كۇنى كەشە عانا قر پارلامەنتى سەناتى «بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىن ءماجىلىستىڭ قاراۋىنا قايتا جىبەرگەنى اقپاراتتا جاريا بولدى. 

سەناتتىڭ اتالعان زاڭ جوباسىنا جاۋاپتى دەپۋتاتى سارسەنباي ەڭسەگەنوۆ ءوز بايانداماسىندا 6 باپقا بايلانىستى 16 ۇسىنىس ايتقان. ال دەپۋتاتتاردىڭ بارلىعى دەرلىك بۇل ۇسىنىستاردى قولداعان.

سونداي-اق، زاڭ جوباسىنىڭ قازاق تىلىندەگى ماتىنىنەن 422 قاتە جىبەرىلگەنى ايتىلدى.

بۇگىن زاڭ جوباسىن ازىرلەۋشى قر اقپارات جانە قوعامدىق دامۋ مينيسترلىگى «قر بەيبىت جينالىستاردى ۇيىمداستىرۋ مەن وتكىزۋ ءتارتىبى تۋرالى» جانە «قر كەيبىر زاڭنامالىق اكتىلەرىنە قازاقستان رەسپۋبليكاسىندا بەيبىت جينالىستاردى ۇيىمداستىرۋ مەن وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنىڭ قازاقشا ماتىنىندەگى گرامماتيكالىق قاتەلىكتەرگە قاتىستى تۇسىنىكتەمە بەرىپ، رەسمي جاۋاپ جولداپتى.

سونىمەن مينيسترلىك جاۋابى:

اقپارات جانە قوعامدىق دامۋ مينيسترلىگى بەيبىت جينالىستار تۋرالى زاڭ جوبالارىنىڭ ماتىنىندە كەزدەسەتىن قاتەلىكتەر تۋرالى تۇسىنىكتەمە بەرگىسى كەلەدى.

قازاقستان رەسپۋبليكاسىنىڭ «نورماتيۆتىك قۇقىقتىق اكتىلەر تۋرالى» زاڭىندا جانە زاڭ جوبالاۋ جۇمىسىن ۇيىمداستىرۋ قاعيدالارىندا زاڭ جوبالارىن ازىرلەۋ كەزىندە ساقتالاتىن ناقتى ەرەجەلەر قاراستىرىلعان.

مىندەتتى تالاپتاردىڭ ءبىرى - زاڭ جوبالارىن عىلىمي-لينگۆيستيكالىق ساراپتاۋ.

بۇل جاعدايلار بەيبىت جينالىستار تۋرالى زاڭ جوبالارىن ازىرلەۋ كەزىندە ەسكەرىلدى، زاڭ جوبالارىنىڭ ءماتىنى پارلامەنتتە تالقىلانۋعا دەيىن ەكى رەت قاجەتتى تەكسەرۋلەر مەن لينگۆيستيكالىق ساراپتامادان ءوتتى. عىلىمي-لينگۆيستيكالىق تەكسەرۋلەر ناتيجەلەرى بويىنشا بارلىق ەسكەرتۋلەر ەسكەرىلىپ، قاتەلەر تۇزەتىلدى.

زاڭ جوبالارى پارلامەنتكە ۇسىنىلعان كەزدە ولارعا ىلەسپە قۇجاتتار، ونىڭ ىشىندە عىلىمي-لينگۆيستيكالىق ساراپتاما قورىتىندىلارى قوسا بەرىلەدى.

انىقتالعان قاتەلىكتەر تۋرالى اقپارات بەيبىت جينالىستار تۋرالى زاڭ جوبالارىنىڭ باستاپقى نۇسقاسىنا قاتىستى، زاڭ جوبالارى پارلامەنتكە جىبەرىلگەنگە دەيىن بۇل قاتەلەر جويىلدى.

قر اقپارات جانە قوعامدىق دامۋ مينيسترلىگى

Abai.kz