پاۆلودار وبلىسى اكىمى

ابىلقايىر سقاقوۆ مىرزانىڭ نازارىنا!

ەگەمەندىك كەزەڭىنىڭ العاشقى جىلدارىندا پاۆلوداردا قازاق مەكتەبى تۇگىل ورىس مەكتەپتەرىندە باستاۋىش قازاق سىنىپتارىن اشۋدىڭ ءوزى ۇلكەن كۇشكە تۇسەتىن. كەيىنگى جىلدارى قالا تۇرعىندارىنىڭ ۇلتتىق قۇرامى وزگەردى. وزگە ۇلت وكىلدەرىنىڭ اراسىنان تاريحي وتاندارىنا قونىس اۋدارۋشىلاردىڭ قاراسى كوبەيىپ، ولاردىڭ ورنىنا اۋىلدىق ەلدى مەكەندەردەن، وڭتۇستىك وڭىرلەردەن، شەتەلدەردەن قانداستارىمىز كوشىپ كەلىپ ورنىقتى. سونىڭ ناتيجەسىندە مەملەكەتتىك تىلدە ءبىلىم الاتىن وقۋشىلاردىڭ سانى ەسەلەپ ارتتى دا، قازاق مەكتەپتەرىنىڭ سانى ازدىق ەتە باستادى. ءبىرشاما مەكتەپتە وقۋ ەكى اۋىسىمدا جۇرگىزىلەدى. كەرىسىنشە، ورىس تىلىندە ءبىلىم بەرەتىن مەكتەپتەردەگى وقۋشىلار سانى ازايدى. ولاردىڭ جارتىسىنا جۋىعىن قازاق بالالارى قۇرايدى.
پاۆلوداردىڭ زاتون ىقشام اۋدانىندا جاڭا قازاق مەكتەبى سالىنىپ جاتىر دەگەن قۋانىشتى حاباردى ەستىگەنىمىزدە وزەكتى ماسەلە كۇن تارتىبىنەن ءتۇسىپ قالماسا دا، اتالعان اۋدانداعى ماسەلە وڭ شەشىمىن تاباتىنىنا سەنىمدى بولعانبىز. بىراق جۋىردا سول ماڭدا ورنالاسقان ورىس تىلىندە وقىتاتىن №13 ورتا مەكتەپتىڭ اتا-انالارى مەكتەپتەرىنىڭ تارلىعىن ايتىپ، قۇرىلىسى اياقتالماعان عيماراتتى ارالاس مەكتەپ قىلىپ اشۋ جونىندە ماسەلە كوتەرىپتى. ولاردى ءبىلىم سالاسىنىڭ كەيبىر شەنەۋنىگى مەن تاۋەلسىز بۇقارالىق اقپارات قۇرالدارى قولداعان كورىنەدى.

قازاق مەكتەبىنە قارسىلىق تانىتقاندار قالامىزداعى ناقتى جاعدايعا ساۋساق اراسىنان قاراپ وتىر-اۋ دەگەن ويدامىز. جىل وتكەن سايىن مەملەكەتتىك ءتىلدىڭ قولدانۋ اياسى كەڭي ءتۇسىپ، بالالارىن مەملەكەتتىك تىلدە وقىتاتىن اتا-انالار سانىنىڭ كوبەيە بەرەتىنى، كەرىسىنشە، بالالارىن ورىس تىلىندە وقىتاتىن اتا-انالار سانىنىڭ كەمي تۇسەتىنى قالىپتى تابيعي قۇبىلىس. ءتىپتى قازىردىڭ وزىندە بالالارىن قازاق مەكتەبىنە بەرگەن وزگە ۇلت وكىلدەرىنىڭ قاراسى ءبىرشاما. الداعى ۋاقىتتا بۇل پروتسەستىڭ قارقىنى كۇشەيە تۇسەدى دەپ كۇتىلۋدە.
تاعى ءبىر نازاردا ۇستايتىن جايت، ارالاس مەكتەپتەردە ءورىستىلدى وقۋشىلار مەن مۇعالىمدەر قازاق ءتىلدى ورتانىڭ قالىپتاسۋىنا كەرى اسەر ەتەدى، سونىڭ سالدارىنان مەملەكەتتىك تىلدە ءبىلىم بەرۋ ناتيجەسى تازا قازاق مەكتەپتەرىندەگىدەي جوعارى دەڭگەيدە بولمايدى. قانشاما جىلدان بەرى اتا-انالار مەن پەداگوگتار وسى جايتتى ءبىلىم جانە عىلىم مينيسترىنە جاريا ايتىپ، ارالاس مەكتەپتەردى جابۋ جونىندە ۇسىنىس بىلدىرۋدە.

راس، ەگەمەندىكتىڭ العاشقى كەزەڭىندە كىشىگىرىم اۋىلدىق ەلدى مەكەندەردە ەكى مەكتەپ سالۋ ءىسى ءتيىمسىز بولعاندىقتان قولعا الىنبادى دا، ارالاس مەكتەپتەر قالدىرىلدى. بىراق بۇلاردىڭ بارلىعى دەرلىك كەيىن سۇرانىسقا سايكەس قازاق مەكتەپتەرىنە اينالدىرىلدى.

رەسپۋبليكا بويىنشا، ونىڭ ىشىندە پاۆلودار قالاسىندا ءتىپتى مەكتەپكە دەيىنگى بالالار مەكەمەلەرىندە بىرىڭعاي مەملەكەتتىك تىلدە تاربيە بەرۋ جونىندە ماسەلە كوتەرىلگەنى كۇنى كەشە عانا ەمەس پە! ەندى ونى جۇزەگە اسىرۋ باعىتىنداعى ءىس-شارالار جوسپارى جاسالۋدىڭ ورنىنا ارالاس مەكتەپ اشۋ جونىندەگى ماسەلە كۇن تارتىبىنە قويىلسا جۇرتشىلىققا تۇسىنىكسىز جايتتىڭ ورىن الاتىنى انىق.

ءبىزدىڭ ويىمىزشا، ەڭ دۇرىس شەشىم زاتون ىقشام اۋدانىندا سالىنىپ جاتقان مەكتەپكە قازاق مەكتەبى مارتەبەسىن بەرۋ. ال №13 ورتا مەكتەپتىڭ عيماراتى، شىنىندا، وقۋشىلارعا تارلىق ەتسە قوسىمشا قۇرىلىس سالۋ ارقىلى ماسەلەنى شەشۋگە بولادى. سولاي دەسەك تە، كۇندەردىڭ كۇنىندە ول وقۋ ورنىنىڭ دا قازاق مەكتەبىنە اينالۋى ىقتيمالدىعىن جوققا شىعارا المايمىز.

ارمان قاني،

پاۆلودار قالاسىنىڭ قۇرمەتتى ازاماتى،
«ءتىل جاناشىرى» قۇرمەت بەلگىسىنىڭ يەگەرى.

Abai.kz