جۇبان مولداعاليەۆ - حح عاسىردىڭ ەكىنشى جارتسىنداعى قازاق سوۆەت ادەبيەتىنىڭ، قازاق پوەزياسىنىڭ كورنەكتى وكىلدەرىنىڭ ءبىرى، قازاق ادەبيەتىنىڭ دامۋىنا قوماقتى ۇلەسىن قوسقان ادەبيەت ءىسىنىڭ ۇيىمداستىرۋشىسى، مەملەكەتتىك قايراتكەر. بيىل اقىننىڭ تۋعانىنا - 100 جىل.

جۇبان مولداعاليەۆتىڭ «مەن قازاقپىن» پوەماسى سارقىلمايتىن ومىرشەڭ تۋىندى، جۇبان مولداعاليەۆتىڭ سوزىنە جانە ءىليا جاقانوۆتىڭ انىنە جازىلعان، بۇگىندە دارىندى ءداستۇرلى ءانشى ايگۇل قوسانوۆانىڭ ورىنداۋىنداعى "ەدىل مەن جايىق" ءانى حالىقتىڭ سۇيىكتى انىنە اينالدى، اسەم ءان سازىنىڭ استارىندا اقىننىڭ تۋعان ەلىنە، جەرىنە شەكسىز ماحابباتى سەزىلەدى. اقىننىڭ ازاماتتىق ۇستانىمدارى پۋبليتسيستيكالىق سيپاتتا كەلىپ، ادامعا قاجەت وي تولعانىستارعا، قاسيەت قۇندىلىقتارعا تولى.
اقىن ءومىرى مەن شىعارماشىلىعى لايىقتى تاريحي باعاسىن الدى، ورال قالاسىندا اقىن ەسكەرتكىشى تۇر، جەرلەستەرىنىڭ، حالىقتىڭ اقىنعا دەگەن ماحابباتى مەن سۇيىسپەنشىلىگىنىڭ بەلگىسى.

*****

جۇبان مولداعاليەۆ 1970 جىلى جازعان «ءوزىم تۋرالى، ولەڭ تۋرالى» ومىرباياندىق بەتاشارىندا: «جىلاندى – مەنىڭ اتا-بابامنىڭ قونىسى، ءوزىمنىڭ كىندىك قانىم تامعان جەر. وسى جەردە دۇنيەگە كەلگەنمەن، بالالىق شاعىم سايقۇدىق ەلدى مەكەنىندە ءوتتى. اتا-بابامىز سۋ تاپشىلىعى بولعاندىقتان، مىنا جىلانداي يرەتىلىپ جاتقان سايدى قولدارىمەن قازىپ تەرەڭدەتىپ، التى شاقىرىم جەرگە ارنا قازىپ، ولەڭتى وزەنى تاسىعاندا سۋ قۇيىپ الىپ، سۋ قايتقاندا ساعانى بوگەپ، جاز بويى كەلەسى جىلعا دەيىن سول ءناردى پايدالانادى ەكەن. نەبىر قيىنشىلىق زاماندى باستان وتكەرىپ، وسى جەردى مەكەندەپتى.

مەنىڭ 5- 6 جاسىمدا شەشەم «ليكبەزگە» قاتىسىپ، ساۋاتىن اشتى. انامنىڭ جانىنان قالماي ءجۇرىپ، جاديتشە حات تانىپ كەتتىم. العاش قولىما ۇستاعانىم – «ايەل تەڭدىگى» جۋرنالى بولدى. ال رەسمي مەكتەپ ەسىگىن تەك 1930 جىلى عانا اشتىم. ول قىزىلجار شارۋا جاستار مەكتەبى دەپ اتالاتىن. ولەڭ شىعارۋعا دا ەرتە تالپىندىم. مەكتەپ قابىرعا گازەتتەرىندە 13-14 جاسىندا كورىنە باستادىم. گازەت بەتىندە جوعارىدا ايتتىم، 1939 جىلدان بەرى جازىپ ءجۇرمىن» -دەپ باياندايدى.

