قازاقستاننىڭ باس سانيتار دارىگەرى ايجان ەسماعامبەتوۆانىڭ جاڭا قاۋلىسى جاريالاندى.

ەندى قازاقستانعا شەتەلدەن كەلگەندەر 2 تاۋلىككە دەيىن كارانتيندىك ستاتسيونارلاردا وقشاۋلانىپ، تەكسەرىلەدى. ال ەگەر اۋە رەيسىمەن شەتەلدەن كەلگەندەر شەكارانى قيىپ وتكەن كۇنى سوڭعى 5 كۇننىڭ ىشىندە الىنعان كوروناۆيرۋستىڭ جوقتىعى تۋرالى انىقتامانى كورسەتسە، وندا كارانتينگە جاتقىزىلمايدى.

ەلىمىزگە ەۋرازيالىق ەكونوميكالىق وداق ەلدەرىنەن نەمەسە وزبەكستاننان اۆتوموبيل وتكەلدەرى، تەمىرجول جانە باسقا جولدارمەن كەلگەندەر انكەتا تولتىرادى، سونداي-اق پتر سىناقتان ءوتۋ ءۇشىن ولاردان اناليز الىنادى.

مەملەكەتتىك ورگاندار، ۇلتتىق كومپانيالار جانە باسقا ۇيىمدار سانيتارلىق-دەزينفەكتسيالىق رەجيمدى كۇشەيتىپ، قاشىقتىقتى ساقتاي وتىرىپ، جۇمىسىن جالعاستىرادى. شتات سانى 30 ادامنان اساتىن بولسا، قىزمەتكەرلەردىڭ كەم دەگەندە 80 پايىزى قاشىقتان جۇمىس ىستەيدى. ەگەر COVID-19 جۇقتىرۋ دەڭگەيى اپتا ىشىندە 5 پايىزدان اسپاسا، وندا قىزمەتكەرلەردىڭ كەم دەگەندە 50%-ى قاشىقتان جۇمىس ىستەي بەرەدى.

قاۋلىعا سايكەس قازاقستاندا كىمدەر مىندەتتى ەكسپرەس-تەستىلەۋدەن ءوتۋى ءتيىس؟

- تەمىرجول كولىگىندەگى تاسىمالداۋ قىزمەتىمەن بايلانىستى ادامدار، جۇكتەردى اۆتوموبيلمەن حالىقارالىق تاسىمالداۋدى جۇزەگە اسىراتىن جۇرگىزۋشىلەر، سونداي-اق ترانزيتتىك جۇرگىزۋشىلەر;

- COVID 19 تارالۋىنىڭ الدىن الۋ بويىنشا ءىس-شارالارعا تارتىلعان ورتالىق جانە جەرگىلىكتى مەملەكەتتىك ورگانداردىڭ قىزمەتكەرلەرى (ىشكى ىستەر مينيسترلىگى، قورعانىس مينيسترلىگى، ۇلتتىق گۆارديا، ۇلتتىق قاۋىپسىزدىك كوميتەتى، كەدەن قىزمەتى، اكىمدىكتەردىڭ قىزمەتكەرلەرى جانە باسقالار);

- كارانتيندىك وڭىرلەردىڭ تىنىس-تىرشىلىگىن قامتاماسىز ەتەتىن كاسىپورىنداردىڭ (كوممۋنالدىق قىزمەتتىڭ، تاماق ونىمدەرىن، ءدارى-دارمەكتەردى ساتاتىن ساۋدا وبەكتىلەرىنىڭ، جەتكىزۋدى جۇزەگە اسىراتىن قوعامدىق تاماقتانۋ وبەكتىلەرىنىڭ، كولىك، پمك، دەزينفەكتسيا قىزمەتتەرىن كورسەتەتىن وبەكتىلەردىڭ قىزمەتكەرلەرى جانە ت.ب.) قىزمەتكەرلەرى;

- مەديتسينالىق ۇيىم باسشىسىنىڭ ءتىزىمى بويىنشا اۋىر سوزىلمالى اۋرۋىنا بايلانىستى جەدەل امبۋلاتوريالىق كونسۋلتاتسياعا مۇقتاج پاتسيەنتتەر، سونداي-اق شۇعىل كورسەتىلىمدەر بويىنشا ەمدەۋگە جاتقىزىلعان پاتسيەنتتەر.

قاۋلىنىڭ تولىق نۇسقاسىن مىنا سىلتەمەدەن وقۋعا بولادى.

Abai.kz