمير كيم سۋ تاسقىنىنان زارداپ شەككەن اعايىنعا كومەكتەسىپتى دەگەن ەشبىر اقپارات تابا المادىق.  اسىرىپ، ارتىق قىلماسا دا، وتەمۇراتوۆ پەن ۋسمانوۆتار بەرگەن قارجىنى قايىرىمدىلىققا بەرگەننەن كيمنىڭ قالتاسى ورتايىپ قالماس ەدى-اۋ...

نۇربيكە بەكسۇلتانقىزى

Abai.kz