اقش COVID-19 جۇقتىرعاندار سانى جونىنەن الدا كەلەدى. قۇراما شتاتتاردا 1 ميلليون 400 مىڭ ادامنىڭ ۆيرۋس جۇقتىرعانى انىقتالعان. 85 مىڭنان استام ناۋقاس قايتىس بولعان.

كوروناۆيرۋس جۇقتىرعاندار سانى جونىنەن رەسەي ەكىنشى ورىندا تۇر. رەسمي مالىمەت بويىنشا، بۇل ەلدە 250 مىڭنان استام ادامنان COVID-19 انىقتالدى. ەكى مىڭنان استام ادام قايتىس بولدى.

ءۇشىنشى ورىندا – ۇلىبريتانيا. بۇل ەلدە 230 مىڭنان استام ادامنىڭ وسى اۋرۋ جۇقتىرعانى انىقتالدى. 33,5 مىڭنان استام ناۋقاس قايتىس بولدى.

The Financial Times جانە The New York Times گازەتتەرىنىڭ مالىمەتى بويىنشا، ماسكەۋ مەن سانكت-پەتەربۋرگ قالالارىندا كوروناۆيرۋسقا قاتىستى ستاتيستيكا رەسمي مالىمەتتەن 70 پايىز كوپ بولۋى مۇمكىن. رەسەيدىڭ سىرتقى ىستەر مينيسترلىگى بۇل اقپاراتتى جوققا شىعارۋىن تالاپ ەتتى.

كوروناۆيرۋستىڭ جاڭا ءتۇرى وتكەن جىلدىڭ سوڭىندا قىتايدا تارالدى. جۇقپالى اۋرۋ اقىرىنداپ الەمنىڭ باسقا دا ەلدەرىنە جايىلدى. اقش قىتايدى اۋرۋدىڭ قاۋىپتى ەكەنىن حابار بەرمەدى دەپ ايىپتاپ وتىر. پەكين بۇل ايىپتاۋلاردى جوققا شىعاردى.

Abai.kz