اقپارات جانە قوعامدىق دامۋ ءمينيسترى ايدا بالاەۆا وتاندىق باق سالاسىن دامىتۋ ماسەلەلەرىنە ارنالعان دوڭگەلەك ۇستەل جيىنىنا قاتىسىپ جاتىر.

وتىرىسقا زيالى قاۋىم وكىلدەرى مەن باق سالاسىنىڭ بىلىكتى وكىلدەرى قاتىسۋدا. اقپارات جانە قوعامدىق دامۋ ءمينيسترى ايدا بالاەۆا ولارمەن جۇزدەسكەنىنە قۋانىشتى ەكەنىن ءبىلدىرىپ، وسى ورتاعا ۋاقىت ارناعاندارىنا العىس ايتتى.

– وسى كۇنى قوعامدى دا، ادامدى دا اقپارات قۇرالدارىنسىز ەلەستەتۋ مۇمكىن ەمەس. ال ەندى باق-تىڭ مەملەكەتتىك جۇيەدەگى ءرولى تۋرالى ايتىپ تاۋىسۋ – ءبىر ءىس-شارانىڭ شەڭبەرىندەگى شارۋا ەمەس. ونى وزدەرىڭىز دە جاقسى بىلەسىزدەر. سوندىقتان دا ءبىزدىڭ بۇگىنگى دوڭگەلەك ۇستەلىمىزدىڭ باستى ماقساتى – وسى سالاداعى بارلىق ماسەلەنى تالقىعا سالىپ، مۇكىندىگىنشە ەڭ وزەكتى سۇراقتارعا شەشىم تابۋ. ءسوز جوق، مينيستر رەتىندە مەن ءۇشىن وزدەرىڭىز سياقتى اقپارات پەن يدەولوگيا سالاسىنىڭ مايتالمان-ماماندارىنىڭ وي-پىكىرى وتە ماڭىزدى. سەبەبى سىزدەردىڭ وسى باعىتتاعى تەرەڭ بىلىمدەرىڭىز بەن باي تاجىريبەلەرىڭىزدىڭ وتاندىق بۇقارالىق اقپارات قۇرالدارىنىڭ دامۋىنا قوسار ۇلەسى مول دەپ بىلەمىن. بۇگىنگى كەزدەسۋدىڭ تاقىرىبى دا، مىنە، وسى ماسەلەگە ارنالادى. ارينە، ونىڭ وزەكتىلىگى تۋرالى سىزدەرگە ايتىپ جاتۋدىڭ ءوزى ارتىق. ونىڭ ۇستىنە، بۇل تاقىرىپ سوڭعى كەزدەرى الەۋمەتتىك جەلىلەردە دە، باق وكىلدەرى اراسىندا دا قىزۋ تالقىلانىپ ءجۇر. بۇل تۇسىنىكتى دە. ويتكەنى بۇقارالىق اقپارات قۇرالدارى قازىرگى قوعامنىڭ تىنىس-تىرشىلىگىنە تىكەلەي اسەر ەتەتىن ۇلكەن فەنومەنگە اينالىپ وتىر، – دەدى مينيستر.

Abai.kz