شىمكەنت قالاسىنىڭ باس سانيتار-دارىگەرى ءابدىماناپ تولەباەۆ قالاداعى كارانتين مەرزىمى مەن شەكتەۋ شارالارى 22 ماۋسىمعا دەيىن ۇزارتىلعانىن مالىمدەدى. 

بۇگىننەن باستاپ قولدانىسقا ەنەتىن قاۋلىعا سايكەس، قالاداعى كوروناۆيرۋستى ينفەكتسياسىمەن سىرقاتتانۋشىلىقتىڭ 3,7% وسۋىنە بايلانىستى كارانتين مەرزىمى جالعاساتىن بولادى. تۇرعىنداردان قوعامدىق ورىندار مەن قالالىق قوعامدىق كولىكتەردە جانە قىزمەتى رۇقسات ەتىلگەن نىساندارىنا بارعان كەزدە بەتپەردەلەردى كيىپ، قولعاپتاردى كيىپ ءجۇرۋ تالاپ ەتىلەدى. بارلىق بازارلاردىڭ جۇمىس ۋاقىتى ساعات 06.00-دەن ساعات 19.00-گە دەيىن شەكتەلىپ، قوعامدىق تاماقتانۋ ورىندارىنىڭ جۇمىس ۋاقىتى 23.00-گە دەيىن بەكىتىلدى. ال، ساۋدا-ويىن ورتالىقتارى مەن كەشەندەرىنىڭ، ساۋدا ۇيلەرىنىڭ اۋماعىندا ورنالاسقان كينوتەاترلار مەن بالالاردىڭ ويىن الاڭدارىنىڭ، مۇز الاڭدارى مەن باتۋت جانە فۋدكورتتاردىڭ اشىلۋىنا ءالى دە تيىم سالىنىپ وتىر.

مەملەكەتتىك مەكەمەلەر مەن ۇيىمداردىڭ، ۇلتتىق كومپانيالار مەن كەڭسەلەردىڭ جۇمىسشىلارى جارتىلاي قاشىقتان جۇمىس ىستەۋ رەجيمىن جالعاستىراتىن بولدى. سونداي-اق، شومىلۋ مەن دەمالىس ورىندارىندا ادامداردىڭ شوعىرلانۋىنا جول بەرمەۋ بويىنشا شارالار قابىلداۋ مىندەتتەلدى.

توي جيىندار مەن ءتۇرلى وتباسىلىق شارالاردىڭ وتكىزىلۋىنە رۇقسات ەتىلمەي، جۇمىسىن قايتا باستاعان نىساندارعا ۇنەمى مونيتورينگ جۇرگىزۋ تاپسىرىلدى.

تارتىپكە باعىنباعاندارعا ءتيىستى شارالار قولدانىلادى.

Abai.kz