17 مامىر پرەزيدەنت توقاەۆتىڭ تۋعان كۇنى. 67 جاسقا تولادى. الەۋمەتتىك جەلىدە «توقاەۆتىڭ تۋعان كۇنىن قالاي تويلايدى» دەگەن اۋانداعى اڭگىمەلەر ايتىلا باستاعان. بۇگىن پرەزيدەنتتىڭ ءباسپاسوز حاتشىسى بەرىك ءۋالي Facebook جەلىسىندە توقاەۆتىڭ تۋعان كۇنىنە قاتىستى جازبا جاريالاپتى.

«سوڭعى كۇندەرى بىرقاتار اقپارات قۇرالدارىنىڭ وكىلدەرى «مەملەكەت باسشىسى تۋعان كۇنىن قالاي اتاپ وتەدى؟» دەگەن ساۋال جولداپ جاتىر.

بيىلعى 17 مامىر جەكسەنبى كۇنىنە سايكەس كەلىپ وتىر. سوندىقتان قاسىم-جومارت كەمەلۇلى ۇيىندە جۇمىس ىستەيدى. اتالعان داتاعا وراي ەشقانداي شارا وتپەيدى. ءتىپتى، پرەزيدەنت اكىمشىلىگىنىڭ قىزمەتكەرلەرىنە تۋعان كۇنىمەن قۇتتىقتاماۋ، ەستەلىك سىيلىقتار تارتۋ ەتپەۋ تۋرالى ەسكەرتۋ جاسالدى. پرەزيدەنت بۇل كۇندى تويلاعاندى ۇناتپايدى. ويتكەنى ول كىسىنىڭ وتباسىندا بالالاردىڭ دا، ەرەسەكتەردىڭ دە تۋعان كۇنى تويلانبايدى ەكەن. ونداي ءداستۇر قالىپتاسپاعان.

دەگەنمەن ەرتەڭ قاسىم-جومارت كەمەلۇلىن تۋعان كۇنىمەن كورشىلەس مەملەكەتتەردىڭ باسشىلارى تەلەفون ارقىلى قۇتتىقتايدى دەپ كۇتىلۋدە. قازىردىڭ وزىندە كوپتەگەن مەملەكەت جانە ۇكىمەت باسشىلارىنىڭ، پارلامەنت توراعالارى مەن حالىقارالىق ۇيىم جەتەكشىلەرىنىڭ قۇتتىقتاعان جەدەل حاتتارى كەلىپ جاتىر. مۇنداي قۇتتىقتاۋلار ەرتەڭ كەشكە دەيىن ءالى دە جالعاسا بەرەدى دەپ ويلايمىن»، - دەپ جازدى بەرىك ءۋالي.

Abai.kz