جۇبان مولداعاليەۆ عاسىر قاسىرەتىن: اشارشىلىق، جوقشىلىق پەن جەتىمدىك كورگەن، دۇنيەجۇزىلىك سۇراپىل سوعىستى باسىنان كەشىرگەن مايدانگەر – قالامگەر، سوۆەتتىك توتاليتارلىق جۇيەنىڭ ەزگىسىندە ءومىر ءسۇرىپ ادامشىلىق قاسيەتىن، كىسىلىك تۇلعاسىن ساقتاپ قالعان ازامات اقىن، ونىڭ بۇل قاسيەتتەرى ولەڭدەرىندەگى وي تولعانىستارى مەن كوزعاراستارىندا، ومىرلىك ۇستانىمدارىندا ايقىن، اقىن ءومىر تاۋقىمەتىن تارتقانىن كورەسىڭ:

«كورىنگەن سوناۋ جەردىڭ قيىعى ەكەن،
جالعىزدىق، اكەسىزدىك قيىن ەكەن...!»
جاسىردىم بۇل سىرىمدى انامنان دا،
كەۋدەمە ولەڭ نۇرىن قۇيىپ وتكەن - دەگەن اقىن جۇبان مولداعاليەۆ ءومىرىن ادەبيەت ونەرىنە، پوەزياعا ارنادى.

*****

پوەزيا ۇلتتىق ادەبيەتىمىزدە كوشباسشى جانر، سوناۋ اۋىز ادەبيەتىنەن، اسانقايعى، قازتۋعان، شالكيىز، بۇقار جىراۋلاردان،
زارلى دۋلات،  شورتانباي، مۇرات، نارمانبەتتەردەن، اسىل دانا اباي مەن دانا ويشىل شاكارىمنەن بەرى قازاق پوەزياسىنىڭ باستى ءداستۇرى سانالاتىن، ار –ۇياتى، وجدانى دەسە دە بولاتىن - ەلدى، تۋعان جەردى، قازاقتى، حالىق تاريحى مەن ونىڭ ءومىرىن، تاعدىرىن جىرلاۋ بولىپ تابىلادى.
جۇبان مولداعاليەۆتە ەلىن، جەرىن، قازاقتى جىرلاپ وتكەن جىراۋ اقىن: «مەن قازاقپىن»، «جەسىر تاعدىرى»، «كىسەن اشقان»، «قيال قاناتى» «جىر تۋرالى جىر»، «قىران دالا»، «سەل»، «بايقوڭىر باسپالداقتارى» جانە تاعى باسقا پوەمالارى اقىننىڭ ەپيكالىق – پوەتيكالىق دەڭگەيىنىڭ، فيلوسوفيالىق تەرەڭدىگىنىڭ كورىنىسى.

جۇبان مولداعاليەۆ: «ناعىز اقىندى، ءتىرى اقىندى بەتپە بەت كورگەنىم دە سول جىلى (1939 جىل). مەن وندا ورالدىڭ اۋىلشارۋاشىلىق تەحنيكۋمى ستۋدەنتى ەدىم. ورال مەن گۋرەۆ جاس ادەبيەتشىلەرىنىڭ بىرىككەن سلەتىن وتكىزۋگە الماتىدان قاسىم امانجولوۆ كەلدى. سول ساتتە گۋرەۆتەن كەلگەن حاميت ەرعاليەۆ پەن جاردەم تىلەكوۆتى دە كوردىم. بۇلار مەندەي ەمەس، سول كەزدىڭ وزىندە قابىرعاسى قاتىپ بۇعاناسى بەكىپ قالعان دارىندار ەدى. تۇڭعىش رەت مىنبەگە شىعىپ وقىعان «كەل جولداستار، جىرلايىق» دەگەن ولەڭىم سولاردىڭ ءور داۋىستارىنىڭ ەكپىنى استىندا قالىپ قويعان سياقتى بولدى» - ەسكە الادى.
جۇبان مولداعاليەۆ ىشتەي دە، سىرتىنان دا قاسىم پوەزياسى ۇلگى داستۇرىندەگى اقىن، قاسىم ءىزباسارى، اينالاسىنا وت جالىن، جارقىن شاشقان قاسىم پوەزياسى ىقپالىنىڭ بولماۋى مۇمكىن ەمەس، ويتكەنى جۇباننىڭ اقىندىق شىعارماشىلىعىنداعى «ءوزىم تۋرالى، ولەڭ تۋرالى» ومىرلىك تولعانىستارى نەمەسە «انكەتاما قوسىمشا» ولەڭى، جۇبان اقىننىڭ سولدات ولەڭدەرى، تابيعات پەن ساعىنىش تۋرالى تولعانىستارى قاسىم اقىنمەن ۇندەس، ءومىر تۇسىنىكتەرى مەن تولعانىستارى، شىندىقتارى، ولاردىڭ باياندالۋى دا ۇقساس، ەكەۋى دە زۇلمات عاسىردىڭ تۇلەكتەرى، ۇندەس، ۇقساس بولماۋى مۇمكىن ەمەس، مىسالى، ولەڭ تۋرالى جۇبان اقىن ويى دا اۋمايدى:
ءبىر شۋماقتىڭ ۇيقاسىن مىڭ قۇرايمىن،
تۇرعىزام دەپ ءبىر جىردى مىڭ قۇلايمىن.
اقىن سورلى بولسا ەگەر، مەن سورلىمىن،
اقىن قۇداي بولسا، تەك مەن قۇدايمىن.
جۇبان مولداعاليەۆتىڭ ولەڭ تۋرالى تۇسىنىگى دە ۇقساس، «سالت پەن مودا» ولەڭىندە جۇبان: «پوەزيا ول - اسىل ويدىڭ بيىگى، جان -جۇرەكتىڭ قۋانىشى، كۇيىگى»، - دەپ وزىنە انىقتايدى.

