ساتۋشىلاردىڭ ايتۋىنشا، بازار اكىمشىلىگى الدىن الا ەكى ايدىڭ جالعا الۋ قۇنىن تولەۋدى تالاپ ەتىپ وتىر. الدىڭعى ايلاردا تابىسسىز قالعانىن ايتقان ساۋداگەرلەر مۇنداي اقشانى قايدان تابامىز دەيدى.

ء“بىز كارانتين جاريالانعانعا دەيىن 1,5 ايعا تولەگەنبىز، ونىڭ اقشاسى ءالى اقتالعان جوق. ەندى مامىر مەن ماۋسىمعا تولەپ كىرەسىڭدەر دەپ جاتىر. نەگە ءبىز الدىڭعىسىن اقتاماي جاتىپ، تاعى ەكى ايعا تولەۋىمىز كەرەك؟” دەدى اشىنعان ساۋداگەرلەر.

نارازى جۇرتتىڭ سوزىنە قاراعاندا شامامەن ەكى جارىم اي جابىق بولعان ساۋدا ورنى جاقىن ارادا اشىلۋى ءتيىس.

ولاردىڭ كوبى "تىم بولماعاندا بۋتيكتەگى تاۋارلارىمىزدى الۋعا رۇقسات بەرسىن، باسقا جاققا كەتەمىز" دەپ وتىر.

ساۋداگەرلەر بۇعان قوسا، بازارداعى بۋتيكتەردىڭ جالعا الۋ قۇنىنىڭ قىمباتتىعىنا شاعىمداندى. ولاردىڭ سوزىنە قاراعاندا، وزگە ساۋدا ورتالىقتارىندا بۋتيكتەردى جالعا الۋ قۇنى ءبىر شارشى مەترگە 4 مىڭ تەڭگەنى قۇراسا، مۇندا - 6900-7000 تەڭگە. جينالعاندار بازار اكىمشىلىگى "ساۋداگەرلەردىڭ پىكىر-ەسكەرتۋلەرىنە قۇلاق اسپايدى" دەپ تە شاعىمداندى.

بازار اكىمشىلىگىنەن ءبىر قىزمەتكەر شىعىپ، ساۋداگەرلەردى سابىرعا شاقىردى. الايدا نارازى ساتۋشىلار بازار باسشىلىعى كەلۋىن تالاپ ەتتى. ايتۋىنشا، ولار بۇعان دەيىن ەكى رەت جينالعانمەن بازار باسشىلىعى كەلمەگەن. بۇدان سوڭ بازار وكىلدەرى ءاربىر قاتاردان ءبىر ساتۋشىنى ىشكە كىرگىزىپ، ماسەلەنى تالقىلاۋعا شاقىردى. كەلىسسوزگە اقپارات قۇرالدارى ارەڭ كىرگىزىلدى.

وقيعانى پوليتسيا قىزمەتكەرلەرى باقىلاپ تۇر. مۇندا اكىمدىك، پروكۋراتۋرا وكىلدەرى دە بار. قازىر ساۋداگەرلەر مەن بازار اكىمشىلىگى اراسىندا كەلىسسوز ءجۇرىپ جاتىر.

Abai.kz