بۇگىن پالاتا سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

پالاتا قاراۋىنا بىرقاتار دەپۋتاتتاردىڭ وزدەرى ازىرلەگەن زاڭ جوبالارى ۇسىنىلدى.

وندا دەپۋتاتتار ءبىرىنشى وقىلىمدا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋىلدىق ەلدى مەكەندەردە ينتەرنەتتىڭ قولجەتىمدىلىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»  زاڭ جوباسىن قارايدى.

ءماجىلىس توراعاسى نۇرلان نىعماتۋلين اتاپ وتكەندەي، اۋىل تۇرعىندارىنىڭ جىلدامدىعى جوعارى ينتەرنەتكە قول جەتكىزۋى ولاردىڭ ەلەكتروندى قىزمەتتەردى كوبىرەك قولدانۋىنا مۇمكىندىك بەرەدى. سونىڭ ناتيجەسىندە، قاشىقتىقتان وقىتۋ، ءبىلىم بەرۋ مەن مەديتسينانى تسيفرلاندىرۋ ايتارلىقتاي ارتاتىن بولادى.

- مەملەكەت باسشىسى قاسىم-جومارت كەمەلۇلى توقاەۆ ۇلتتىق كەڭەس وتىرىسىندا وسىعان بايلانىستى ناقتى تاپسىرمالار بەردى. وندا ءبىلىم بەرۋ جانە دەنساۋلىق ساقتاۋ سالالارىن جاقسارتۋ تۋرالى مىندەتتەر قويدى. وسىلاردى جەتىلدىرۋدىڭ ماڭىزدى باعىتى تسيفرلىق تەحنولوگيالاردى ءتيىمدى قولدانۋدا وسى زاڭ جوباسى ىقپال ەتەتىن بولادى، - دەدى نۇرلان نىعماتۋلين.

جالپى تەلەكوممۋنيكاتسيالىق ينفراقۇرىلىمدى بىرلەسىپ پايدالانۋ قازاقستاندىق نارىقتىڭ دامۋىنا زور مۇمكىندىك بەرەدى.

سونىمەن قاتار، پالاتا ەرەكشە قورعالاتىن تابيعي اۋماقتار ماسەلەلەرىنە قاتىستى زاڭ جوباسىن ءبىرىنشى وقىلىمدا قارايدى. وسىمەن بىرگە، شەتەل ۆاليۋتاسىنداعى يپوتەكالىق قارىزدار جانە كورسەتىلەتىن تولەم قىزمەتتەرى نارىعىنىڭ سۋبەكتىلەرىن رەتتەۋدى جەتىلدىرۋ ماسەلەلەرىنە تۋرالى زاڭ جوباسى ءبىرىنشى وقىلىمدا ۇسىنىلادى.

وتىرىستا پالاتا دەپۋتاتتار ازىرلەگەن اۋديتورلىق قىزمەت ماسەلەلەرىنە قاتىستى زاڭنامالىق تۇزەتۋلەردى تالقىلاۋعا ۇسىناتىن بولادى.

كۇن ءتارتىبىنىڭ جوباسىندا پالاتانىڭ الداعى جالپى وتىرىسىندا بيزنەس-احۋالدى جاقسارتۋعا باعىتتالعان زاڭ جوباسى ەكىنشى وقىلىمدا قارالماق.

سونىمەن بىرگە، ءماجىلىستىڭ بەيىندى كوميتەتتەرى بىرقاتار جاڭا زاڭ جوبارالارىن جۇمىسقا الاتىن بولادى. ول دەپۋتاتتار  ازىرلەگەن «جەر قويناۋى جانە جەر قويناۋىن پايدالانۋ تۋرالى» كودەكسكە ۋران وندىرىسىنە قاتىستى زاڭ جوباسى. جانە دەپۋتاتتار باستاماشى بولعان  قارىزدىق ەڭبەكتى رەتتەۋ جانە ۆەتەريناريا ماسەلەلەرىنە قاتىستى زاڭ جوبالارى بار. وتىرىستا دەپۋتاتتار «ماقتا سالاسىن دامىتۋ تۋرالى» قازاقستان رەسپۋبليكاسى زاڭىنىڭ كۇشى جويىلدى دەپ تانۋ جانە قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» زاڭ جوباسى تۋرالى قورىتىندى ازىرلەنەتىن بولادى.

Abai.kz