15 مامىر شەتەلدەگى قانداستارعا قازاق ءتىلىن وقىتۋ جوباسى قورىتىندىلانىپ، بولاشاقتاعى جۇمىس جوسپارى تالقىلاندى. جيىنعا «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ، «وتانداستار قورى» پرەزيدەنتىنىڭ كەڭەسشىسى ديدار بولات، قوردىڭ ءبىلىم باعىتى بويىنشا قىزمەتكەرى نۇرىمجان قاسىمۇلى، «زەردەلى اقىل-وي دامىتۋ ورتالىعىنىڭ» ديرەكتورى وجەت ءماۋىت جانە ءبىلىم ورتالىعىنىڭ قىزمەتكەرلەرى قاتىستى.  بۇل تۋرالى «وتانداستار قورىنىڭ» ءباسپاسوز قىزمەتى حابارلادى. 

انا ءتىلىمىزدى الىستاعى اعايىنعا وقىتۋ ساباقتارى اقپان ايىنىڭ باسىنان باستالدى. شەتەلدە تۇراتىن يران، تۇركيا، اقش، رەسەي، ەۋروپا ەلدەرىندەگى 700-دەن استام قانداسىمىز قازاق ءتىلىن ۇيرەتۋ كۋرسىنا بەلسەنە قاتىسقان. 12 ماماننىڭ قاتىسۋىمەن اپتاسىنا 3 كۇن وتەتىن قازاق ءتىلى كۋرسىنا ارنايى ادىستەمە دە ازىرلەنگەن. ادىستەمە اياسىندا ءسوز جاتتاۋ، سويلەم قۇراۋ، سۇراق-جاۋاپ، اڭگىمەلەۋ ادىستەرى قولدانىلادى. 

– Teams ترانسلياتسيا فورماتىندا 180 ستۋديالىق ساباق وتكىزىلدى. وقۋ باعدارلاماسىنا الىپبيدەن باستاپ، ءار ساباقتا قازاق ءتىلى گرامماتيكاسى، مورفولوگياسى قامتىلىپ، ءتىل ۇيرەنۋشىلەرگە بازالىق جاڭا سوزدەر ۇيرەتىلدى. جاڭا تاقىرىپ وتىلگەننەن كەيىن، بەكىتۋ تاپسىرمالارى بەرىلەدى. قاتىسۋشىلاردىڭ جاۋاپتارى تىڭدالىپ، تالقىلانادى. قانداستارعا تۇسىنىكتى بولۋ ءۇشىن، تاپسىرمالار مەن جاڭا سوزدەر قازاق، ورىس، اعىلشىن جانە پارسى تىلىنە اۋدارىلدى. ءار 4 ساباقتان كەيىن، تاقىرىپتى بەكىتۋ ماقساتىندا شىعارماشىلىق جۇمىستار بەرىلدى، - دەيدى «زەردەلى اقىل-وي دامىتۋ ورتالىعىنىڭ» ديرەكتورى وجەت ءماۋىت. 

ساباق وتىلەتىن كۇنى WhatsApp جانە Telegram الەۋمەتتىك جەلىلەرى ارقىلى سىلتەمە مەن حابارلاندىرۋ جىبەرىلىپ وتىرادى. ءار ەلدەن 17 جەكە WhatsApp توپتارى قۇرىلىپ، تىڭدارمانداردىڭ سۇراقتارىنا جاۋاپ بەرەدى. ونلاين ترانسلياتسيا بەينەجازباعا جازىلىپ، «Otandastar channel» YouTube ارناسىنا جۇكتەلىپ وتىردى. وسى كۇنگە دەيىن وتكىزىلگەن 22 بەينەساباق جۇكتەلگەن. كۋرس ۋاقىتى ءار ەلدىڭ ساعاتتىق بەلدەۋىنە بايلانىستى تاڭعى جانە كەشكى ۋاقىتتا كۇنىنە 4 رەت وتكىزىلەدى.  

– كۋرس ۋاقىتى كۇنىنە 4 رەت وتكىزىلەتىندىكتەن ءبىر ساباققا ۇلگەرمەگەن تالاپكەرلەر كەلەسى ساباققا قاتىسۋعا مۇمكىندىك الدى. جانە YouTube ارناسىنداعى بەينەساباقتار دا قول جەتىمدى. دۇنيەجۇزىنە تاراعان جۇقپالى كوروناۆيرۋس دەرتى دەندەپ ەنگەن ۋاقىتتا دا، ءتىل كۋرسى توقتاعان جوق. قانداستارىمىزدىڭ انا ءتىلىن ۇيرەنىپ جانە كارانتين رەجيمى كەزىندە ۋاقىتىن ءتيىمدى پايدالانۋىنا زور مۇمكىندىك جاسالدى. ەڭبەكتەرىڭىزگە جەمىس تىلەيمىن، - دەدى «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ.

جيىن سوڭىندا قازاق ءتىلىن ۇيرەتۋ كۋرسىنا قاتىسۋشىلاردان تەست الۋ، كۋرستى اياقتاعان ازاماتتارعا سەرتيفيكات تاپسىرۋ ماسەلەلەرى پىسىقتالدى. مۇعالىمدەر تاراپىنان بيىلعى جىلعى تاجىريبەگە سۇيەنە وتىرىپ ءتىل كۋرسىن (باستاپقى، ورتاشا، جوعارعى)  دەڭگەيلەپ وقىتۋ جوسپارى ۇسىنىلدى. قازاق ءتىلىن ۇيرەنۋگە نيەتتى قانداستاردىڭ سۇرانىسىنا قاراي جاز ماۋسىمى مەن ءتىل كۋرسىنىڭ كەلەسى سەمەستر وتكىزۋ جوباسى تالقىلاندى. 

Abai.kz