قارجى جانە بيۋدجەت كوميتەتىنىڭ كەڭەيتىلگەن وتىرىسىندا «ەۋرازيالىق ەكونوميكالىق وداقتىڭ كەدەندىك اۋماعىنا اكەلىنگەن تاۋارلاردى قاداعالاپ وتىرۋ تەتىگى تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسى قارالدى،- دەپ حابارلايدى parlam.kz سايتى. 

كەلىسىم كەدەندىك جانە سالىقتىق تولەمدەردى تولەۋدەن جالتارۋدىڭ ءارتۇرلى كەستەلەرىن پايدالانۋدى بولدىرمايتىن شارتتار جاساۋعا، تاۋارلاردى ەۋارازيالىق ەكونوميكالىق وداققا مۇشە ءبىر مەملەكەتتىڭ اۋماعىنان ەكىنشىسىنىڭ اۋماعىنا تاسىمالداۋ كەزىندە تاۋارلار اينالىمىنىڭ زاڭدىلىعىن راستاۋعا جانە تاۋار اينالىمىنا بايلانىستى وپەراتسيالارعا باقىلاۋدى قامتاماسىز ەتۋگە باعىتتالعان.

سونداي-اق كەلىسىم ەاەو-عا ءاربىر مۇشە مەملەكەتتىڭ ەاەو كەدەندىك اۋماعىنا اكەلىنگەن تاۋارلاردى قاداعالاۋدىڭ ۇلتتىق جۇيەسىن قۇرۋ، ۇلتتىق قاداعالاپ وتىرۋ جۇيەسىنەن ەاەو اقپاراتتىق پلاتفورماسى ارقىلى اقپارات الماسۋ، قاداعالاپ وتىرۋ تەتىگىنىڭ جۇمىس ىستەۋىن ىسكە قوسۋ جونىندەگى پيلوتتىق جوبانى جۇرگىزۋ جانە قاداعالاپ وتىرۋ تەتىگىنىڭ تۇراقتى نەگىزدە جۇمىس ىستەۋىن قامتاماسىز ەتۋدى قاراستىرادى.

قارجى ءمينيسترىنىڭ ورىنباسارى قانات باەدىلوۆ ءوز بايانداماسىندا تاۋارلارلاردى قاداعالاۋ جۇيەسىن ەنگىزۋ ەاەو اۋماعىمەن قاتار ترانسشەكارالىق قوزعالىس كەزىندە تاۋار اينالىمىنىڭ زاڭدىلىعىن قامتاماسىز ەتۋگە جانە زاڭسىز تاۋار اينالىمىنا ىقپال ەتەتىن جاعدايدى جويۋعا مۇمكىندىك بەرەتىندىگىن ايتتى.

«كەلىسىم ىشكى تۇتىنۋ ءۇشىن كەدەندىك راسىمدەۋگە الىنعان، تاركىلەنگەن جانە مەملەكەتتىك كىرىسكە اينالعان تاۋار اينالىمىنا قاتىستى قۇقىقتىق قاتىناستارعا، سونداي-اق كەدەن ورگاندارى ۇستاعان جانە قاجەتتى وكىلەتتىكتەرى بار ادامدار ىزدەمەگەن وسىنداي تاۋارلارعا قاتىستى»، - دەدى ق.باەدىلوۆ.

زاڭ جوباسىن قابىلداۋ زاڭسىز تاۋار اينالىمى تۋىندايتىن جاعدايلاردى جوياتىن تەتىك جاساۋعا،  تاۋارلاردى تاڭبالانۋمەن بىرگە «ءوندىرۋ-جەتكىزۋ-وتكىزۋ» تىزبەگى بويىنشا قوزعالىستىڭ بارلىق دەڭگەيىندە ۇزدىكسىز قاداعالاپ وتىرۋ ءونىمنىڭ مارتەبەسىن باقىلاۋعا جانە مونيتورينگىلەۋگە مۇمكىندىك بەرەدى. ەاەو اۋماعىندا تاۋارلاردى بيزنەس ءۇشىن تاسىمالداۋ كەزىندە تاۋار اينالىمىنىڭ زاڭدىلىعىن ەلەكتروندى راستاۋ باسەكەگە قابىلەتتىلىكتى جانە ءونىمدى وتكىزۋ نارىعىن كەڭەيتۋدى ارتتىرادى. ودان باسقا، ۇلتتىق قاداعالاپ وتىرۋ جۇيەسىنەن الىنعان مالىمەتتەردىڭ نەگىزىندە تاۋارلاردى قۇجاتتامالىق سايكەستەندىرۋ تاۋارلار اينالىمى بويىنشا دۇرىس دەرەكتەردى الۋداعى بيزنەس شىعىندارىن ازايتۋعا مۇمكىندىك بەرەدى. مەملەكەت ءۇشىن كەدەندىك جانە سالىقتىق تولەمدەردى تولەۋدەن جالتارۋ سحەمالارىن پايدالانۋدى بولدىرمايتىن جاعدايلار جاساۋ كەدەندىك جانە سالىقتىق تولەمدەردىڭ جينالۋىن ارتتىرۋعا تىكەلەي اسەر ەتەدى.

قۇجات پالاتا وتىرىسىنىڭ قاراۋىنا جىبەرىلدى.

Abai.kz