بۇل جونىندە كوميتەت توراعاسى، پرەزيدەنتتىڭ وداقتاستارىنىڭ ءبىرى، رەسپۋبليكاشىل ليندسي گرەم مالىمدەدى.

ونىڭ سوزىنشە، كوميتەتتە ادىلەت مينيسترلىگىنىڭ جانە بۇرىنعى پرەزيدەنت باراك وباما تۇسىنداعى اق ءۇي شەنەۋنىكتەرىنىڭ ءىس-ارەكەتتەرى قارالادى.

ماسەلە، قۇپيا ەسەپتە ترامپتىڭ بۇرىنعى كەڭەسشىلەرى كارتەر پەيدج بەن گەنەرال مايكل ءفليننىڭ ىزىنە ءتۇسۋى جانە تەلەفون اڭگىمەلەرى تىڭدالعانى جايىندا ايتىلعان.

كوميتەت سونىمەن بىرگە روبەرت ميۋللەردىڭ ارنايى پروكۋرور رەتىندە تاعايىندالۋى قانشالىقتى زاڭعا سايكەس كەلەتىنىن دە زەرتتەمەك دەپ حابارلايدى "امەريكا داۋىسى".

بىراق سەناتوردىڭ ايتۋىنشا، بۇل ءىستى قايتا قاراۋ بارىسىندا بۇرىنعى پرەزيدەنت باراك وبامادان جاۋاپ الىنبايدى.

ترامپ "رەسەيلىك تەرگەۋ" ءىسى باستالعاندا، مۇنى ادەيى ۇيىمداستىرىپ وتىر دەپ دەموكراتتاردى ايىپتاعان.

ادىلەت مينيسترلىگى گەنەرال فليننگە تاعىلعان ايىپتاردىڭ الىنعانى جونىندە مالىمدەگەننەن كەيىن، ترامپ دەموكراتتارعا، اسىرەسە وبامانىڭ جەكە باسىنا قاتتى شۇيلىكتى. ونىڭ ويىنشا، دەموكراتتار، وبامانىڭ جاقتاستارى، 2016 جىلى پرەزيدەنت سايلاۋى كەزىندە ءوزىنىڭ پوزيتسياسىن السىرەتۋ ءۇشىن "رەسەيمەن بايلانىسى بار" دەگەن مالىمەتتى ادەيى ويلاپ تاپتى دەپ ەسەپتەيدى.

ترامپ تۆيتتەر پاراقشاسىنا گرەم سەناتقا وبامانى دا شاقىرۋى كەرەك دەپ جازدى. "ەگەر مەن سەناتور نە كونگرەسسمەن بولسام، ەڭ ءبىرىنشى، اقش تاريحىندا ساياسي قىلمىس جاساعان بۇرىنعى پرەزيدەنت وبامانى شاقىرار ەدىم. ول ءبارىن ءبىلدى... مەنىڭ ءوتىنىشىمدى ورىندا، ليندسي گرەم", - دەپ جازادى پرەزيدەنت.

"وسىعان دەيىن مەنى تەرگەدىڭىزدەر، ەندى سىزدەردى تەرگەۋ مەنىڭ كەزەگىم" - دەپ جازادى پرەزيدەنت تۆيتتەر پاراقشاسىنا.

Abai.kz