قازاقستاندا قابىلدانعان بەيبىت جينالىستار تۋرالى زاڭنامادا شەتەلدىك ساراپشىلاردى قۇلاق اسا بەرمەي، ەڭ الدىمەن ۇلتتىق مۇددەنى ەسكەرۋ كەرەك. بەلگىلى قازاقستاندىق ساياساتتانۋشى دانيار اشىمباەۆ وسىلاي دەيدى.

«بەيبىت جينالىستار تۋرالى» زاڭ ءوز ويىن بىلدىرگىسى كەلەتىن ازاماتتارعا جاقسى مۇمكىندىك بەرەتىنىن ايتا كەتۋ كەرەك. الەۋمەتتىك، ەكونوميكالىق نەمەسە ساياسي ماسەلەلەرگە كەلگەندە ميتينگ - نارازىلىقتىڭ ءبىر ءتۇرى رەتىندە بۇرق ەتە تۇسەتىن جاعدايلار كوپ كەزدەسەدى. البەتتە كەز كەلگەن ماسەلە ميتينگكە كەلىپ تىرەلسە بيلىك ءوز جۇمىسىندا كەم-كەتىك جىبەرىپ، وتىنىمدەردى قابىلداماي، ادامداردا باسقا امال قالمايتىنداي جاعدايعا اكەلدى دەگەن ءسوز. وسى رەتتە ادامدار نارازىلىقتارىن بىلدىرۋگە قۇقىلى», - دەيدى ساياساتتانۋشى.

ساراپشى ءبىزدىڭ قوعامعا تۇراقتىلىق پەن كەلىسىم سەكىلدى قۇندىلىقتار وتە ماڭىزدى ەكەنىن ايتادى.

«قازىرگى جاعدايدا احۋالدى ۋشىقتىرىپ الۋدىڭ اقىرى ۇلتارالىق نەمەسە كونفەسسياارالىق قاقتىعىستارعا اكەپ سوقتىرۋى مۇمكىن. ماسەلەن بۇل سالاداعى زاڭدى قابىلداي وتىرىپ، حالىقارالىق قۇقىق نورمالارىنا سىلتەمە جاساي بەرمەي، ورىندى وي، پايىمدى ۇسىنىستارعا قۇلاق اسۋ كەرەك. ميتينگىلەردە تالقىلايتىن جانە تالقىلاۋدى قاجەت ەتپەيتىن تاقىرىپتار بار. ءبىزدىڭ قوعامدا وسى ماسەلەلەرگە قاتىستى راديكالدى جانە ءتىپتى اگرەسسيۆتى كوزقاراستاعى توپتار بار. سوندىقتان بەلگىلى ءبىر رەتتەۋ ءتارتىبى بولۋ كەرەك. كوپتەگەن حالىقارالىق كونۆەنتسيالارعا، كەلىسىمدەر مەن ساراپشىلاردىڭ ويىنا سىلتەمە جاساي وتىرىپ، جاڭا زاڭدى سىن ساداعىنا ىلىكتىرىپ جاتقانداردى كورىپ وتىرمىز. بىراق قازىر ءبىز ۇلتتىق زاڭناما تۋرالى ايتىپ وتىرمىز. ول الەمدىك تاجىريبە مىسالدارىنا نەگىزدەلمەۋى كەرەك. ولاردى تابۋ وڭاي. اقىلعا قونىمدى ىسكە يەك ارتقان ابزال. ءبىزدىڭ قوعامعا نە قاجەت – سول ەسكەرىلۋى كەرەك. فرانتسيا، كورەيا نەمەسە پاكىستانعا قولايلى زاڭ بىزگە قاجەت ەمەس»، - دەدى دانيار اشىمباەۆ.

ساياساتتانۋشىنىڭ پايىمىنا سۇيەنسەك، بەيبىت جينالىستار تۋرالى جاڭا زاڭ ايتارلىقتاي ليبەرالدى سيپاتقا يە. سونىمەن قاتار، بۇل قۇجات قوعامعا ورنى تولماس شىعىن كەلتىرەتىن ساياسي، ۇلتتىق، ءدىني راديكاليزمنىڭ جولىن كەسۋگە دە قاۋقارلى.

دانيار اشىمباەۆ ءتۇرلى توپتار مەن بىرلەستىكتەر قاتىسقان، جاقىندا بولعان ميتينگىلەردىڭ تولقىنىن مىسالعا كەلتىردى.

ساراپشىنىڭ ايتۋىنشا بۇل توپتار ءوز ميتينگىلەرىن جيناۋعا تىرىسپاي، كەرىسىنشە شەتەلدەگى كەيبىر ادامدار قوزدىرىپ وتىرعان ميتينگىلەردى پايداعا جاراتۋعا تىرىسقان. بۇل دەگەنىمىز اتالمىش توپتاردىڭ قوعام قولداۋىن سەزىنبەيتىنىن جانە سوندىقتان ولاردى ساياسي كۇش رەتىندە بايىپتى قابىلداۋعا بولمايتىندىعىن بىلدىرەدى. ويتكەنى ولار وزدىگىنەن ارەكەت ەتپەي، ساياسي ارانداتۋشىلىققا قاتىسقان ادامدارعا قوسىلادى.

«مەن ازاماتتار ءوز پىكىرىن بىلدىرۋگە قۇقىلى بولۋى كەرەك دەپ سانايمىن. جينالىستاردا، بۇقارالىق اقپارات قۇرالدارىندا، الەۋمەتتىك جەلىلەردە... وسىعان قاراماستان بۇل ارەكەتتەردىڭ كەيبىرىن شەكتەپ، ءتىپتى جولىن كەسىپ وتىرۋ كەرەك. ەقىۇ نەمەسە ەۋروپالىق پارلامەنتتىڭ كەيبىر ساراپشىسى بۇعان كەلىسپەۋى مۇمكىن. بىراق بۇل ءبىزدىڭ مەملەكەتىمىز. ءبىز وعان جاۋاپتىمىز. ءبىرىنشى كەزەكتە ءبىزدىڭ قوعامنىڭ مۇددەسىن ەسكەرۋ كەرەك»، - دەيدى د.اشىمباەۆ.

Abai.kz