*****

اكادەميك زەينوللا قابدولوۆ كەزىندە: «جۇبان ولەڭدەرىنىڭ يدەيالىق دارەجەسى، كوركەمدىك دەڭگەيى اۋەلدەن جوعارى» دەپ باعالاعانى بەلگىلى، اقىننىڭ يدەيالىق مۇراتى ىزدەنىستەرگە يتەرمەلەسە كەرەك: ول ازاماتتىق، تابيعات، كوڭىل كۇي، ماحاببات ليريكالارىندا كەزىندە مولىنان كورىندى، ولار حالىقتىڭ تالعامىنا قۇيىلدى، تانىمال ولەڭ جولدارعا اينالدى:

ومىردە اششى قانداي، ءتاتتى قانداي –
كىم قالاي بىلەدى ءوزى تاتىپ الماي؟
ۇعاسىڭ، ارداقتايسىڭ ادامدى دا
ادامعا ءىس بولسا تاتىعانداي.

*****
ادامدى تىرىدە تەك باعالايىق،
ارداقتاپ اپالايىق، اعالايىق
باس دەيىك، باتىر دەيىك، بيىك دەيىك
جوق بولسا وجدانىنا تاتار ايىپ.

*****

اشىققانعا نان ارمان،
اداسقانعا تاڭ ارمان،
اۋىرعانعا جان ارمان،
ارمان، ارمان، سان ارمان،

*****

مەن قازاق ايەلىنە قايران قالام،
جايناعان، جالىنداعان، جايراڭداعان.
«قاتىننىڭ شاشى ۇزىن، اقىلى قىسقا»
دەگەندى ايتتىڭ ەكەن قايدان، بابام؟

*****
قىز سىرى - ىشىندە،
ەستىلمەس وزىنەن،
قىز سىرى –ىشىندە
كورە ءبىل كوزىنەن،
سازىنان،
نازىنان.

*****
ارمىسىڭ –اۋ، ارمىسىڭ،
اينالايىن جەڭەشەم؟
بارمىسىڭ اۋ، بارمىسىڭ،
اينالايىن جەڭەشەم؟
جارق ەتتىڭ –اۋ بىرىندەي
قوس ىرعايدىڭ، جەڭەشەم!
قۇشاق جايا جۇگىرمەي،
توسىرقايسىڭ نەگە سەن؟-

*****
تەڭىزدەي تەبىرەنىپ تىنشىمايسىڭ،
قۋماساڭ - كولەڭكەسىز كۇنسىڭ، ايسىڭ،
قامىقساڭ - قاماۋداعى قارا كۇشىك،
كەۋدەڭدى تىرنالايسىڭ، قىڭسىلايسىڭ، -

*****
جۇبان مولداعاليەۆ 1941 جىلى 22 ماۋسىمدا تاڭعى تورتتە سوۆەتتەر ەلىنىڭ باتىس شەكاراسىندا 28 تانك ديۆيزياسىنىڭ 28 گاۋبيتسالىق ارتيلەريا پولكىنىڭ باتارەيا كوميسارىنىڭ ورىنباسارى قىزمەتىندە سوعىسپەن بەتپە بەت جۇزدەستى، سودان اسكەردەن 1947 جىلى عانا بوسايدى، زەڭبىرەكشى، ارتيللەريا باتارەياسىنىڭ كوميسسارى، 2 ء–ىنشى بەلارۋس مايدانىندا قازاق تىلىندە شىققان «مايدان شىندىعى» گازەتىنىڭ ءتىلشىسى. مايدان جىلدارى بەلگىلى ورىس اقىن - جازۋشىلارى: الەكساندر يسباح، ميحايل ماتۋسوۆسكي، بوريس بياليك جانە مايداندىق رەداكتسيالاردى باسقارعان: سەرگەي ميحالكوۆ، ميحايل سۆەتلوۆ، ستەپان ششيپاچەۆتەرمەن، بەرتىن كەلە اقىن ريمما كازاكوۆا، باشقۇرت اقىنى مۇستاي كارىم، اتاقتى راسۇل عامزاتوۆپەن تانىسادى، ولاردىڭ ورتاسىندا كوپ جىلدارعا سوزىلعان قارىم –قاتىناستار ورنايدى.

