«ىلەسپە اۋدارما: تەوريالىق نەگىزدەرى مەن پراكتيكاسى» قازاق تىلىنەن
اعىلشىن، اعىلشىن تىلىنەن قازاق تىلىنە ىلەسپە اۋدارما جۇرگىزۋ كۋرسىن ۇيىمداستىرادى.

قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى
كوميتەتىنىڭ تاپسىرىسى بويىنشا «ش.شاياحمەتوۆ اتىنداعى «ءتىل-قازىنا»
ۇلتتىق عىلىمي-پراكتيكالىق ورتالىعى» كەاق «قازاقستان رەسپۋبليكاسىندا
تىلدەردى دامىتۋ مەن قولدانۋدىڭ 2020-2025 جىلدارعا ارنالعان مەملەكەتتىك
باعدارلاماسى» اياسىندا نۇر-سۇلتان قالاسى، «تۇران» بيزنەس ورتالىعىندا
اعىمداعى جىلدىڭ 1-5 ماۋسىم ارالىعىندا مەملەكەتتىك ءتىلدىڭ قولدانىس
اياسىن كەڭەيتۋ، ىلەسپە اۋدارماشىلاردىڭ بىلىكتىلىگىن ارتتىرۋ ماقساتىندا
قازاق تىلىنەن اعىلشىن، اعىلشىن تىلىنەن قازاق تىلىنە ىلەسپە اۋدارما
جۇرگىزۋدى ۇيرەتۋ كۋرسىن وتكىزەدى.

كۋرستا اۋدارما تەورياسى، جازباشا اۋدارما مەن اۋىزشا اۋدارمانىڭ
ەرەكشەلىكتەرى، ىلەسپە اۋدارماشىعا قاجەتتى بازالىق گرامماتيكالىق جانە
فرازەولوگيالىق ۇلگىلەرى، سوزدىك قوردى بايىتۋ جۇمىستارى بويىنشا دارىستەر
وقىلادى. سونىمەن قاتار، اۋدارماشى ماماندارعا اۋدارما تەورياسى مەن
پراكتيكاسى، اۋدارماتانۋدىڭ وزەكتى ماسەلەلەرى شەڭبەرىندە وقۋ-ادىستەمەلىك
كومەك كورسەتىلىپ، اۋدارما سالاسىنداعى عالىم ماماندار وزىق تاجىريبەسىمەن
بولىسەدى.

كۋرستى ەۋرازيا ۇلتتىق ۋنيۆەرسيتەتى اۋدارما تەورياسى مەن
پراكتيكاسى كافەدراسىنىڭ دوتسەنتى، PhD دوكتورى اقنۇر تولەۋباەۆا
جۇرگىزەدى.

كۋرسقا ورتالىق جانە جەرگىلىكتى اتقارۋشى ورگاندارىنىڭ
اۋدارماشىلارى قاتىسادى.

قاتىسۋشىلارعا بىلىكتىلىك سەرتيفيكاتتارى تابىستالادى.

Abai.kz