ماگومەد ارچاكوۆتىڭ اۆستريا تۇرمەسىندە جازاسىن وتەپ جاتقانىنا جارتى جىل بولدى. اۆستريا ۇكىمەتىنەن بوسقىن مارتەبەسىن سۇراپ، سول ەلدە تۇرىپ جاتقان 30 جاستاعى قازاقستان ازاماتى 2019 جىلى ماۋسىمدا سوتقا تارتىلدى. ارچاكوۆقا تاعىلعان بىرنەشە ايىپتىڭ اراسىنداعى "سيريا اسكەرىنە قارسى قارۋ قولداندى" دەگەن ايىپ "كىسى ولتىرۋگە وقتالۋ" دەگەن باپقا اۋىستىرىلعاندىقتان ونىڭ ءىسىن القا بيلەر سوتى قارادى.

اۆستريا اقپارات قۇرالدارى "تەررورشىل ۇيىم مەن قىلمىستىق توپ قۇرامىندا بولعان، تەرروريستىك سيپاتتاعى قىلمىس جاساۋعا قاتىسقان دەگەن ايىپتار تاعىلعان ارچاكوۆتى 10-20 جىلع نە ءومىر بويىنا دەيىن تۇرمە جازاسىن بەرۋى مۇمكىن" دەپ جازدى.

ارچاكوۆ سيرياعا كەتەردەن بۇرىن تەمىرتاۋ قالاسىندا تۇرعان. اناسى سول قالادا ءالى تۇرىپ جاتىر. ارچاكوۆتى بۇرىننان بىلەتىن تەمىرتاۋ تۇرعىنى ونى "قاراپايىم جىگىت ەدى" دەپ سيپاتتايدى، ول اقپارات قۇرالدارىنان ارچاكوۆقا تەرروريزم ايىبىمەن ىزدەۋ جاريالانعانىن كورگەندە تاڭعالعانىن ايتادى.

ازاتتىق ءتىلشىسى ارچاكوۆتىڭ اناسىن دا ىزدەپ تاپتى. بىراق ول سۇحبات بەرۋدەن باس تارتتى. ول "ۇلىمنىڭ ونداي قىلمىسقا قاتىسى بولۋى مۇمكىن ەمەس" دەپ سانايدى. اناسىنىڭ سوزىنشە، التى جىل بۇرىن ەۋروپاعا كەتكەن ماگومەد "وتباسىن قۇرىپ، سول ەلدە قالعان".

ماگومەد ارچاكوۆتى ىزدەۋگە ءبىراز جىل كەتكەن. اۋەلى جەرگىلىكتى پوليتسيا سۇراۋ سالىپ، اقپارات قۇرالدارىنا حابار بەرىپ ىزدەگەن. كەيىن بيلىك ەل كولەمىندە، اقىر سوڭىندا ينتەرپول ارقىلى حالىقارالىق ىزدەۋ جاريالاعان.

اۆستريا اقپارات قۇرالدارى سىلتەمە جاساعان ايىپتاۋ تارابىنىڭ دەرەگىنشە، 2013 جىلدىڭ تامىزىنان 2015 جىلدىڭ قاراشاسىنا دەيىن ارچاكوۆ سيرياعا بىرنەشە رەت بارىپ، "يسلام مەملەكەتى" تەررور توبىنا قىزمەت ەتۋگە انت بەرگەن "كاۆكاز امىرلىگى" توبىنىڭ قۇرامىندا پرەزيدەنت باشار اسادتىڭ اسكەرىنە قارسى سوعىسقان. حاريتان مەن الەپپودا سوعىسقان.

2014 جىلى قاڭتاردا ارچاكوۆ "سوعىستان كەيىن ەس جيۋ ءۇشىن" تۇركياعا ورالعان. ءبىراز ۋاقىتتان كەيىن قايتادان سيرياعا بارىپ، ەلدىڭ سولتۇستىگىندەگى اسكەري قيمىلدار كەزىندە بومبا جارىقشاعى ءتيىپ، جارالانعان. ەمدەلىپ شىققان سوڭ، ۋكراينا ارقىلى اۆسترياعا قاشقان.

2017 جىلدىڭ ناۋرىزىندا قازاقستاننىڭ قاۋىپسىزدىك ورگاندارى اۆستريانىڭ كونستيتۋتسيانى قورعاۋ جانە تەرروريزمگە قارسى كۇرەس جونىندەگى فەدەرالدى ۆەدومستۆوسىنا ۆەنادا سيرياداعى سوعىسقا قاتىسقان ازامات ءجۇرۋى مۇمكىن دەگەن كۇدىگىن جەتكىزگەن. ساۋساق ىزدەرى مەن سۋرەتتەرى ارقىلى الگى ازاماتتىڭ قازاقستان ىزدەۋ جاريالاعان ارچاكوۆ ەكەنى انىقتالعان.

تەرگەۋ كەزىندە قازاقستان ازاماتىنىڭ قولدان جاسالعان تۋ تۋرالى كۋالىگى مەن جۇرگىزۋشى كۋالىگىن كورسەتىپ، اۆستريادا 2015 جىلدان بەرى تۇرىپ كەلگەنى بەلگىلى بولعان. اۆستريا باسىلىمدارىنىڭ دەرەگىنشە، ارچاكوۆ وتباسىمەن تۇرعان، ەش جەردە رەسمي جۇمىس ىستەمەگەن جانە اي سايىن الەۋمەتتىك جاردەماقى الىپ كەلگەن. ول رەسەي ازاماتى ەكەنىن، ء"دىني كوزقاراسى ءۇشىن قۋدالاۋعا ۇشىراعانىن" ايتىپ، اۆستريا ۇكىمەتىنەن وزىنە بوسقىن مارتەبەسىن بەرۋدى سۇراعان.

سوت ۇكىمى 2019 جىلى ماۋسىمنىڭ 27-ءى كۇنى شىققان. جارتى كۇن كەڭەسكەن القا بيلەر ارچاكوۆتىڭ ىستەگەن ىسىنە وكىنگەنىن ەسكەرىپ، "ايىپتاۋ تارابى كىسى ولتىرۋگە وقتالۋ فاكتىسىن دالەلدەي المادى" دەگەن ۇيعارىمعا كەلدى. اۆستريا اقپارات قۇرالدارى ارچاكوۆقا بەرىلگەن 12 جىل تۇرمە جازاسىن "ەڭ تومەنگى جازا", "جۇمساق ۇكىم" دەپ اتاعان.

رەسمي دەرەك بويىنشا، 2019 جىلى 12 مىڭ ادام اۆستريادان بوسقىن مارتەبەسىن سۇراعان. ولاردىڭ 44 پايىزى – سيريا مەن اۋعانستاننان شىققان ازاماتتار. ودان بولەك، 31 قازاقستاندىق جانە 723 رەسەيلىك ازامات ءوتىنىش بەرگەن. اۋعانستاننىڭ ءتورت مىڭنان استام، سيريانىڭ – ەكى جارىم مىڭ، قازاقستاننىڭ – توعىز جانە رەسەيدىڭ 378 ازاماتى بوسقىن مارتەبەسىن العان.

Abai.kz