سوعىستان كەيىنگى جىلدارى جۇبان مولداعاليەۆتىڭ قالامگەر رەتىندەگى ادەبي ۇيىمداستىرۋشىلىق قابىلەتى كەڭىنەن اشىلادى: 1948-1952 جىلدارى «لەنينشىل جاس» گازەتىنىڭ ءبولىم مەڭگەرۋشىسى، جاۋاپتى حاتشىسى، باس رەداكتوردىڭ ورىنباسارى، 1952 -1954 جىلدارى قازاقستان جازۋشىلار وداعىنىڭ كەڭەسشىسى، 1957-1963 جىلدارى – «جۇلدىز» جۋرنالىنىڭ باس رەداكتورى، 1963- 1971 جىلدارى قازاقستان جازۋشىلار وداعىنىڭ حاتشىسى، ال 1973 جىلدان -1984 جىلعا دەيىن قازاقستان جازۋشىلار وداعىنىڭ ءبىرىنشى حاتشىسى قازمەتتەرىن، وسى كەزدە (1973 -1984 ج.ج ) سسسر جازۋشىلار وداعىنىڭ حاتشىسى قىزمەتىن دە قوسا اتقارادى.

حح عاسىردىڭ ەكىنشى جارتسىنداعى 60 جىلداردان بەرگى 90 جىلدارعا دەيىنگى قازاق ادەبيەتى، جالپى قازاق رۋحاني - مادەني تاريحىنداعى «التىن عاسىر» ەدى، «ءتىرى كلاسسيكتەر» مەن «ۇلى اقىندار» زامانى ەدى. ادەبيەتتىڭ بارلىق جانرلارى: ونىڭ ۇلتتىق پوەزياسى، پروزاسى، دراماتۋرگياسى، ادەبي كوركەم سىنى مەن اۋدارما ونەرى، ادەبيەتتانۋ عىلىمى كاسىبي دەڭگەيگە جەتكەن، ادەبيەتتىڭ كوركەمدىك جانە ءسوز شەبەرلىگى بيىك شىڭعا كوتەرىلگەن ۋاقىت ەدى. بىرىنەن سوڭ ءبىرى تاريحي دەرەكتەرگە تولى كەڭ اۋقىمدى تاريحي روماندار، ادام جانى مەن تاعدىرىنا، ادامشىلىققا سيۋجەتى قۇرىلعان پوۆەستەر مەن پوەمالار، اقىندىق ەرەكشە ستيلدەرمەن، كوركەم شىنايىلىقپەن، اسەم ىرعاق، ۇشقىر تەڭەۋلەرمەن جازىلعان سانسىز ليريكالىق ولەڭدەر تۋدى، الەم ادەبيەتى كلاسسيكالىق تۋىندىلارى مولىنان اۋدارىلدى، قازاق ادەبيەتى دە الەمنىڭ وتىزعا جۋىق تىلدەرىنە ءتارجىمالانىپ، قازاق ادەبي سىنى مەن ادەبيەتتانۋ عىلىمى دا كاسىبي دارەجەگە كوتەرىلگەن جىلدار ەدى. جۇبان مولداعاليەۆتە بۇل جىلدارى بۇرقىراعان ادەبي ورتادا ادەبي مايدان جاۋىنگەرىندەي شىعارمالارىمەن ۇلەس قوستى، ادەبي پروتسەستەرگە باسشىلىق ەتتى، جازۋشى ارىپتەستەرىنە قول ۇشىن سوزىپ، قورعاپ، ساقتاپ ءجۇردى.

