بۇگىن ۇكىمەت وتىرىسىندا 2020 جىلعى قاڭتار-مامىرداعى ەلىمىزدىڭ الەۋمەتتىك-ەكونوميكالىق دامۋ قورىتىندىسى جانە رەسپۋبليكالىق بيۋدجەتتىڭ اتقارىلۋ جۇمىستارى قارالدى،- دەپ حابارلايدى primeminister.kz.

ۇكىمەت مالىمەتىنشە، بيىلعى قاڭتار-مامىر ايلارىندا ءجىو 2019 جىلدىڭ سايكەس كەزەڭىنە قاراعاندا 1,7%-عا تومەندەگەن.

الايدا قر ەكونوميكاسىنىڭ ناقتى سەكتورلارىندا ءوسىم بايقالادى. ماسەلەن، تاۋ-كەن ونەركاسىبىنىڭ كولەمى 5,2%-عا، وڭدەۋ ونەركاسىبى – 4,9%-عا، ونىڭ ىشىندە ماشينا جاساۋ – 18,5%-عا، فارماتسەۆتيكا – 21,2%-عا، جەڭىل ونەركاسىپ – 10,8%-عا، قۇرىلىس ماتەريالدارىن ءوندىرۋ – 12,3%-عا ءوستى. قۇرىلىس كولەمى 5,9%-عا ءوستى، ساۋدا بالانسىنىڭ وڭ سالدوسى قامتاماسىز ەتىلگەن.

اۋىل شارۋاشىلىعى جالپى ءونىمىنىڭ كولەمى 2,2%-عا ءوستى. كوكتەمگى ەگىس جۇمىستارى وڭتايلى مەرزىمدە اياقتالدى، ولاردىڭ قورىتىندىسى بويىنشا ەگىس القابى 237,7 مىڭ گا ارتىپ، 22,5 ملن گا قۇرادى.

حالىقتى جۇمىسپەن قامتۋدى قولداۋ شارالارى دا قولعا الىنعان. بيىل جۇمىسقا ورنالاسۋعا جاردەمدەسۋ بويىنشا كەشەندى شارالارمەن قر 1,22 ملن ازاماتى قامتىلاتىن كورىنەدى.

كارانتين رەجيمىن كەزەڭ-كەزەڭمەن جەڭىلدەتۋ اياسىندا قىزمەت كورسەتۋ سەكتورىنداعى ىسكەرلىك بەلسەندىلىك سەرپىندى تۇردە قالپىنا كەلتىرىلىپ جاتىر. ماسەلەن، مامىر ايىندا ساۋىرمەن سالىستىرعاندا ساۋدا (+28,3%), كولىك سەكتورىندا (+20,7%) جانە حالىققا قىزمەت كورسەتۋ (+28,8%) سالاسىندا ايتارلىقتاي ءوسىم بايقالدى.

وسى جىلدىڭ بەس ايىنىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى وتكەن جىلدىڭ سايكەس كەزەڭىمەن سالىستىرعاندا 0,1%-عا ءوستى. سونىمەن قاتار مامىر ايىندا بيىلعى ءساۋىر ايىمەن سالىستىرعاندا بۇل كورسەتكىش 32%-عا ارتتى. وعان قوسا نەگىزگى كاپيتالعا سالىنعان جەكە ينۆەستيتسيالار كولەمىنىڭ ءوسىمى 25,7%-دى قۇرادى.

«ءبىزدىڭ مىندەتىمىز – قىسقا مەرزىمدە ەكونوميكانىڭ داعدارىسقا دەيىنگى دامۋ قارقىنىن قالپىنا كەلتىرۋ. بۇعان ەكونوميكانى قولداۋ جانە وسى جىلدىڭ سوڭىنا دەيىن ەكونوميكالىق ءوسىمدى قالپىنا كەلتىرۋ جونىندەگى كەشەندى جوسپاردى ىسكە اسىرۋ بويىنشا ءبىز قابىلداعان شۇعىل شارالار ىقپال ەتۋى ءتيىس»، — دەدى ا. مامين.

Abai.kz