الماتىداعى بلوكبەكەتتە جول اپاتىن جاساعان BMW جۇرگىزۋشىسى وقيعا بولعانعا دەيىن ءتورت كۇن بۇرىن قىزمەتىنەن كەتكەن. بۇل تۋرالى قالالىق پوليتسيا دەپارتامەنتى مالىمدەدى، - دەپ حابارلايدى  Tengrinews.kz 

"ازاماتوۆ ا.ت ەسىمدى ەر ادام پوليتسيادا 2014 جىلدىڭ 30 ساۋىرىنەن باستاپ 2020 جىلدىڭ 21 مامىرىنا دەيىن پاترۋلدىك پوليتسيا پولكىنىڭ ينسپەكتورى بولعان. ول ىشكى ىستەر ورگانىنان ءوز ەركىمەن قىزمەتىنەن كەتكەن. 

قىزمەت بارىسىندا ازاماتوۆ ا. ءتورت جازا ارتىلعان جانە ەشقايسىسىندا كەشىرىم بەرىلمەگەن. بۇل جازالار ونىڭ قىزمەتتىك-اسكەري ءتارتىپتى بۇزۋىمەن جانە جاۋاپكەرشىلىگى تومەندىگىمەن بايلانىستى بولدى", - دەپ جاۋاپ بەردى پد وكىلدەرى.

جول اپاتى كەزىندە كۇدىكتى ماس كۇيدە بولعان، بۇل جۇرگىزىلگەن سوت-ناركولوگيالىق ساراپتامامەن راستالعان. ساراپتاما كۇدىكتىنىڭ الكوگولدىك ماسايۋىنىڭ ورتاشا دارەجەسىن انىقتاعان.

"25 مامىردا الماتى وبلىسىنداعى بلوكبەكەتتە بولعان قايعىلى وقيعانى تەكسەرىپ، تالداعاننان كەيىن، وقيعانىڭ سەبەپتەرىنىڭ ءبىرى جەكە قۇراممەن الدىن الۋ جۇمىستارىنا جول بەرمەۋ جانە قۇقىق بۇزۋشىلىق پەن تارتىپتىك تەرىس قىلىق جاساعان قىزمەتكەرلەرگە قاتىستى دەر كەزىندە ارەكەت ەتۋ شارالارىن قولدانباۋ بولدى. سونىمەن قاتار، باق-تا بۇرمالانعان اقپاراتتى ۇسىنۋ فاكتىلەرىنە سىني باعا بەرىلدى. قىزمەتتىك تەكسەرۋ قورىتىندىسى بويىنشا، ىشكى ىستەر مينيسترلىگىنىڭ بۇيرىعىمەن باسشىلىق قاتارىنان توعىز قىزمەتكەرگە قاتىستى تارتىپتىك جازا شارالارى قابىلداندى، ونىڭ ىشىندە ۇشەۋى قىزمەتىنەن بوساتىلدى", - دەدى قالالىق پد وكىلدەرى.

قازىرگى ۋاقىتتا جول اپاتى بويىنشا قاجەت تەرگەۋ امالدارى جۇرگىزىلىپ جاتىر، ءتيىس ساراپتامالار تاعايىندالدى.

"قىلمىستىق كودەكستىڭ 345-1-بابىنىڭ، 4-بولىگىنىڭ سانكتسياسىمەن كۇدىكتىنىڭ بەلگىلى ءبىر لاۋازىمداردى اتقارۋ نە بەلگىلى ءبىر قىزمەتپەن اينالىسۋ قۇقىعىنان ءومىر بويى ايىرىپ، جەتى جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان", - دەلىنگەن حابارلامادا.

ەسكە سالايىق، 25 مامىردا تاڭعى ساعات 5 جارىمدا 1992-ءشى جىلى تۋعان ەر ادام BMW ماركالى كولىگىمەن ماس كۇيىندە بلوكبەكەتتەگى پوليتسيا كولىگىن سوعىپ، وقيعا ورنىندا ەكى پوليتسيا قىزمەتكەرى قايتىس بولىپ، بىرەۋى اۋىر حالدە اۋرۋحاناعا جەتكىزىلگەن ەدى.

Abai.kz