اقىن قايرات جۇماعاليەۆ «ءۇش ەرلىك» ماقالاسىندا: «ءبىر قاراعاندا جۇباعاڭ سۇستى، سالقىن ادام سياقتى كورىنەتىنى راس. الايدا سويلەسە كەلە، سىرلاسا كەلە ونىڭ جانى جارقىراپ، اشىلا تۇسەتىن. جانە دوستىققا ادال، بەرىك ادام ەدى. ءالى ەسىمدە، سول كەزدە جوعارعى كەڭەستەگى جۇمىسىنان بوساپ قالعان، قازاق دەتەكتيۆىنىڭ اتاسى كەمەل توقاەۆتى، سونداي-اق كورنەكتى پروزايك بەردىبەك سوقپاقباەۆتى جازۋشىلار وداعىنا قىزمەتكە تارتىپ، قامقورلىق جاساعان اقىن اعانىڭ اسىل قاسيەتى دەپ بىلەمىن» دەپ جازادى.

قازاقستان رەسپۋبليكاسى مەملەكەتتىك سىيلىعىنىڭ  لاۋرەاتى، جازۋشى-دراماتۋرگ باققوجا مۇقاي بىلاي ەسكە الادى: «جۇباقاڭ سىرت قاراعاندا وتە قاتال ادام بولىپ كورىنەدى. بىراق، جانى جۇمساق. قينالعان ادامدارعا قامقورلىق جاساۋعا دايىن تۇراتىن ەدى. كەيدە بىرەۋگە جاساعان جاقسىلىعى وزىنە تاياق بولىپ ءتيىپ جاتاتىن.

ءبىزدىڭ مىندەتىمىز - جازۋشىلارعا قامقورلىق جاساۋ. ءۇيدى جازۋشىلاردىڭ بالالارىنا بەرسەك،  بۇل - ولاردىڭ اكەلەرىنىڭ جاعدايىن ويلاعانىمىز. ارىز جازىلار، سىرتىمىزدان كىنالار، سوگەر. ۋاقىت ءبىزدىڭ ءىسىمىزدىڭ ادىلدىگىن   سان رەت دالەلدەيدى، - دەدى ءبىر جيىندا ول كىسى.

جۇبان مولداعاليەۆ ماعان ارقاشان اسا ۇلكەن ماسەلەلەرمەن اينالىسىپ جۇرگەندەي بولىپ كورىنەتىن. شىنىندا دا، سولاي ەدى. ول ىرىلىگىن، ۇلكەن تۇلعا ەكەندىگىن جەر باسىپ جۇرگەن جىلدارىندا سان مارتە دالەلدەدى. سونىڭ ءبىرى - 1986 جىلدىڭ 31 جەلتوقسانىندا جازۋشىلار وداعىندا بولعان جيىندا جاساعان ەرلىگى. قازاقستاننىڭ جاڭا باسشىسى گ.كولبين سول كۇنى بۇكىل نوكەرلەرىن ەرتىپ، جازۋشىلار وداعىنا كەلگەن. سول جولى «مىڭ ءولىپ، مىڭ تىرىلگەن» ۇلتىنىڭ نامىسىن جىرتىپ، ەشكىم ايتا الماعان ءسوزدى جۇبان مولداعاليەۆ ايتتى. ول سونداي ەدى. سونداي بولىپ تۋعان تۇلعا ەدى».
قادىر مىرزا ءالى: «كولبيننىڭ الدىندا قىرشىنىنان قيىلعانداردى قورعاپ ءسوز ايتقان ءبىر عانا اقىن بولدى. ول – جۇبان مولداعاليەۆ. ول جازۋشىلار وداعىندا وتكەن جينالىستا كولبيننىڭ الدىندا ءوز ويىن اشىق ايتتى. وسىنىڭ ءبارىن نەمەن تىنارىن سەزىپ تۇرىپ، ءبىلىپ تۇرىپ، سولاي ىستەدى. باتىر بولۋعا ءتيىستى ازامات ەدى. باتىرلىق ىستەدى. جىلدار بويى جۇرەگىن قىسىپ كەلگەن زاپىرانىن قۇسىپ تىندى. ونداي باتىلدىقتان كەيىن ونىڭ ءتىرى ءجۇرۋى اقىلعا سىيماس ەدى» - دەپ، سۇيىسپەنشىلىكپەن ءوزىنىڭ كىتابىندا جازادى.

