دۇتباەۆ وتىرعان شقو جارما اۋدانى شۋاق كەنتىندەگى وۆ-156/17 تۇرمەسىندەگىلەر “ول 18 ماۋسىمدا سوت شەشىمى كۇشىنە ەنگەن سوڭ بوستاندىققا شىعىپ، الماتىعا كەتۋى ءتيىس بولعان” دەدى. دۇتباەۆتىڭ شارتتى تۇردە بوساپ شىعۋىنىڭ سەبەبى ايتىلمادى.

نارتاي دۇتباەۆ ۇقك-نى 2001 جىلدىڭ جەلتوقسانىنان 2006 جىلدىڭ اقپانىنا دەيىن باسقاردى. كەيىن ۇقك-نىڭ “ارىستان” ءبولىمىنىڭ وپپوزيتسيالىق ساياساتكەر التىنبەك سارسەنباەۆتىڭ ولىمىنە قاتىسى بارى بەلگىلى بولعان سوڭ وتستاۆكاعا كەتتى.

2016 جىلى جەلتوقساندا دۇتباەۆ “مەملەكەتتىك قۇپيانى اشتى” دەگەن كۇدىكپەن ۇستالعان. 2017 جىلى تامىزدا اقمولا گارنيزونىنىڭ اسكەري سوتى ونى “مەملەكەتتىك قۇپيانى اشتى” جانە “قىزمەتىن اسىرا پايدالاندى” دەپ 7,5 جىلعا سوتتادى. 2018 جىلى قاڭتاردا ءدال وسى سوت ونى “اقشا جىمقىردى” دەپ ايىپتادى. سوت ەكى جازانى بىرىكتىرىپ، دۇتباەۆتى 12 جىلعا باس بوستاندىعىنان ايىردى.

2018 جىلى كۇزدە دۇتباەۆ “تۋرانالەم” بانكىنىڭ باسقارمانىڭ ەكس-باسشىسى ەرجان تاتىشەۆتىڭ ولىمىنە قاتىستى سوتتا كۋالىك ەتتى. بۇل سوت بويىنشا بيلىكتى سىناپ جۇرگەن بۇرىنعى بانكير، قازىر شەتەلدە تۇرىپ جاتقان مۇحتار ءابليازوۆ ايىپتالعان ەدى. دۇتباەۆ ءوز سوزىندە ءابليازوۆ پەن تاتىشەۆ اراسىندا “مۇلىككە بايلانىستى كەلىسپەۋشىلىك بولدى” دەگەن.

2019 جىلى قاڭتاردا جوعارعى سوتتىڭ قىلمىستىق ىستەر بويىنشا كاسساتسيالىق القاسى باس پروكۋراتۋرانىڭ شاعىمىن قاناعاتتاندىرىپ، دۇتباەۆتىڭ تۇرمە جازاسىن 12 جىلدان 11 جىلعا قىسقارتقان.