«بەيبىت جينالىستار تۋرالى زاڭ ءبىزدىڭ قوعامدا جيىندار مادەنيەتىن قالىپتاستىرادى»
قازاقستاننىڭ بەيبىت جينالىستار تۋرالى جاڭا زاڭ جوباسىن مودەرنيزاتسيالىق كۇنتارتىبى نەگىزىندە قاراستىرعان ءجون. مۇنداي پىكىردى قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ اعا عىلىمي قىزمەتكەرى سليامجار احمەتجاروۆ ءبىلدىردى.
«قازاقستاننىڭ بەيبىت جينالىستار تۋرالى جاڭا زاڭ جوباسىن مودەرنيزاتسيالىق كۇنتارتىبى نەگىزىندە قاراستىرعان ءجون. ساياسي ەكونوميكا سالاسىنداعى بەدەلدى عالىمداردىڭ ءبىرى ف.فۋكۋياما مودەرنيزاتسيا تەورياسىنىڭ ءۇش نەگىزگى قۇرىلىمىن كورسەتەدى – بۇل ەكونوميكالىق ءوسۋ، الەۋمەتتىك جۇمىلدىرۋ جانە ساياسي دامۋ. وسى ەلەمەنتتەردىڭ ارقايسىسى قوعامنىڭ «ءداستۇرلى» كۇيدەن «زاماناۋي» مودەلگە وزگەرۋى مەن اۋىسۋىندا نەگىزگى ءرول اتقارادى«، - دەدى ساراپشى.
ونىڭ اتاپ وتۋىنشە، قازاقستان كوپ جاعدايدا وڭتۇستىك ازيا ەلدەرىنىڭ جاڭعىرۋ جولىمەن ءجۇرىپ كەلەدى. جاپونيا، وڭتۇستىك كورەيا جانە تايۆانداعى XX عاسىردىڭ ەكىنشى جارتىسىندا ورىن العان قارقىندى ەكونوميكالىق ءوسىم ازاماتتىق قوزعالىستاردىڭ وسۋىنە جانە سوعان بايلانىستى ساياسي وزگەرىستەرگە سەبەپ بولدى. وسىعان ۇقساس ستسەناري قازاقستاندا بايقالادى. ياعني تاۋەلسىزدىك كەزەڭىندە يندۋستريالىق دامۋ باعدارلامالارى ارقىلى مەملەكەت تۇراقتى ەكونوميكالىق ءوسۋدى قامتاماسىز ەتتى. قازاقستاندىقتاردىڭ ءال-اۋقاتىن جاقسارتۋ ازاماتتاردىڭ ۇكىمەتپەن سۇحباتتاسۋعا جانە مەملەكەتتىك شەشىمدەر قابىلداۋ ۇدەرىسىنە قاتىسۋعا دەگەن سۇرانىسىنىڭ ارتۋىنا اكەلدى.
«وسى تۇرعىدا قازاقستانداعى بەيبىت جينالىستار تۋرالى جاڭا زاڭ جوباسى مەملەكەت باسشىسىنىڭ تاپسىرماسى بويىنشا ازىرلەنگەن ساياسي رەفورمالار توپتاماسىنا كىرەدى. وسىلايشا، قازاقستان قوعامدى جاڭعىرتۋدىڭ سوڭعى ساتىسىندا تۇر. بەيبىت جينالىستار تۋرالى زاڭ جوباسى ازاماتتاردىڭ الەۋمەتتىك جۇمىلدىرۋ جانە ءتۇرلى قوعامدىق-ساياسي ماسەلەلەر بويىنشا ءوز پىكىرلەرىن ءبىلدىرۋ مۇمكىندىكتەرىن كەڭەيتۋگە ارنالعان. سونىمەن قاتار، بەيبىت جينالىستارعا رۇقسات الۋدىڭ حابارلاندىرۋ سيپاتىنا ءوتۋى – بۇل قازاقستاندىق ساياسي جۇيەنى ىرىقتاندىرۋعا باعىتتالعان پروگرەسسيۆتى قادام»، - دەدى ول.
ساراپشى بەيبىت جينالىستار تۋرالى زاڭنىڭ قابىلدانۋى تۇپتەپ كەلگەندە قازاقستاندىق قوعامدا ميتينگىلەر، پيكەتتەر جانە دەمونستراتسيالار مادەنيەتىن قالىپتاستىراتىندىعىن ايتادى. «ءوز كەزەگىندە، ازاماتتاردىڭ
«كەرى بايلانىسى» مەملەكەتتىك ساياسات سالاسىنداعى ويلاستىرىلعان شەشىمدەردىڭ قابىلدانۋىنا ىقپال ەتەدى. بەيبىت جينالىستار تۋرالى زاڭعا تۇزەتۋلەر كەڭ اۋقىمدى كوزقاراس تۇرعىسىنان العاندا قازاقستاندىقتاردىڭ ازاماتتىق بولمىسىن نىعايتۋعا جانە قوعامنىڭ مەملەكەتتىك بيلىك جۇيەسىنە اسەرىن كۇشەيتۋگە مۇمكىندىك بەرەدى»، - دەدى سليامجار احمەتجاروۆ.
Abai.kz