*****

1985 جىلدىڭ كوكەك ايىندا ميحايل گورباچەۆ باستاعان قايتا قۇرۋ، جاريالىلىق، بەتبۇرىس جۇبان اقىننىڭ ومىرلىك سەنىمىن، كوزعاراستارى مەن تۇسىنىكتەرىن تۇبەگەيلى شايقالتىپ جىبەرەدى، «ءبىز - سوۆەت اقىندارىمىز، ءبىز بۋرجۋازيالىق يدەولوگياعا قارسى بىتىسپەس كۇرەس مايدانىنداعى اقىندارمىز» دەپ اقىننىڭ ءوزى زور داۋىسپەن، زور ماقتانىشپەن ايتىپ كەلگەن سوتسياليزم يدەيالارىنىڭ كوككە ۇشقانىن، سوتسياليستىك قوعامنىڭ تۇيىققا تىرەلگەنىن تۇسىنەدى. جۇبان مولداعاليەۆ «ەرىكتى تاقىرىپتارعا تولعانىس» دەگەن سوڭعى ماقالاسىندا: «ءبىز جۇمساعان كۇش –جىگەردىڭ، ىنتا ىقىلاستىڭ ءبارى بىردەي سالتانات، ءبارى بىردەي سامعاۋ بولا بەرگەن جوق. ءىرى – ءىرى ساتسىزدىكتەرگە ۇشىرادىق، قاتەلىكتەرگە ۇرىندىق. ايتايىن دەگەنىڭدى ايتا الماي، كولەڭكەڭنەن ۇركىپ، قاتەلەسۋدەن قورىققان جەردە – دەموكراتيا دا جوق. كەشەگى كۇندەردىڭ قاتال ساباقتارى وسىنى سيپاتتايدى» دەپ جازدى. جەتپىس جىل سالتانات قۇرىپ، الەمدە ۇلى يمپەرياعا اينالىپ ۇلگەرگەن سوۆەتتەر وداعى كۇيرەپ، قازاق ەلىنىڭ مەملەكەتتىك تاۋەلسىزدىگىن كورۋ جۇبان اقىننىڭ تاعدىرىنا جازىلمادى، اقىن 1988 جىلعى 6 قازاندا الماتى قالاسى اۋرۋحاناسىندا قايتىس بولادى.

1990 جىلدىڭ قىركۇيەگىندە ولەڭتى اۋىلىندا جۇبان مولداعاليەۆتىڭ 70 جاسقا تولۋ مەرەيلى مەرەكەسىندە جۇباننىڭ اۋىلداسى، ومىرلىك دوسى، بەلگىگى اقىن ساعىنعالي سەيىتوۆ:
كەشىر مەنى، كەشىرە گور جىلاندى،
مەن قانشاما بولسام-داعى شىدامدى.
توپىراعىڭا تيگەن شاقتا تابانىم،
كوزىم ءمولت-ءمولت، مونشاق شىقپەن شىلاندى.
شىلانبادى، اعىل-تەگىل بۇلاندى،
سەرپە المادىم جانارىمنان تۇماندى.
كەشىر مەنى، كەلە المادىم ەرتىپ مەن.
دارا دارىن، دانا ۇلىڭ جۇباندى.- دەگەن جان تەبىرەنتەر جولداردى وقىعاندا ولەڭتىلىكتەر، كەلگەن قوناقتار تولقىپ، كوزدەرىنە جاس الدى.

جۇبان اقىن تۋرالى جاقسى كوپ ايتىلدى، ءالى دە ايتىلادى، ونىڭ نار تۇلعاسى، قازاقى كەڭدىگى، ادامشىلىعى مەن كىسىلىك كەلبەتى جانە ادال، اسىل قاسيەتتەرى تۋرالى عىلىمي زەرتتەۋلەردە، ونىڭ ءومىرى مەن ولەڭدەرى تۋرالى ەڭبەكتەردە تالاي ءالى جازىلادى، بىرەۋلەر كۇيە جاعام دەسە دە ادالعا قارا جۇقپايدى، ول ماڭىزدى دا ەمەس. ماڭىزدىسى جۇبان اقىن قازىر بيىكتەن ەسكەرتىپ، قۋاتتى جالىن شاشىپ:
مەن — كازاقپىن، بيىكپىن، بايتاق ەلمىن،
قايتا تۋدىم، ومىرگە قايتا كەلدىم.
مىڭ دا ءبىر ءتىرىلدىم ماڭگى ولمەسكە –
ايتا بەرگىم كەلەدى، ايتا بەرگىم..... دەپ شىڭدا تۇرعانداي كورىنەدى.
.
سالاۋات كارىم

Abai.kz